Romanus
7 Irmons, N sta pâpia pa kes ki konxe lei: nhos ka sabe ma Lei ta manda na ómi timenti el sta bibu? 2 Pur izénplu, di akordu ku lei, un mudjer kazadu sta maradu na se maridu timenti el sta bibu. Má si se maridu móre, el ta fika livri di lei di se maridu. 3 Pur isu, si el bira di otu ómi timenti se maridu sta bibu, el ta faze adultériu. Má si se maridu móre, el ta fika livri di se lei i el ka ta faze adultériu si el bira di otu ómi.
4 Asi, nhas irmon, di akordu ku Lei, nhos tanbê nhos móre através di korpu di Kristu, pa nhos pode bira di otu algen, kel ki resusitadu.* Gósi nu pode ser uzadu pa sirbi Deus.* 5 Kantu nu ta viveba di akordu ku dizeju di karni, Lei mostra klaru, ma kel dizeju mariadu di karni ta poi nos korpu* ta peka, i kel pekadu ta leba-nu pa mórti. 6 Má gósi nu libertadu di Lei, pamodi nu móre pa kel ki teneba nos prézu, pa nu pode ser skravu, ka di kel manera bédju através di kes kuza ki sta skrebedu na Lei, má di kel manera novu através di spritu.
7 Nton, kuzê ki nu ta fla? Lei é pekadu? Klaru ki nau! Na verdadi, si ka éra Lei N ka ta konxeba pekadu. Pur izénplu, N ka ta sabeba ma é mariadu dizeja kuzas di otus algen si Lei ka flaba: “Bu ka debe dizeja kuzas di otus algen.”* 8 Má pekadu uza kel mandamentu li pa kria na mi tudu tipu di dizeju di karni, pamodi sen lei pekadu staba mortu. 9 Na verdadi, antis N staba bibu sen lei. Má kantu kel mandamentu txiga, pekadu pasa ta vive, má ami N móre. 10 I N diskubri ma kel mandamentu ki devia lebaba mi pa vida, na verdadi ta lebaba mi pa mórti. 11 Pekadu uza kel mandamentu li pa ingana-m i pa mata-m. 12 Di tudu manera, Lei é santu, i kel mandamentu é santu, justu i bon.
13 Nton, kel-li krê fla ma un kuza bon mata-m? Klaru ki nau! Má é pekadu ki mata-m. Através di kes kuza ki é bon, pekadu pô-m ta móre pa mostra kuzê ki é pekadu, i lei mostra modi ki pekadu ta prujudika algen. 14 Pamodi nu sabe ma Lei é spritual, má ami é karnal, i N bendedu sima skravu pa pekadu. 15 Pamodi N ka ta intende kuzê ki N sta ta faze. Pamodi N ka ta faze kel ki N krê, má N ta faze kel ki N ta ôdia. 16 Má si N ta faze kel ki N ka krê, N ta konkorda ma Lei é bon. 17 Má é ka mi más ki sta faze-l, má é kel pekadu ki ta mora na mi. 18 Pamodi N sabe ma na mi, kel-li krê fla, na nha karni, ka ta mora nada di bon. Enbóra N ta krê faze kel ki é dretu, N ka ta konsigi faze-l. 19 Pamodi N ka ta faze kes kuza dretu ki N krê, má kes kuza mariadu ki N ka krê é kel ki N ta faze. 20 Nton, si N ta faze kel ki N ka krê, é ka mi más ki sta ta faze-l, má é pekadu ki sta mora na mi.
21 Nton, N da kónta ma na nha kazu ta izisti kel lei li: óras ki N krê faze kel ki é dretu, kel ki é mariadu sta déntu di mi. 22 Déntu di mi N ta ama lei di Deus própi, 23 má N ta odja na nha korpu* otu lei ta briga kóntra lei di nha menti i ta leba-m prézu pa lei di pekadu ki sta na nha korpu.* 24 Ómi mizeriadu ki mi é! Ken ki ta libra-m di es korpu ki sta ta pô-m ta móre? 25 N ta agradese Deus através di Jizus Kristu, nos Sinhor! Nton, ku nha menti ami é skravu di lei di Deus, má ku nha karni ami é skravu di lei di pekadu.