Sugunda Koríntius
12 N ten ki ingaba. Pur isu, N sta ben pâpia sobri kes vizon ki Sinhor mostra-m i kes mensajen ki el da-m, mésmu si N ka ta ganha nada ku kel-li. 2 N konxe un ómi ki é un disiplu di Kristu, ki dja ten 14 anu ki el lebadu pa tirseru séu. Si é na korpu ô fóra di korpu, N ka sabe, Deus ki sabe. 3 Sin, N konxe es ómi, ô na korpu, ô siparadu di korpu, N ka sabe, Deus ki sabe, 4 ki lebadu pa paraízu i el obi palavras ki ka pode fladu i ki ninhun ómi ka ten autorizason pa fla. 5 N ta ingaba di es ómi, má N ka ta ingaba di nha kabésa, sô si é di nhas frakéza. 6 Pamodi mésmu si N krê ingababa, N ka sta sérba tolu, pamodi N sta fla verdadi. Má N ta ivita faze-l, asi pa ningen ka pensa di mi más ki kel ki el ta odja-m ta faze ô ki el ta obi-m ta fla, 7 sô pamodi N odja kes kuza ki Sinhor mostra-m.
Pa N ka xintiba orgulhu dimás, N dadu un spinhu na karni, un anju di Satanás, pa fika ta da-m bafatada* manenti, asi pa N ka xintiba orgulhu dimás. 8 N inplora Sinhor três bês, ta pidi-l pa el afasta-l di mi. 9 Má el fla-m: “Nha grandi bondadi ta txiga-u, pamodi nha grandi puder sta ta bira perfeitu na frakéza.” Nton ku txeu alegria, N ta ingaba di nhas frakéza, asi pa puder di Kristu kontinua riba mi sima un ténda. 10 Pur isu, N ta xinti alegria na frakéza, na insultu, na ténpu di nisisidadi, na pirsigison i difikuldadi, pamodi Kristu. Pamodi óras ki N sta fraku, é la ki N ta sta xeiu di puder.
11 N bira tolu. Má si nhos papiaba ben di mi, N ka ta xintiba obrigadu na pâpia di kel manera li. Pamodi N ka mostra na ninhun kuza ma mi é ménus ki nhos super-apóstlus, enbóra ami é ka nada. 12 Na verdadi, N prova nhos ma mi é un apóstlu kantu N aguenta firmi na txeu kuza, i tanbê ku sinal, milagris i óbras poderozu. 13 Na kuzê ki nhos fika ku ménus priviléjiu ki kes otu kongregason? Talvês é sô pamodi N ka bira un karga pa nhos. Nhos purdua-m ku bondadi pamodi kel injustisa li.
14 Nhos odja! Kel-li é tirseru bês ki N sta prontu pa ba vizita nhos, i N ka ta ser un karga. Pamodi N ka sta djobe kuzas ki nhos ten, má é nhos ki N sta ta djobe. Pamodi ka ta speradu pa fidjus djunta kuzas pa pai ku mai, má pa pai ku mai djunta kuzas pa fidjus. 15 Má ami, N ta fika kontenti di gasta tudu kuza ki N ten i tanbê nha vida pa nhos.* Si N ta ama nhos txeu, pamodi ki N debe amadu más poku? 16 Má di kalker manera, N ka bira un karga. Má, nhos ta fla ma N foi “spértu” i ma N “ingana” nhos. 17 Pur akazu N pruveta di nhos através di algun algen ki N manda nhos? 18 N insisti ku Titu pa ba vizita nhos i N manda otu irmon ku el. Pur akazu Titu pruveta di nhos? Nu ka anda na mésmu spritu i na kes mésmu pasu?
19 Duránti tudu kel ténpu li nhos pensa ma nu staba ta difende nos kabésa? Nos é sigidor di Kristu i é dianti di Deus ki nu sta pâpia. Má, nos irmons ki nu krê txeu, tudu kel ki nu ta faze é pa da nhos koraji. 20 Pamodi N ten medu ma óras ki N txiga la, N pode ka atxa nhos sima N kreba i ami N ka ta ser sima nhos kreba, má envês di kel-li talvês N ta atxa nhos ta briga, ku siumis, ku raiba, ku dizunion, ta kalúnia, ta pâpia na vida di algen, ku orgulhu i na dizórdi. 21 Talvês óras ki N volta, nha Deus ta umilha-m dianti di nhos, i N ten ki txora pa txeu di kes ki antis dja pekaba má ki ka rapende di inpuréza, di konportamentu seksual mariadu* i di konportamentu diskaradu* ki es faze.