Neemias

9 Na dia 24 di sétimu mês, kes israelita djunta pa faze jejun bistidu ku ropa di saku i es poi téra na kabésa. 2 Nton, kes ki éra israelita sipara di tudu kes algen ki éra stranjeru, es fika di pé i es konfesa ses pekadu i éru di ses gentis grandi. 3 Es fika di pé na ses lugar i ledu ku vós altu livru di Lei di Jeová, ses Deus, duránti três óra. I es pasa kes otu três óra ta konfesa ses pekadu i ta inbaxa dianti di Jeová, ses Deus.

4 Jezua, Bani, Kadmiel, Sebanias, Buni, Serebias, Bani i Kenani subi na palku di kes levita i es txoma Jeová, ses Deus, ku vós altu. 5 I kes levita Jezua, Kadmiel, Bani, Azabineias, Serebias, Odias, Sebanias i Petaías, fla: “Nhos labanta i nhos lova Jeová, nhos Deus, pa tudu ténpu. Ó Deus, pa es lova bu nómi, ki é xeiu di glória i ki sta riba di tudu benson i lovor.

6 “Sô bo ki é Jeová. Bu faze séu, sin, kel séu más altu di ki tudu séu i tudu se anjus,* téra i tudu kuza ki ten na el, mar i tudu kuza ki ten na el. I bu ta mante tudu es bibu, i kes anju na séu* ta inbaxa bu dianti. 7 Abo é Jeová, kel Deus verdaderu, kel ki skodje Abron, ki tra-l di Ur di kaldeus i ki pô-l nómi Abraon. 8 Bu odja ma se korason éra fiel. Pur isu, bu faze un kontratu ku el pa da el ku se disendenti* kel téra di kes kananeu, di kes itita, di kes amoreu, di kes perizeu, di kes jebuzeu i di kes jirgazeu, i bu kunpri bu promésa pamodi abo é justu.

9 “Bu odja frónta di nos gentis grandi na Ijitu, i bu obi ses pididu di ajuda djuntu di mar Brumedju. 10 Nton, bu faze sinal i milagri pa kastiga Faraó, tudu se sérvus i tudu algen di se téra, pamodi bu sabia ma es staba ta maltrata bu povu. Bu faze un nómi pa bo ki ta kontinua ti oji. 11 Bu dividi mar ses dianti, i es trabesa na téra séku. Bu bota na fundu di mar kes ki ta pirsigiba es, sima ta botadu un pédra na mar brabu. 12 Di dia bu gia-s ku un kuluna di núven i di noti ku un kuluna di lumi, asi pa limiaba es kel kaminhu ki es debe andaba na el. 13 Bu dixi riba monti Sinai, bu pâpia ku es la di séu i bu da-s julgamentus justu, leis di kunfiansa,* régras i bons mandamentu. 14 Bu pô-s ta konxe bu Sábadu santu, i bu da-s mandamentus, régras i un lei através di Muizés bu sérvu. 15 Bu da-s pon di séu kantu es staba ku fómi, bu poi ta sai agu di rótxa kantu es staba ku sedi, i bu fla-s pa es entra i pa es toma kel téra ki bu juraba ma bu ta daba es.

16 “Má nos gentis grandi aji ku orgulhu, es bira temozu i es ka obi ku bus mandamentu. 17 Es nega obi i es ka lenbra di kes kuza grandi ki bu faze pa es, má es bira temozu i es skodje un líder pa es volta pa Ijitu pa es ser skravu. Má abo é un Deus ki sta sénpri prontu pa púrdua, ki ten konpaxon i mizerikórdia, ki ten paxénxa* i ki é xeiu di amor lial,* i bu ka bandona-s. 18 Es faze un bizeru di metal i es fika ta fla: ‘Kel-li é bu Deus ki tra-u di Ijitu’, i es faze pekadus gravi ki mostra falta di ruspetu. 19 Sikrê ku tudu kel-li, bu ka bandona-s na dizértu pamodi bu mizerikórdia é grandi dimás. Kel kuluna di núven ki ta giaba es di dia na kaminhu ka afasta di es, nen kel kuluna di lumi ki ta limiaba es di noti na kel kaminhu ki es debe andaba. 20 Bu da-s bu spritu, ki é bon, pa da-s intendimentu. Bu ka nega-s bu maná i bu da-s agu kantu es staba ku sedi. 21 Duránti 40 anu bu da-s kumida na dizértu. Nada ka falta-s. Ses ropa ka gasta i ses pé ka fika intxadu.

