Primera Timótiu

5 Ka bu pâpia duru ku un ómi ki dja sta di idadi. Má, da-l konsedju ku bondadi sima un pai, kes ómi ki é jóven sima irmons, 2 kes mudjer di idadi sima mai, kes mudjer ki é jóven sima irmans, ku tudu puréza.

3 Mostra konsiderason pa* kes viúva ki é própi viúva.* 4 Má si algun viúva ten fidjus ô nétus, primeru pa es prende mostra ma es ta adora Deus na ses própi família, i paga ses mai ku ses pai i ses avó kuzê ki es debe-s, pamodi kel-li ta dexa Deus kontenti. 5 Un mudjer ki é própi viúva i ki sta dizanparadu ta poi se speransa na Deus i el ta kontinua ta inplora* i ta faze orason dia ku noti. 6 Má kel viúva ki ta vive sô pa satisfaze se dizeju* dja sta mortu enbóra el sta bibu. 7 Pur isu, kontinua ta da-s kes instruson* li, asi pa es pode atxadu sen kulpa. 8 Si un algen ka ta kuida di kes ki é di sel, i prinsipalmenti di kes ki ta faze párti di se família, é pamodi el nega fé i el é piór di ki un algen sen fé.

9 Un viúva debe podu na lista si el ten peloménus 60 anu, si el éra mudjer sô di un maridu, 10 si el é konxedu pa se bons óbra, si el kria se fidjus, si el ta gostaba di resebe otus, si el ta lababa pé di kes santu, si el ta djudaba kes ki staba ku prubléma i si el ta inpenhaba pa tudu bon óbra.

11 Má, ka bu poi kes viúva más jóven na lista, pamodi óras ki ses dizeju seksual fika entri es i Kristu, es ta krê kaza. 12 I es ta bira kulpadu pamodi es bandona ses promésa ki es fazeba antis.* 13 Tanbê, omésmu ténpu es ta kria ábitu di fika sen nada faze i ta anda di un kaza pa kel otu. Alén di es fika sen nada faze, tanbê es ta bira papiadera i es ta fika ta mete na asuntus di otus algen, ta pâpia di kuzas ki es ka debe. 14 Pur isu, N ta dizeja pa kes viúva más jóven kaza, pa es ten fidju, pa es kuida di un kaza, asi pa es ka da inimigu ninhun xansi pa kritika. 15 Na verdadi, alguns dja disviadu pa sigi Satanás. 16 Má, si un mudjer krenti ten família ki é viúva, pa el djuda-s, asi pa ka podu kel karga li riba di kongregason. Di kel manera li, kongregason ta pode djuda kes ki é própi viúva.*

17 Kes ansion ki ta orienta* kongregason dretu, debe tratadu ku grandi ruspetu, prinsipalmenti kes ki ta trabadja duru na pâpia i na inxina. 18 Pamodi Skrituras ta fla: “Ka bu tapa toru bóka timenti el sta digudja”,* tanbê el ta fla: “Trabadjador merese se pagamentu.” 19 Ka bu seta un akuzason kóntra un ansion, sô si ten tistimunhu di dôs ô três algen. 20 Koriji* na frenti di tudu algen kes ki ta kontinua ta faze pekadu, asi pa sirbi di avizu pa kes otu.* 21 N ta da-u órdi, dianti di Deus, di Kristu Jizus i di kes anju ki el skodje, pa bu sigi kes instruson li sen prekonseitu i trata tudu algen igual.

22 Ka bu ten présa na poi mô riba di ninhun ómi,* nen ka bu partisipa na pekadu di otus algen. Mante puru.

23 Ka bu bebe agu más,* má bebe un bokadinhu di vinhu pamodi bu stômagu i pamodi bu ta duense txeu.

24 Pekadu di alguns ómi é konxedu pa tudu algen, i el ta leba-s dirétu pa julgamentu, má kes di otus ómi ta odjadu más tardi. 25 Tanbê, di mésmu manera, kes bon óbra é konxedu pa tudu algen i mésmu óras ki es é ka konxedu es ka ta pode kontinua sukundidu.