Jó

1 Na téra di Us, tinha un ómi ki txomaba Jó.* El ka tinha ninhun kulpa i el éra justu. El tinha grandi ruspetu pa Deus i el ka ta fazeba kuzas mariadu. 2 El tinha 7 fidju matxu i três fidju-fémia. 3 El tinha 7 mil ovelha, 3 mil kamelu, mil vaka* i 500 buru.* Tanbê el tinha txeu sérvu. Pur isu, el bira kel ómi más inportanti di ki tudu kes algen di Orienti.

4 Ses fidju tinha kustumu di faze un fésta kada un na se própi kaza, na se dia markadu.* I es ta konvidaba ses três irman pa ba kume i bebe ku es. 5 Dipôs di tudu kes fésta, Jó ta txomaba es pa el santifika-s. Nton, el ta labantaba sédu palmanhan i el ta ofereseba Deus sakrifisiu kemadu pa kada un di es. Pamodi Jó ta flaba: “Talvês nhas fidju peka i es maldísua Deus na ses korason.” Éra si ki Jó ta fazeba sénpri.

6 Txiga kel dia ki kes fidju di Deus verdaderu* entra pa fika dianti di Jeová, i Satanás tanbê entra djuntu ku es.

7 Nton, Jeová pergunta Satanás: “Di undi ki bu ben?” Satanás responde Jeová: “N staba ta da vólta na téra i ta anda na el.” 8 I Jeová fla Satanás: “Bu sta ku odju* na nha sérvu Jó? Ka ten ningen na téra ki é sima el. El é un ómi rétu i justu, ki ten grandi ruspetu pa Deus i el ka ta faze kuzas mariadu.” 9 Nton, Satanás responde Jeová: “É atoa ki Jó ten grandi ruspetu pa Deus? 10 Bu ka poi un sérka di proteson na se vólta, na se kaza i na tudu kuza ki el ten? Bu abênsua trabadju di se mô i se ribanhu sta ta bira txeu na téra. 11 Má gósi, labanta bu mô i mexe na tudu kuza ki el ten, i di serteza el ta maldisua-u na bu própi róstu.” 12 Nton, Jeová fla Satanás: “Odja! Tudu kuza ki el ten sta na bu mô.* Má sô ka bu stika bu mô kóntra el!” Nton, Satanás sai di dianti* di Jeová.

13 Nton, na dia ki kes fidju matxu ku kes fidju-fémia di Jó staba ta kume i ta bebe vinhu na kaza di ses irmon más bédju, 14 txiga un mensajeru i el fla Jó: “Kes boi staba ta trabadja na kanpu i kes buru staba ta kume na ses ladu, 15 kantu kes sabeu ataka-s i leba-s. Tanbê es mata kes sérvu ku spada. É sô mi ki skapa pa ben konta-u.”

16 Timenti inda el staba ta pâpia, txiga otu i el fla: “Lumi di Deus* kai di séu, el kema kes ovelha i el mata kes sérvu! É sô mi ki skapa pa ben konta-u.”

17 Timenti inda el staba ta pâpia, txiga otu i el fla: “Kes kaldeu faze três grupu i es ataka kes kamelu i es leba-s. Tanbê, es mata kes sérvu ku spada. É sô mi ki skapa pa ben konta-u.”

18 Timenti inda el staba ta pâpia, txiga más un i el fla: “Bus fidju matxu ku bus fidju-fémia staba ta kume i ta bebe vinhu na kaza di ses irmon más grandi. 19 Dirapenti, ben un béntu fórti di dizértu i el da na kes kuatu kantu di kaza. Kel kaza kai riba di kes jóven i es móre. I é sô mi ki skapa pa ben konta-u.”

20 Nton Jó labanta, el ratxa se ropa i el rapa se kabésa. Dipôs, el kai na txon, el inbaxa dianti di Deus 21 i el fla:

É Jeová ki da i é Jeová ki toma.

Pa nómi di Jeová kontinua ta lovadu.”

22 Mésmu ki tudu kel-li kontise, Jó ka peka i nen el ka kulpa Deus di faze algun kuza mariadu.