Primera di Juan

1 Kel ki éra désdi komésu, ki nu obi, ki nu odja ku nos odju, ki nu kontinua ta odja i nu toka ku nos mô, sobri kel palavra di vida, 2 (sin, nu mostradu vida, i nu odja i nu sta ta da tistimunhu i ta pâpia ku nhos sobri kel vida pa tudu ténpu ki staba ku nos Pai i ki nu mostradu) 3 kel ki nu odja i ki nu obi nu sta ta fla nhos tanbê, asi pa nhos pode sta unidu* ku nos. I nu sta unidu ku nos Pai i ku se Fidju Jizus Kristu. 4 Nu sta ta skrebe kes kuza li, asi pa nos alegria ser konplétu.

5 Kel-li é mensajen ki nu obi di el i ki nu sta ta fla nhos: Deus é lus, i ka ten ninhun sukuru na el.* 6 Si nu fla: “Nu sta unidu ku el”, má nu kontinua ta anda na sukuru, nu sta ta konta mintira i nu ka sta ta vive di akordu ku verdadi. 7 Má, si nu sta ta anda na lus sima el mê el sta na lus, nu sta unidu ku kunpanheru, i sangi di Jizus, se Fidju, ta linpa-nu di tudu pekadu.

8 Si nu fla: “Nu ka ten pekadu”, nu sta ta ingana nos kabésa i verdadi ka sta na nos. 9 Si nu konfesa nos pekadu, el é fiel i justu pa purdua-nu nos pekadu i pa linpa-nu di tudu injustisa. 10 Si nu fla: “Nu ka peka”, nu sta ta txoma Deus di mintirozu, i se palavra ka sta na nos.