Salmu
Pa diretor di múzika. Salmu di Davidi.
139 Ó Jeová, bu izamina-m i bu konxe-m.
2 Bu sabe óras ki N ta xinta i óras ki N ta labanta.
Di lonji, bu ta sabe kuzê ki N ta pensa.
3 Bu ta odja-m* óras ki N ta anda i óras ki N ta deta.
Bu sabe dretu tudu kuza ki N ta faze.
4 Ó Jeová, antis di sai un palavra di nha bóka,
Dja bu sabe dretu kuzê ki N sta ba fla.
5 Bu sta na nha vólta, na nha frenti i nha tras,
I bu tene-m pegadu na mô.
6 Kel konhisimentu li é dimás pa N konsigi intende.*
El é altu dimás ki N ka ta konsigi txiga na el.*
7 Pa undi ki N ta baba pa N skapa di bu spritu?
I pa undi ki N ta fujiba di bu róstu?
8 Si N subiba pa séu, bu ta staba la.
I si N detaba na Sipultura,* ti mésmu la bu ta staba tanbê!
9 Si N buaba pa séu faxi sima lus di palmanhan
Pa N ba moraba pértu di kel mar más lonji,
10 Ti mésmu la bu mô ta giaba mi
I bu mô direita ta staba la pa djuda-m.
11 Si N flaba: “Di serteza sukuru ta sukundi-m!”
Nton, noti na nha vólta ta biraba lus.
12 Nen sukuru ka ta sérba sukuru dimás pa bo,
I noti ta sérba klaru sima di dia.
Pa bo, sukuru é sima lus.
14 N ta lova-u pamodi N fazedu di manera spetakular, di manera ki ta pô-m ta ten grandi ruspetu pa bo.
Bus óbra ta dexa algen dimiradu,
N* sabe di kel-li mutu dretu.
15 Nhas osu ka staba sukundidu di bo
Kantu N formadu sukundidu,
Kantu N staba ta kria déntu di bariga di nha mai.*
16 Bus odju odja-m ti mésmu kantu N staba ta forma na bariga di nha mai.*
Tudu párti di nha korpu staba skrebedu na bu livru,
Désdi kes dia ki es formadu.
Es skrebedu antis di kalker un di es izisti.
17 Pur isu, fórti bus pensamentu ten txeu valor pa mi!
Ó Deus, óras ki es djuntadu es é txeu dimás!
18 Si N tenta kontaba es, es ta sérba más txeu di ki gran di areia.
Óras ki N ta korda, inda N ta sta ku bo.*
19 Ó Deus, favor, mata kes algen mau!
Asi kes ómi violéntu* ta afastaba di mi.
20 Kes algen ku mau intenson* ta pâpia kuzas kóntra bo.
Es é bus inimigu, ki ta uza bu nómi atoa.
21 Ó Jeová, pur akazu N ka ta ôdia kes algen ki ta odia-u?
N ka ta xinti noju di kes algen ki ta rabela kóntra bo?
22 Tudu ki N ta xinti pa es é ódiu.
Es bira própi nhas inimigu.
23 Ó Deus, izamina-m i konxe nha korason.
Djobe déntu di mi i konxe nhas preokupason.*
24 Odja si N tene algun tendénsia pa faze kuzas mariadu,
I gia-m na kaminhu ki ta dura pa tudu ténpu.