Deuteronómiu
32 “Ó séu, nhos obi, i N sta ben pâpia,
I pa téra obi kes palavra di nha bóka.
2 Kes kuza ki N ta inxina ta ben kai sima txuba.
Nhas palavra ta ben ser sima orbadju,
Sima txuba mansu na rélva
I sima txeu txuba na planta.
3 Pamodi N sta ba pâpia di nómi di Jeová.
Nhos pâpia sobri modi ki nos Deus é grandi!
4 El é kel Rótxa, tudu ki el ta faze é perfeitu,
Pamodi tudu ses kaminhu é justu.
El é un Deus fiel, ki nunka é ka injustu.
El é justu i rétu.
5 É es ki aji di manera mariadu.
Es é ka ses fidju, difeitu é di ses.
Es é kel jerason mau i ki ta ingana algen!
6 É si ki nhos debe trata Jeová,
Ó povu tolu i sen juís?
É ka el ki é bu Pai i ki pô-u ta izisti,
Kel ki faze-u i pô-u ta fika firmi?
7 Lenbra di kes ténpu antigu.
Pensa na kes anu di kes jerason ki dja pasa.
Pergunta bu pai i el ta konta-u.
Pergunta kes ansion na bu meiu i es ta fla-u.
8 Kantu kel Más Grandi da kada nason ses eransa,
Kantu el sipara kes fidju di Adon di kunpanheru,
El poi limiti pa kada povu,
Di akordu ku nunbru di kes fidju di Israel.
9 Pamodi povu di Jeová é se párti.
Jakó é se eransa.
10 El atxa-l na un téra dizértu
Na un dizértu vaziu, ku barudju di animal selvajen.
El serka-l pa el proteje-l, el kuida di el,
I el proteje-l sima minina di se odju.*
11 Sima ágia ta inxina ses fidju bua,
El ta fika pa riba di ses fidju,
I el ta stika ses aza pa panha-s,
El ta karega-s na ses péna,
12 Sô Jeová ki staba ta gia-l,*
Ninhun deus stranjeru ka staba ku el.
13 El pô-l ta kontrola kes lugar altu di téra,
Asi el kume kes kodjéta di kanpu.
I el da-l mel di un rótxa
I azeti di un rótxa pa el kume,
14 Ku mantega di vaka i leti di ovelha,
Djuntu ku kes midjór* ovelha,
I karneru di Bazan i bódi,
Djuntu ku kel midjór* trigu,
I bu bebe vinhu di sumu* di uva.
15 Kantu Jezurun* ingorda, el rabela i el da koxi.*
Sin, bu ingorda, bu fika fórti i bu fika fartu.
Pur isu el bandona Deus, ki faze-l,
I el dispreza kel Rótxa di se salvason.
16 Es pô-l ta fika txeu xatiadu pamodi kes deus stranjeru,
Es ofende-l ku kes kuza nojéntu.
17 Es ka oferese sakrifisius pa Deus, má pa dimónis,
Pa kes deus ki es ka konxeba,
Kes novu ki ka ten txeu ténpu ki parse,
Pa kes deus ki nhos gentis grandi ka konxeba.
18 Bu skese di kel Rótxa ki é bu pai,
I bu ka lenbra di kel Deus ki da-u vida.*
19 Kantu Jeová odja kel-li, el nega-s
Pamodi ses fidju matxu i ses fidju-fémia ofende-l.
20 Pur isu el fla: ‘N ta sukundi nha róstu di es;
N ta odja kuzê ki ta kontise ku es.
Pamodi es é un jerason mau,
Es é fidjus infiel.
21 Es pô-m ta fika txeu xatiadu* pamodi un kuza ki é ka deus;
Es ofende-m ku ses imajen ki ka bale nada.
Pur isu, N ta ben uza kes ki é ka un povu pa N pô-s ta xinti siumis.
N ta ofende-s ku un nason ki ka ten juís.
22 Pamodi nha raiba sende un lumi
Ki ta kema ti fundu di Sipultura,*
El ta kaba ku téra i ku kuzas ki el ta da
I el ta kema kes alisérsi di monti.
23 N ta poi ses disgrasa ta bira txeu,
N ta uza nhas flexa kóntra es.
24 Es ta fika fraku pamodi fómi
I fébri altu ta kaba ku es i es ta distruídu tudu.
N ta manda kes denti di kes animal selvajen kóntra es
I venénu di kes animal ki ta rasta na txon.
25 Fóra di ses kaza, spada ta mata ses fidju.
Déntu di ses kaza, medu ta toma kónta di es
Tantu kes jóven i tanbê kes vírjen,
Kes mininu pikinoti i tanbê kes ómi ku kabelu branku.
