Sugunda Timótiu
1 Di Paulu, apóstlu di Kristu Jizus pa vontadi di Deus, di akordu ku promésa di kel vida ki ta ben através di Kristu Jizus, 2 pa Timótiu, nha fidju ki N krê txeu:
Pa Deus, nos Pai, i pa Kristu Jizus, nos Sinhor, mostra-u grandi bondadi, mizerikórdia i da-u pas.
3 N ta agradese Deus, kel ki N ta faze sirvisu sagradu pa el sima nhas gentis grandi faze, i ku un konsénsia linpu. Sénpri N ta lenbra di bo óras ki N ta inplora* Deus dia ku noti. 4 Óras ki N ta lenbra di bus lágua, N ta fika ku vontadi di odja-u, asi pa N pode intxi di alegria. 5 Pamodi N ta lenbra di bu fé sen finjimentu, kel fé ki primeru staba na bu avó Lóidi i na bu mai Eunisi, i ki N ten serteza ma sta na bo tanbê.
6 Pur isu, sima ta tisadu un lumi, N krê lenbra-u pa bu tisa kel don di Deus ki bu resebe désdi kantu N poi nha mô riba bo. 7 Pamodi Deus ka da-nu un spritu di kobardia, má di puder, di amor i di bon juís. 8 Pur isu, ka bu xinti vergónha di tistimunhu sobri nos Sinhor, nen di mi ki sta prézu pamodi el. Má, ku kunfiansa na puder di Deus, seta sufri pamodi kes notísia sábi. 9 El salva-nu i el txoma-nu ku un xamada santu, ka pamodi nos trabadju, má pamodi se própi obijetivu i se grandi bondadi. Deus disidi mostra-nu es bondadi através di Kristu Jizus dja ten txeu ténpu, 10 má gósi el bira klaru pamodi nos Salvador Kristu Jizus parse. El kaba ku mórti, i através di kes notísia sábi, el mostra modi ki nu ta ten vida i un korpu ki ka ta straga. 11 N skodjedu pa N ser pregador, apóstlu i instrutor di kes notísia sábi li.
12 Tanbê é pur isu ki N sta ta sufri kes kuza li, má N ka ta fika ku vergónha. Pamodi N konxe Kel ki N ta kridita na el, i N ten serteza ma el ta konsigi proteje tudu kel ki N da-l, ti ki txiga kel dia. 13 Kontinua ta pega na kel modelu* di bons palavra ki bu obi di mi, ku fé i amor ki ta ben di kel union ku Kristu Jizus. 14 Ku ajuda di spritu santu ki ta mora na nos, proteje kel tizoru li ki bu resebe.
15 Bu sabe ma tudu algen na pruvínsia di Ázia afasta di mi, i tanbê Fijelu i Ermójinis. 16 Pa Sinhor mostra mizerikórdia pa família di Onezífru, pamodi el anima-m txeu bês i el ka xinti vergónha pamodi N sta prézu.* 17 Má, kantu el staba na Roma, el djobe-m ku inpenhu i el atxa-m. 18 Pa Sinhor Jeová* mostra-l se mizerikórdia na kel dia. I bu sabe dretu tudu kes trabadju ki el faze na Éfezu.