Sugunda Koríntius
3 Nu sta kumesa ta rekumenda nos kabésa otu bês? Ô sima alguns ómi, nu meste di kartas di rekumendason, pa nhos ô di nhos? 2 Anhos é nos karta, ki skrebedu na nos korason, ki tudu algen ta konxe i ta lé. 3 Pamodi sta klaru ma nhos é un karta di Kristu, ki nos ki é sérvus* di Deus skrebe. Nu ka skrebe-l ku tinta, má ku spritu di un Deus bibu. Nu ka skrebe-l na tábuas di pédra, má na tábuas di karni, na korason.
4 Nu ten kel kunfiansa li na Deus através di Kristu. 5 Nu ka sta fla ma nu ta konsigi faze kel trabadju li di nos pa nos, má Deus é kel ki ta djuda-nu faze kel trabadju li. 6 El ki ta kualifika-nu pa nu ser sérvus* di kel kontratu novu. Nos é ka sérvus di lei, má nu ta sirbi spritu. Pamodi lei ta kondena algen pa mórti, má spritu ta da algen vida.
7 Nton, si kel lei ki ta kondena algen pa mórti i ki gravadu ku létra na pédra, ben ku tantu glória ki fidjus di Israel ka ta pode odjaba pa róstu di Muizés pamodi glória di se róstu, un glória ki ta binha kabadu ku el, 8 nton kel manera ki spritu ta dadu ka devia ten más glória inda? 9 Si kel lei ki ta kondena algen pa móre ten glória, kel trabadju ki ta poi algen ta ser justu ten mutu más glória inda! 10 Na verdadi, ti mésmu kel ki antis fazedu ku glória, perde se glória pamodi kel glória ki é más ki el. 11 Pamodi si kel ki ta binha kabadu ku el trazedu ku glória, kel ki ta fika pa tudu ténpu ta ten mutu más glória inda!
12 Dja ki nu ten kel speransa li, nu ta pâpia ku tudu kunfiansa, 13 i nu ka ta faze sima Muizés, ki ta kubriba róstu ku un véu pa fidjus di Israel ka djobeba pa kel ki ta binha kabadu ku el. 14 I ti dia di oji, óras ki kel kontratu antigu ta ledu, es ta kontinua sima ki es tene kel véu, dja ki el ta tradu sô ku ajuda di Kristu. 15 Na verdadi, ti dia di oji, óras ki ta ledu kes livru di Muizés, un véu ta kubri ses korason. 16 Má óras ki un algen ta volta pa Jeová,* kel véu ta tradu. 17 Jeová* é spritu, i na undi ki spritu di Jeová* sta, la ten liberdadi. 18 I nos tudu, nu sta ku róstu diskubértu ta mostra glória di Jeová* sima un spedju. Timenti nu sta faze kel-li, tanbê nu sta ser transformadu pa nu ser sima se imajen, ta mostra kada bês más glória,* izatamenti sima Jeová,* ki é Spritu,* sta ta transforma-nu.