Nunbru
23 Nton, Balaon fla Balaki: “Faze 7 altar li, i pripara-m 7 toru i 7 karneru.” 2 Kel óra, Balaki faze sima Balaon fla-l. Balaki i Balaon oferese un toru i un karneru na kada altar. 3 Nton, Balaon fla Balaki: “Fika li djuntu di bu oférta kemadu, timenti N ta bai ti la. Talvês Jeová ta pâpia ku mi. N ta konta-u kalker kuza ki el fla-m.” Nton, el bai pa un monti ki ka tinha arvi.
4 Nton, Deus pâpia ku Balaon i Balaon fla-l: “N pripara 7 altar* i N oferese un toru i un karneru na kada altar.” 5 Jeová poi kes palavra li na bóka di Balaon: “Volta pa Balaki, i é kel-li ki bu debe fla-l.” 6 Nton, el volta i el odja Balaki i tudu kes prínsipi di Moabe di pé djuntu se oférta kemadu. 7 Dipôs, el fla kel provérbiu li:
“Balaki, rei di Moabe, traze-m désdi Aran,
Désdi kes montanha di orienti:
‘Ben i maldísua Jakó pa mi.
Sin, ben i kondena Israel.’
8 Modi ki N ta pode maldísua kes ki Deus ka maldísua?
I modi ki N ta pode kondena kes ki Jeová ka kondena?
9 N ta odja-s di riba di kes rótxa,
I N ta odja-s di kes monti.
Es é un povu ki ta mora la es sô;
Es ka ta mistura ku kes nason.
10 Ken ki pode konta kes granzinhu di téra di Jakó?
Ken ki pode konta kel kuartu párti di Israel?
Dexa-m* ten kel mórti ki kes algen justu ta ten,
I pa nha fin ser sima di ses.”
11 Nton, Balaki fla Balaon: “Pamodi ki bu faze kel-li ku mi? N traze-u li pa bu ben maldísua nhas inimigu, má sô bu abensua-s.” 12 El responde: “N ka debe fla tudu kel ki Jeová poi na nha bóka?”
13 Balaki fla-l: “Favor, ben ku mi pa otu lugar, undi bu ta pode odja-s. Bu ta konsigi odja sô un párti di es, bu ka ta konsigi odja es tudu. Di la, maldisua-s pa mi.” 14 Nton, Balaki leba-l pa kanpu di Zofin, la di riba di Pisga. El faze 7 altar i el oferese un toru i un karneru na kada altar. 15 Nton, Balaon fla Balaki: “Fika li djuntu di bu oférta kemadu timenti N ta bai pâpia ku El.” 16 Jeová pâpia ku Balaon i el pô-l kel palavra li na bóka: “Volta pa Balaki, i é kel-li ki bu debe fla-l.” 17 Nton, el bai na el i el odja ma el staba djuntu di se oférta kemadu, i kes prínsipi di Moabe staba ku el. Balaki pergunta-l: “Kuzê ki Jeová fla?” 18 Nton, el fla kel provérbiu li:
“Labanta i obi, Balaki.
Obi, ó fidju di Zipor.
19 Deus é ka ómi ki ta konta mintira,
Nen el é ka fidju di ómi pa muda di ideia.*
Óras ki el ta fla un kuza, el ka ta faze-l?
Óras ki el ta faze un promésa, el ka ta kunpri-l?
20 Odja! N trazedu li pa N ben abênsua;
El abênsua, i N ka pode muda kel-li.
21 El ka ta tolera ninhun puder di majia kóntra Jakó,
I el ka ta dexa kontise ninhun disgrasa kóntra Israel.
Jeová, se Deus, sta ku es,
I el ta lovadu sima rei na ses meiu.
22 Deus sta ta traze-s di Ijitu.
Pa es, el é sima kes txifri di un toru brabu.
23 Pamodi kes mau sinal* ka ta sirbi kóntra Jakó,
Nen dibinhason kóntra Israel.
Gósi pode fladu kel-li sobri Jakó i Israel:
‘Nhos odja kuzê ki Deus faze!’
24 Kel-li é un povu ki ta ben labanta sima un lion,
I sima un lion, el ta ben labanta.
El ka ta deta timenti el ka kume se kasa
I bebe sangi di kes ki matadu.”
25 Nton, Balaki fla Balaon: “Si bu ka pode maldisua-l, tanbê bu ka debe abensua-l.” 26 Balaon responde Balaki: “N ka fla-u ma N ta fazeba tudu kel ki Jeová fla?”
27 Balaki fla Balaon: “Favor ben i dexa-m leba-u inda pa otu lugar. Talvês Deus verdaderu ta dexa-u pa bu maldisua-l pa mi di kel lugar la.” 28 Nton, Balaki leba Balaon la di riba na Peor, undi ta daba pa odja Jezimon.* 29 Nton, Balaon fla Balaki: “Faze 7 altar li, i pripara-m 7 toru i 7 karneru.” 30 Nton, Balaki faze sima Balaon fla-l, i el oferese un toru i un karneru na kada altar.