Atus

18 Dipôs di kel-li, el sai di Atenas i el bai pa Korintu. 2 I el atxa un judeu ki txomaba Ákila, ki éra di Pontu, ki tinha poku ténpu ki el txigaba di Itália ku se mudjer Prisila, pamodi Kláudiu daba órdi pa tudu judeu saíba di Roma. Nton, el ba djobe-s. 3 I dja ki es tinha mésmu profison, el fika na ses kaza i el trabadja ku es, pamodi es ta fazeba ténda. 4 Tudu sábadu, el ta fazeba un diskursu* na sinagóga i el ta konvenseba kes judeu i kes gregu.

5 Kantu Silas ku Timótiu dixi di Masedónia, Paulu kumesa ta uza tudu se ténpu ta prega palavra di Deus, ta prova pa kes judeu ma Jizus é Kristu. 6 Má dja ki es kontinua kóntra el i ta insulta-l, el sakudi se ropa i el fla-s: “Anhos é responsável pa nhos mórti.* N ka ten kulpa. Di gósi pa dianti, N ta bai pa kes algen di nason.” 7 Nton, el sai di la* i el entra na kaza di un ómi ki txomaba Tísiu Justu, ki ta adoraba Deus. Se kaza ta fikaba na ladu di sinagóga. 8 Má Krispu, prizidenti di sinagóga, bira ta kridita na Sinhor, djuntu ku tudu algen di se kaza. I txeu algen di Korintu ki obiba kel mensajen bira ta kridita i es batizadu. 9 Tanbê na un vizon di noti, Sinhor fla Paulu: “Ka bu ten medu, má kontinua ta pâpia i ka bu fika kaladu, 10 pamodi N sta ku bo i ningen ka ta ataka-u pa faze-u mal. Pamodi N tene txeu algen na kel sidadi li.” 11 Nton, el fika la un anu i meiu ta inxina-s palavra di Deus.

12 Timenti Gáliu éra governador* di Akaia, kes judeu djunta pa ataka Paulu i es leba-l pa tribunal, 13 ta fla: “Kel ómi li sta ta konvense pesoas pa adora Deus di un manera ki ta bai kóntra lei.” 14 Má kantu Paulu staba ta ba pâpia, Gáliu fla kes judeu: “Ó judeus, si kel ómi li fazeba algun kuza mariadu ô un krimi gravi, N ta tinha motivu pa N obiba nhos ku paxénxa. 15 Má dja ki nhos diskuson é sobri palavras, sobri nómis i sobri nhos própi lei, kel-la é la ku nhos. N ka krê ser juís di kes kuza li.” 16 Pur isu, el bota-s fóra di tribunal. 17 Nton, es tudu pega Sóstinis, ki éra prizidenti di sinagóga, i es sota-l na frenti di tribunal. Má Gáliu ka krê meteba na kes kuza li.

18 Dipôs ki Paulu pasa txeu dia la, el dispidi di kes irmon i el viaja di barku pa Síria, djuntu ku Prisila i Ákila. Na Senkrea, el korta kabelu baxu, pamodi el fazeba un promésa. 19 Nton, es txiga na Éfezu, i el dexa-s la, má el entra na sinagóga i el rasusina ku kes judeu. 20 Enbóra es pidi-l pa el fika pa más ténpu, el ka seta 21 má el dispidi di es i el fla-s: “Si Jeová* krê, N ta torna ben pa li.” Nton, el toma barku na Éfezu 22 i el dixi ti Sezarea. El subi* i el kunprimenta kongregason, i dipôs el dixi pa Antiokia.

23 Dipôs ki el pasa algun ténpu la, el viaja di un lugar pa kel otu na Galásia i na Fríjia, ta da tudu kes disiplu forsa.

24 Un judeu ki txomaba Apolu, ki nase na Alixandria, txiga na Éfezu. El éra un ómi ki tinha don di pâpia i el konxeba Skrituras dretu. 25 Kel ómi li inxinadu na kaminhu di Jeová,* i xeiu di zelu pamodi spritu, el ta papiaba i el ta inxinaba sobri Jizus di manera izatu, má el konxeba sô batismu di Juan. 26 El kumesa ta pâpia ku koraji na sinagóga, i kantu Prisila i Ákila obi-l, es leba-l apárti i es splika-l kaminhu di Deus di manera más izatu. 27 I dja ki el krê baba pa Akaia, kes irmon skrebe pa kes disiplu, ta pidi-s pa es resebe-l dretu. Nton, kantu el txiga la, el da txeu ajuda pa kes ki bira krenti pamodi kel grandi bondadi di Deus, 28 dja ki na públiku i ku koraji, el ta provaba kes judeu ma es staba eradu, ta mostra-s na Skrituras ma Jizus é Kristu.