Juízis

4 Má dipôs ki Eúde móre, kes israelita torna faze kes kuza ki Jeová ta atxaba ma éra mariadu. 2 Pur isu, Jeová intrega-s* na mô di Jabin, rei di Kanan, ki ta governaba na Azor. Xéfi di izérsitu di Jabin txomaba Sízera, i el ta moraba na Arozete di nasons.* 3 Jabin* tinha 900 karu di géra ku foisi di féru na róda,* i dja el tinha 20 anu ta maltrataba israelitas. Pur isu, kes israelita inplora Jeová pa djuda-s.

4 Na kel ténpu, Débura, ki éra profetiza i mudjer di Lapidote, ta julgaba Israel. 5 El ta kustuma xintaba baxu di pé di palmera di Débura ki ta fikaba entri Ramá i Betel, na kes zóna di Efrain ki ten montanha. Kes israelita ta ba djobeba Débura pa es sabeba sobri kes julgamentu di Deus. 6 Un dia, Débura manda txoma Baraki, fidju di Abinoan, di Kedes-Naftali, i el fla-l: “Jeová, Deus di Israel, sta ta da-u kel órdi li: ‘Bai ti* monti Tabor i leba 10 mil ómi di tribu di Naftali i di tribu di Zebulon djuntu ku bo. 7 N ta poi Sízera, xéfi di izérsitu di Jabin, djuntu ku ses karu di géra i ses trópa ta ben atxa-u na riu* Kizon, i N ta intrega-l na bu mô.’”

8 Má Baraki fla Débura: “Si bu bai ku mi, N ta bai, má si bu ka bai ku mi, N ka ta bai.” 9 El responde: “N ta bai ku bo. Má es géra ka ta ben traze-u glória, pamodi Jeová ta ben intrega Sízera na mô di un mudjer.” Nton, Débura labanta i el bai ku Baraki pa Kedes. 10 Baraki manda txoma tribu di Zebulon i tribu di Naftali pa ben pa Kedes, i 10 mil ómi sigi-l. Débura tanbê bai djuntu ku Baraki.

11 Má Éber, kel kineu, dja siparaba di kes otu kineu, kes disendenti di Obabe. Obabe éra sogru di Muizés. Se ténda staba armadu pértu di un arvi grandi na Zananin, ki ta fika na Kedes.

12 Es fla Sízera ma Baraki, fidju di Abinoan, dja subiba pa monti Tabor. 13 Kel óra, Sízera djunta tudu ses karu di géra. El tinha 900 karu ku foisi di féru na róda. Tanbê, el djunta tudu ses trópa i es bai di Arozete di nasons ti riu Kizon. 14 Nton, Débura fla Baraki: “Bai, pamodi é na kel dia li ki Jeová ta ben intrega Sízera na bu mô. É ka Jeová ki sta bai na bu frenti?” I Baraki dixi di monti Tabor ku 10 mil ómi ki staba ta bai se tras. 15 Dipôs, Jeová poi Sízera, tudu kes kondutor di ses karu di géra i tudu ses trópa ta fika ku medu i dizorientadu dianti di spada di Baraki. Nton, Sízera dixi di se karu i el fuji apé. 16 Baraki pirsigi kes karu di géra i kes trópa ti Arozete di nasons. Asi, tudu kes trópa di Sízera móre. Ninhun di es ka skapa.

17 Má Sízera fuji apé pa ténda di Jael, mudjer di Éber, kel kineu, pamodi Jabin, rei di Azor, i família di Éber staba na pas. 18 Jael sai pa ba inkontra ku Sízera i el fla-l: “Nho ben, nho entra li. Ka nho ten medu.” Nton, el entra na ténda di Jael i Jael kubri-l ku un kubérta. 19 Sízera fla-l: “Favor, da-m un bokadinhu di agu pa N bebe, pamodi N tene sedi.” Nton, Jael abri un bólsa di péli* ki tinha leti i el da-l pa el bebe, dipôs el torna kubri Sízera. 20 Sízera fla-l: “Fika na entrada di ténda. Si algun algen ben i pergunta-u: ‘Sta algun ómi li?’ Fla-l: ‘Nau!’”

21 Má Jael, mudjer di Éber, panha un staka di ténda i un martélu. Timenti Sízera staba kansadu dimás i ta durmi un sónu pizadu, Jael bai kétu i el finka-l kel staka na kabésa* i el da-l ku martélu ti entra na txon, i Sízera móre.

22 Baraki bai la pa ba djobe Sízera, i Jael sai pa ba inkontra ku el i el fla-l: “Ben i N ta mostra-u kel ómi ki bu sta ta djobe.” El entra djuntu ku Jael i el odja Sízera detadu mortu, ku kel staka na kabésa.

23 Na kel dia, Deus djuda israelitas ganha Jabin, rei di Kanan. 24 Kes israelita kontinua ta luta kada bês más duru kóntra Jabin, rei di Kanan, ti ki es kaba ku el.