Romanus

1 Di Paulu, skravu di Kristu Jizus, ki txomadu pa ser apóstlu i skodjedu pa pâpia di kes notísia sábi di Deus, 2 ki dja el prometeba através di se profétas na Skrituras sagradu, 3 i ki ta papiaba di se Fidju. El ben di família* di Davidi, 4 má el txomadu di Fidju di Deus, pamodi Deus uza puder di se spritu santu pa resusita-l di mórti (sin, Jizus Kristu, nos Sinhor. 5 Através di el, Deus mostra-nu se grandi bondadi. Jizus skodje-m pa N ser apóstlu, asi pa N djuda algen di tudu nason mostra fé i obidiensa i pa es onra se nómi. 6 Anhos tanbê nhos txomadu di kes nason pa nhos sigi Jizus Kristu.) 7 Kel karta li é pa tudu kes ki Deus ta ama ki sta na Roma i ki txomadu pa ser santu:

Pa Deus, nos Pai, i pa Sinhor Jizus Kristu mostra nhos grandi bondadi i da nhos pas.

8 Primeru di tudu, N ta agradese nha Deus através di Jizus Kristu pa nhos tudu, pamodi sta papiadu di nhos fé na mundu interu. 9 Pamodi Deus, kel ki N ta sirbi di tudu nha korason* i ki N ta pâpia di kes notísia sábi sobri se Fidju, é nha tistimunha ma sénpri N ta pâpia di nhos na nhas orason, 10 i N ta pidi ma si ta da, i si é di vontadi di Deus, pa N konsigi ba vizita nhos. 11 Pamodi N tene gana di odja nhos, pa N da nhos algun ajuda* spritual, pa nhos fé fika más fórti, 12 ô midjór, pa nu inkoraja kunpanheru através di nos fé, di nhos i di meu tanbê.

13 Má irmons, N ka krê pa nhos fika sen sabe ma N tenta ba djobe nhos txeu bês, má ti gósi N ka dexadu. N krê odjaba bons rezultadu di nos pregason la, sima sta ta kontise na kes otu nason. 14 N ten obrigason* di djuda tudu algen, gregus i tanbê kes stranjeru,* kes ki ten sabedoria i kes ki ka ten sabedoria. 15 Pur isu, N sta ku gana di pâpia di kes notísia sábi tanbê pa nhos ki sta na Roma. 16 Pamodi N ka ta xinti vergónha di kes notísia sábi. Na verdadi, el é puder di Deus pa salva tudu kenha ki ten fé, primeru pa judeus i tanbê pa gregus. 17 Pamodi kes ki ten fé ta odja ma através di kes notísia sábi Deus ta mostra se justisa, i kel-li ta bira ses fé más fórti, sima sta skrebedu: “Má algen justu ta ben vive pamodi fé.”

18 Pamodi Deus sta ta mostra se raiba la di séu kóntra tudu maldadi i injustisa ki ómi sta ta faze, ki sta ta inpidi pesoas di konxe verdadi. 19 Pamodi kes kuza ki algen pode sabe sobri Deus, ta fika klaru pa es, dja ki Deus bira-l klaru pa es. 20 Pamodi se kualidadis ki nu ka ta pode odja, sima se puder ki ka ta kaba i próvas ma el é Deus, sta ta odjadu klaru désdi kriason di mundu, pamodi es ta pode intendedu através di kes kuza ki kriadu. Pur isu, kes algen ka ten diskulpa. 21 Enbóra es sabeba ma el é Deus, es ka da-l glória i nen es ka agradese-l. Ses menti bira vaziu i sen intendimentu, i ses korason bira sukuru. 22 Enbóra es ta fla ma es ten sabedoria, es bira tolu 23 i es bira glória di kel Deus ki ka ta móre na un kuza sima imajen di ómi ki ta móre i tanbê di pasus, di animal ki ten kuatu pé i di kes animal ki ta rasta.

24 Pur isu, dja ki es krê sigi dizeju di ses korason, Deus dexa-s pa es faze kuzas inpuru i ki ta traze vergónha pa ses korpu. 25 Es troka verdadi di Deus pa mintira, i es adora i es faze sirvisu sagradu pa kriason envês di pa Kriador, ki é kel ki debe lovadu pa tudu ténpu. Amén. 26 É pur isu ki Deus dexa pa ses dizeju seksual vergonhozu toma kónta di es. Pamodi kes mudjer troka kes relason seksual natural pa kes relason ki é kóntra naturéza. 27 Tanbê, kes ómi dexa kel relason natural ku mudjer i es fika xeiu di paxon diskontroladu pa otus ómi, ta faze kuzas nojéntu ku kunpanheru. Má es ta ben resebe tudu kastigu* ki es merese pamodi ses éru.

28 Dja ki es ka krê rekonheseba Deus,* Deus dexa-s kontinua ta ten ses pensamentu mariadu, pa es faze kuzas ki es ka devia fazeba. 29 Es staba xeiu di tudu tipu di injustisa, di kuzas mariadu, ganánsia* i maldadi. Es staba xeiu di invéja, asasinatu, briga, mintira i falsidadi. Es ta meteba na vida di algen,* 30 es éra kaluniador, es ta odiaba Deus, es éra diskaradu, orgulhozu, konvensidu, es ta fazeba planus pa faze kuzas mariadu,* es ka ta obiba ku ses pai ku ses mai, 31 es ka tinha intendimentu, es ka ta kunpriba ses promésa, es ka tinha amor pa kunpanheru i nen mizerikórdia. 32 Enbóra es sabe dretu ma Deus ta fla ma kes algen ki ta faze kes kuza li merese móre, es ta kontinua ta faze-s i tanbê es ta konkorda ku kes ki ta faze-s.