Salmu
TIRSERU LIVRU
(Salmus 73-89)
Un múzika di Azafe.
73 Deus ta faze kuzas bon pa Israel, pa kes ki ten korason puru.
2 Má ami, nha pé staba kuazi ta disvia,
Faltaba poku pa N skorega.
3 Pamodi N fika ku invéja di kes algen orgulhozu,
Kantu N odja pas di kes algen mau.
4 Pamodi es ta móre sen xinti dór,
Es ten bon saúdi.*
5 Es ka ten prubléma ki otus algen ten,
Nen es ka ta sufri sima otus algen.
6 Pur isu, orgulhu é sima ses kolar.
Violénsia é sima ropa ki es ta bisti.
7 Gordura di ses róstu* ta poi ses odju ta sai pa fóra,
I ses susésu é más di ki kel ki es ta imajina.
8 Es ta faze trósa i es ta fla kuzas mariadu.
Ku orgulhu es ta amiasa i maltrata otus algen.
9 Es ta ingaba pamodi es ta pensa ma es é altu sima séu,
Es ta anda na téra ta pâpia kuzê ki es krê.
10 Nton, povu di Deus* ta sigi-s,
I es ta bebe kes agu ki es ten txeu.
11 Es ta fla: “Modi ki Deus pode sabe?
Pur akazu, kel Deus Más Grandi sabe tudu kuza?”
12 Sin, kes-li é kes algen mau, ki sénpri ten vida fásil.
Es ta kontinua ta djunta kada bês más rikéza.
13 Sta klaru ma é atoa ki N mante nha korason puru
I N laba nha mô pa N mostra ma mi é inosenti.
14 Dia interu N ta staba ku prubléma.
N dadu kastigu tudu palmanhan.
15 Má si N flaba kes kuza ki N staba ta pensa,
N ta traíba bu povu.*
16 Kantu N tenta intende kel-li,
N fika perturbadu
17 Ti ki N entra na kel grandi santuáriu di Deus
I N intende ses futuru.
18 Na verdadi, bu ta pô-s na un txon ki ta skorega.
Bu ta pô-s ta kai na disgrasa.
19 Dirapenti es ta distruídu!
Dirapenti es ta sufri disgrasa i es ta móre!
20 É sima un sonhu ki algen ta skese óras ki el korda,
Ó Jeová, é kel-li ki ta ben kontise ku es óras ki bu labanta pamodi bu ta ben nega-s.*
21 Má nha korason staba xeiu di disgostu,
I N staba ta xinti un dór fórti déntu di mi.*
22 N ka staba ta pensa dretu i N ka ta intendeba nada.
Dianti di bo ami éra sima un animal ki ka ta pensa.
23 Má gósi N sta sénpri ku bo.
Bu pega-m na nha mô direita.
24 Bu ta gia-m ku bus konsedju,
I dipôs bu ta fika kontenti ku mi.*
25 Kenha más ki N ten na séu?
Alén di bo, N ka krê más nada na téra.
26 Nha korpu i nha korason pode bira fraku,
Má Deus é rótxa di nha korason i nha párti* pa tudu ténpu.
27 Na verdadi, kes ki ta fika lonji di bo ta móre.
Bu ta kaba ku* tudu kes ki bira infiel* pa bo.
28 Má pa mi, txiga pértu di Deus é bon pa mi.
N ta djobe proteson na Jeová, kel Sinhor Más Grandi,
Pa N konta otus algen tudu kuza ki el faze.