Filemon

1 Di Paulu, ki sta prézu pamodi Kristu Jizus, i di nos irmon Timótiu, pa Filemon, nos kunpanheru di trabadju ki nu gosta txeu, 2 pa nos irman Áfia, pa Arkipu, ki é nos kunpanheru di luta, i pa kel kongregason ki ta djunta na bu kaza:

3 Pa Deus, nos Pai, i pa Sinhor Jizus Kristu mostra nhos grandi bondadi i da nhos pas.

4 Sénpri N ta agradese nha Deus óras ki N ta pâpia di bo na nhas orason, 5 pamodi N sta obi txeu algen ta pâpia di bu fé i di amor ki bu ten pa Sinhor Jizus i pa tudu kes santu. 6 N ta ora pa kel fé ki nu ten pô-u ta seta tudu kes kuza dretu ki nu ten pamodi Kristu. 7 Nha irmon, N fika txeu kontenti i konsoladu kantu N obi ta papiadu di bu amor, pamodi bu anima korason di kes santu.

8 Pur isu, enbóra Kristu da-m tudu liberdadi pa N manda-u faze kel ki é dretu, 9 N ta prifiri pidi-u ku amor, pamodi ami Paulu, dja N sta un ómi bédju i tanbê gósi N sta prézu pamodi Kristu Jizus. 10 N ta pidi-u pa Onézimu, nha fidju, ki N bira se pai kantu N staba na kadia.* 11 Antis el ka tinha sirbintia pa bo, má gósi el ta sirbi pa mi i pa bo. 12 N sta manda-u el otu bês. El é un algen ki N krê txeu.

13 N ta gostaba pa el fikaba li ku mi, asi pa el sirbiba mi na bu lugar, timenti N sta prézu pamodi kes notísia sábi. 14 Má, N ka krê faze nada ki bu ka ta konkorda ku el, asi pa bu faze-m es favor ka pamodi abo é obrigadu, má pamodi bu krê. 15 Talvês é pur isu ki el fuji di bo pa poku ténpu,* asi pa bu torna fikaba ku el pa tudu ténpu, 16 ka sima un skravu, má mutu más di ki un skravu, sima un irmon ki gostadu txeu di el. N gosta txeu di el, má abo bu gosta di el mutu más inda, sima un skravu i tanbê sima un irmon na Sinhor. 17 Nton, si bu ta atxa ma mi é bu amigu,* resebe-l dretu sima si éra mi. 18 Tanbê, si el faze-u algun kuza mariadu ô el debe-u algun kuza, pô-l na nha kónta. 19 Ami Paulu, N sta skrebe-u kel karta li ku nha mô i N ta promete-u ma N ta paga-u tudu kes kuza ki Onézimu sta ta debe-u. I ka bu skese ma bu debe-m ti bu vida. 20 Sin, nha irmon, faze-m es favor pamodi Sinhor. Anima nha korason pamodi Kristu.

21 N ten serteza ma bu ta faze kuzê ki N sta pidi-u. Pur isu, N sta skrebe-u pamodi N sabe ma bu ta faze mutu más ki kel ki N sta ta fla. 22 Má tanbê, pripara un lugar pa N fika, pamodi N ten speransa ma grasas-a nhos orason, N ta volta pa nhos.*

23 Epafras, ki sta prézu sima mi pamodi Kristu Jizus, sta manda-u mantenha. 24 I tanbê Markus, Aristarku, Demas i Lukas, ki é nhas kunpanheru di trabadju, sta manda-u mantenha.

25 Pa kel grandi bondadi di Sinhor Jizus Kristu sta ku kel spritu* ki nhos ta mostra.