Salmu
Salmu di Davidi.
103 N ta* lova Jeová.
Pa tudu kel ki N ten na mi lova se nómi santu.
2 N ta lova Jeová.
Nunka N ka krê skese tudu kuza ki el faze.
3 El ta púrdua tudu bus éru
I el ta kaba ku tudu bus sufrimentu.*
4 El ta salva bu vida di kóba*
I el ta pô-u se amor lial i mizerikórdia sima un koroa.
5 Duránti tudu bu vida el ta da-u txeu kuza bon,
Asi bu ta fika jóven i ku forsa sima di un ágia.
6 Jeová ta faze kel ki é rétu i justu
Pa tudu algen ki sta ta sufri.
7 El dexa Muizés konxe ses kaminhu,
I el mostra kes fidju di Israel kes kuza ki el faze.
9 El ka ta fika sénpri ta lenbra di nos fadja,
Nen el ka ta guarda rankor pa tudu ténpu.
10 El ka ta trata-nu di akordu ku nos pekadu,
Nen el ka ta kastiga-nu pa nos éru sima nu merese.
11 Pamodi sima séu é más altu di ki téra,
Se amor lial tanbê é grandi pa kes algen ki ten grandi ruspetu pa el.
12 Sima undi sol ta sai sta lonji di undi ki sol ta kanba,
É si ki el ta poi nos pekadu lonji di nos.
13 Sima un pai ta xinti péna* di ses fidju,
Jeová ta xinti péna di kes algen ki ten grandi ruspetu pa el.
14 Pamodi el sabe dretu di kuzê ki nu fazedu,
El ta lenbra ma nos é téra.
15 Vida di algen é kurtu sima di érva.
El ta kria sima flor di kanpu,
16 Má óras ki béntu sopra el ta dizaparse,
Sima si nunka el ka izistiba.*
17 Má amor lial di Jeová pa kes algen ki ten grandi ruspetu pa el
Ta dura pa tudu ténpu,*
I el ta mostra se justisa pa kes fidju di ses fidju,
18 Pa kes algen ki ta kunpri se kontratu
I kes ki ta sforsa pa obi ku ses órdi.
19 Jeová poi se tronu ta fika firmi na séu,
I el ta governa riba di tudu kuza.
20 Pa tudu anju di Jeová ki é fórti i poderozu, lova-l,
Kes ki ta kunpri se palavra i ki sénpri ta obi ku el.*
21 Pa tudu izérsitu di Jeová, lova-l,
Kes ki ta sirbi-l i ki ta faze se vontadi.
22 Pa tudu kriason di Jeová, lova-l,
Na tudu kes lugar ki el ta governa.
N ta lova Jeová di tudu nha alma.*