Juízis

15 Un ténpu dipôs, na ténpu di kodjéta di trigu, Sanson ba vizita se mudjer, i el leba un kabritu. El fla: “N krê fika na kuartu ku* nha mudjer.” Má, pai di se mudjer ka dexa-l entra. 2 Se sogru fla-l: “N pensa ma bu ka gosta di el más. Pur isu, N da bu padrinhu el pa el ser se mudjer. Se irman más nova é ka más bunita di ki el? Favor, fika ku se irman.” 3 Nton, Sanson fla: “Di es bês, kes filisteu ka pode kulpa-m pamodi N prujudika-s.”

4 Nton Sanson bai, el pega 300 rapoza. Dipôs, el mara-s dôs-dôs na rabu. Na meiu di kes rabu, el poi un pó na el. 5 Dipôs, el poi lumi na kes pó i el larga kes rapoza na kanpu di serial di kes filisteu. Sanson kema tudu kuza, kes fexu di trigu, kes serial ki inda es ka kodjeba, i tanbê kes pé di uva i kes pé di olivera.

6 Kes filisteu pergunta: “Ken ki faze kel-li?” Es fla-s: “É Sanson, kel jénru di kel ómi di Timná, pamodi se sogru toma se mudjer i el da-l pa el kaza ku se padrinhu.” Pur isu, kes filisteu subi i es kema kel mudjer i se pai. 7 Sanson fla-s: “Si é si ki nhos ta faze, N ka ta diskansa timenti N ka vinga di nhos.” 8 Nton, el mata un monti di algen un tras di kel otu. Dipôs, el dixi i el fika na un kavérna* na rótxa di Eton.

9 Dipôs, kes filisteu subi i es arma ses ténda na Judá. Es fika ta anda di un lugar pa kel otu, na zóna di Leí. 10 Kes ómi di Judá pergunta-s: “Pamodi ki nhos ben ataka-nu?” Kes filisteu fla-s: “Nu ben pega* Sanson pa nu pode faze-l sima el faze-nu.” 11 Nton, 3 mil ómi di Judá dixi ti kavérna di rótxa di Eton i es fla Sanson: “Bu ka sabe ma kes filisteu sta ta governa-nu? Nton pamodi ki bu faze kel-li ku nos?” El fla-s: “N faze-s kel mésmu kuza ki es faze-m.” 12 Má kes ómi fla-l: “Nu ben pega-u pa nu intrega-u na kes filisteu.” Nton, Sanson fla-s: “Nhos jura ma nhos ka ta ataka-m.” 13 Es fla-l: “Nau, nu ka ta mata-u, nu krê sô mara-u i intrega-u na ses mô.”

Pur isu, es mara-l ku dôs korda novu i es tra-l di kel rótxa. 14 Kantu Sanson txiga na Leí, kes filisteu odja-l i es fika ta grita di alegria. I spritu di Jeová da-l forsa, i kes kórda ki el tinha na mô bira sima fiu di linhu txumuskadu na lumi, i es kai di se mô. 15 El atxa un kexada di buru ki dja tinha poku dia ki móre. El stika mô, el panha-l i el mata mil ómi ku kel kexada. 16 Sanson fla:

“Ku kexada di un buru N mata txeu inimigu, i N montia-s un riba di kel otu!

Ku kexada di un buru N mata mil ómi.”

17 Kantu el tirmina di pâpia, el bota kel kexada i el txoma kel lugar di Ramate-Leí.* 18 Dipôs, el fika ku txeu sedi, el txoma Jeová i el fla-l: “É bo ki da bu sérvu kel grandi vitória li. Má gósi, bu sta ben dexa-m móre di sedi i kai na mô di kes ómi ki ka sirkunsidadu?” 19 Nton, Deus abri un braku ki tinha na Leí, i agu kumesa ta sai di kel braku. Kantu Sanson bebe kel agu, el ganha forsa* i el anima otu bês. Pur isu, el txoma kel lugar di En-Akoré,* ki ta fika na Leí ti dia di oji.

20 Sanson julga Israel duránti 20 anu, na ténpu ki kes filisteu staba ta governa Israel.