Primera Tesalonisensis

1 Di Paulu, Silvanu* i Timótiu, pa kel kongregason ki sta na Tesalónika unidu ku Deus, nos Pai, i Sinhor Jizus Kristu:

Pa Deus mostra nhos grandi bondadi i da nhos pas.

2 Sénpri nu ta agradese Deus óras ki nu ta pâpia di nhos tudu na nos orason, 3 pamodi dianti di kel ki é nos Deus i nos Pai, sénpri nu ta lenbra di trabadju ki nhos faze, ku fé i amor, i modi ki nhos aguenta difikuldadis pamodi nhos speransa na nos Sinhor Jizus Kristu. 4 Irmons ki Deus ta ama, nu sabe ma Deus skodje nhos, 5 pamodi kes notísia sábi ki nu prega ka txiga na nhos sô ku palavras, má tanbê ku puder, ku spritu santu i ku tudu serteza, sima anhos tanbê nhos sabe ki tipu di algen nu bira na nhos meiu pa djuda nhos. 6 I nhos bira ta imita-nu i ta imita Sinhor, pamodi mésmu ku txeu sufrimentu, nhos seta palavra ku alegria ki ta ben di spritu santu, 7 i asi nhos bira un izénplu pa tudu kes krenti na Masedónia i na Akaia.

8 Na verdadi, pamodi nhos, é ka sô palavra di Jeová* ki obidu na Masedónia i na Akaia, má tanbê nhos fé na Deus spadja pa tudu lugar, pur isu nu ka meste fla nada. 9 Pamodi es própi, es sta kontinua ta pâpia di modi ki nu inkontra ku nhos pa primeru bês i di modi ki nhos larga nhos imajen pa nhos volta pa Deus, pa ser skravu di un Deus bibu i verdaderu, 10 i pa spera se Fidju ben di séu, kel ki el resusita,* ki é Jizus, ki ta libra-nu di kel raiba ki sta pa ben.