Primera Timótiu
4 Má, palavra ki ta ben di Deus* ta fla klaru ma na ténpu ki sta pa ben, alguns ta ben disvia di fé, ta presta atenson na mensajen* ki ta ingana i na ensinus di dimónis. 2 Es ta lebadu pa finjimentu di kes ómi ki ta konta mintira i ki ten konsénsia markadu sima ki es marka-l ku féru kenti. 3 Es ta proíbi kazamentu i es ta manda pa pesoas ka seta alguns kumida, má Deus kria kes kumida pa kes ki ten fé i ki konxe verdadi di manera izatu, pode kume-s i agradese Deus. 4 Pamodi tudu kuza ki Deus kria é bon i nu ka debe nega nada si el resebedu ku orason di agradesimentu, 5 pamodi el ta santifikadu pa palavra di Deus i pa orason.
6 Óras ki bu ta da kel konsedju li pa irmons, bu ta ser un bon sérvu* di Kristu Jizus, trenadu ku kes palavra di fé i ku kel bon ensinu ki bu sta ta sigi di manera fiel. 7 Pur isu, nega kes stória falsu i ki ta dizonra Deus, sima kes ki mudjeris grandi ta konta. Má, trena bu kabésa ku obijetivu di adora Deus. 8 Pamodi izersísiu* fíziku ta djuda na algun kuza, má adorason pa Deus ta djuda na tudu kuza, pamodi el ten promésa di vida gósi i tanbê di kel vida ki sta pa ben. 9 Kes palavra li é di kunfiansa i es merese pa nu seta-s di tudu korason. 10 É pur isu ki nu ta trabadja duru i nu ta sforsa, pamodi nu poi nos speransa na un Deus bibu, ki é Salvador di tudu tipu di algen, prinsipalmenti di kes ki é fiel.
11 Kontinua ta da kes órdi li i ta inxina-s. 12 Nunka ka bu dexa ningen dispreza-u sô pamodi bo é jóven. Má, bira un izénplu pa kes ki é fiel na bu manera di pâpia, na konportamentu, na amor, na fé i na puréza. 13 Timenti N ka txiga, kontinua ta sforsa na bu leitura pa públiku, na da konsedju* i na inxina. 14 Ka bu dexa di kuida di kel don ki bu ten i ki bu dadu através di un profesia kantu grupu di ansions poi mô riba bo. 15 Pensa* na kes kuza li, konsentra txeu na es, asi pa tudu algen odja klaru bu prugrésu. 16 Presta sénpri atenson na bo mê i na bu manera di inxina. Kontinua ta sforsa pa faze kes kuza li, pamodi si bu faze si, bu ta salva bu kabésa i tanbê kes ki ta obi-u.