26 N pode flaba: “N ta spadja-s,
N ta poi pesoas ka ta lenbra di es más”,
27 Má N staba preokupadu ku kuzê ki ses inimigu ta flaba,
Pamodi ses inimigu pode intendeba mariadu.
Es pode flaba: “É na nos própi forsa ki nu vense,
É ka Jeová ki faze tudu kel-li.”
28 Pamodi es é un nason ki ka ten bon juís,*
I es ka ta konsigi intende.
29 Dja N kreba pa es tinha sabedoria! Es pode miditaba na kel-li.
Es pode pensaba na kuzê ki ta ben kontiseba ku es.
30 Modi ki un ómi pode pirsigi mil,
I dôs ómi poi 10 mil ta fuji?
Es ka ta podeba, anonser si ses Rótxa bendeba es
I Jeová intregaba es pa ses inimigu.
31 Pamodi ses rótxa é ka sima nos Rótxa,
Ti mésmu nos inimigu intende kel-li.
32 Pamodi ses plantason di uva é di plantason di uva di Sudoma
I di kes kanpu di Gumora.
Ses uva é uva venenozu,
Ses katxu é margós.
33 Ses vinhu é venénu di kóbra,
Kel venénu di kóbra prigozu ki ta mata.
34 Tudu kel-li ka sta guardadu ku mi,
Seladu na nha armazén?
35 Vingansa i kastigu é di meu,
Na ténpu markadu, óras ki ses pé skorega,
Pamodi dia di ses disgrasa sta pértu,
I kuzê ki sta spera-s ta ben faxi.’
36 Jeová ta ben julga se povu,
I el ta ben xinti péna di ses sérvu,
Óras ki el odja ma ses forsa dja bira poku,
I ma fika sô kes ki é dizanparadu i fraku.
37 Nton el ta fla: ‘Undi ki ses deus sta,
Kel rótxa ki es djobe proteson na el,
38 Kes ki ta kumeba gordura di ses sakrifisiu,*
I ta bebeba vinhu di ses oférta di bebida?
Pa es labanta i pa es djuda nhos.
Pa es bira nhos proteson.
39 Odja gósi ma mi é Deus
I ka ten otus deus fóra mi.
N ta mata i N ta da vida.
N ta fri i N ta kura,
I ka ten ningen ki ta konsigi libra algen di nha mô.
40 Pamodi N ta labanta nha mô pa séu,
I N ta jura: “Pa nha vida ki ta dura pa tudu ténpu”,
41 Óras ki N mola nha spada ki ta brilha
I N pripara nha mô pa julgamentu,
N ta vinga di nhas inimigu
I N ta kastiga kes ki ta odia-m.
42 N ta poi nhas flexa ta fika moku ku sangi,
I nha spada ta kume karni,
Ku sangi di kes ki matadu i di kes prézu,
Ku kes kabésa di kes xéfi di inimigu.’
43 Nasons, nhos fika kontenti ku se povu,
Pamodi el ta vinga sangi di ses sérvu,
El ta vinga di ses inimigu
I el ta purifika* téra di se povu.”
44 Nton, Muizés bai i el fla tudu kes palavra di kel kántiku dianti di povu, el i Ozeias,* fidju di Nun. 45 Dipôs ki Muizés kaba di fla tudu kes palavra li pa Israel interu, 46 el fla-s: “Nhos pensa na tudu kes avizu ki N da nhos oji, asi pa nhos manda nhos fidju pa kunpri tudu kes palavra di kel Lei li. 47 Pamodi pa nhos kes-li é ka palavras ki ka ten valor, má es ta siginifika vida pa nhos, i através di kes palavra li, nhos pode vive pa txeu ténpu na kel téra ki nhos ta ben toma óras ki nhos trabesa riu Jurdon.”
48 Jeová fla Muizés na kel mésmu dia: 49 “Bai pa kes montanha di Abarin, na téra di Moabe, ki ta fika frenti di Jerikó, i bu subi monti Nebu. Djobe kel téra di Kanan ki N ta ben da israelitas pa ser di ses.* 50 Nton, bu ta móre na kel monti ki bu sta ba subi, i bu ta diskansa ku bus genti grandi, sima Aron, bu irmon, móre na monti Or i el djuntadu ku ses gentis grandi.* 51 Pamodi ninhun di nhos ka foi lial pa mi na meiu di kes israelita, djuntu di kes agu di Meribá di Kades, na dizértu di Zin, pamodi nhos ka santifika-m dianti di povu di Israel. 52 Bu ta odja kel téra di lonji, má bu ka ta entra na kel téra ki N sta ta da povu di Israel.”