22 “Bu da-s reinu i povu, i bu dividi-s txon. Nton, es toma kel téra di Sion, ki é kel téra di rei di Esbon, i tanbê kel téra di Oge, ki é rei di Bazan. 23 Tanbê, bu poi ses fidju ta bira txeu, sima kes stréla na séu. Nton, bu leba-s pa kel téra ki bu promete ma ses gentis grandi ta entraba i ta tomaba kónta di el. 24 Pur isu, es entra i es toma kel téra. Bu djuda-s vense kes kananeu, ki éra kes algen ki ta moraba na kel téra. I bu intrega-s na ses mô ses rei i tanbê kes algen ki ta moraba na kel téra, pa es fazeba kuzê ki es kreba ku es. 25 Es toma kes sidadi ki éra protejedu ku muralhas fórti i kes txon ki ta daba kumida, es toma kes kaza ki staba xeiu di tudu tipu di kuzas dretu, i tanbê sistérna ki dja staba kobadu, plantason di uva, plantason di olivera i kes arvi ki ta da txeu fruta. Dipôs, es kume, es fika fartu, es bira gordu i es vive sábi pamodi bu grandi bondadi.

26 “Má es bira dizobidienti, es rabela kóntra bo i es ka obi ku bu Lei. Es mata bus proféta ki aviza-s pa es volta pa bo, i es faze pekadus gravi ki mostra grandi falta di ruspetu. 27 Pur isu, bu intrega-s na mô di ses inimigu, ki sénpri ta poba es ta sufri. Má kantu es pidi-u ajuda na ténpu di frónta, bu obi-s la di séu, i pamodi bu mizerikórdia é grandi bu ta mandaba algen pa salva-s di mô di ses inimigu.

28 “Má, lógu ki ses situason ta midjoraba, es ta torna fazeba kel ki éra mau bu dianti, i bu ta bandonaba es na mô di ses inimigu ki ta maltrataba es. Nton, es ta voltaba pa bo i es ta pidiba bu ajuda, i bu ta obiba es la di séu i sénpri bu ta libraba es pamodi bu mizerikórdia é grandi. 29 Bu avizaba es pa es obi ku bu Lei, má es éra orgulhozu i es nega obi ku bus mandamentu. Es peka pamodi es ka sigi bus lei, ki ta da vida pa ken ki krê obi ku el. Es kontinua ta da-u kósta, es bira temozu i es nega obi. 30 Bu tevi paxénxa ku es duránti txeu anu, i bu kontinua ta uza bus proféta pa aviza-s ku ajuda di bu spritu santu, má es nega obi. Na fin, bu intrega-s na mô di kes algen di otus téra. 31 I dja ki bu mizerikórdia é grandi, bu ka kaba ku es, nen bu ka bandona-s, pamodi abo é un Deus ki ten konpaxon i mizerikórdia.

32 “I gósi, ó nos Deus, bo é un Deus grandi, poderozu i ki ta poi algen ta xinti grandi ruspetu. Bu ta kunpri bu kontratu i sénpri bu ta mostra bu amor lial. Ó Deus, ka bu skese di tudu kes difikuldadi ki nos, nos rei, nos prínsipi, nos saserdóti, nos proféta, nos gentis grandi i bu povu interu pasa pa el, désdi ténpu di kes rei di Asíria ti dia di oji. 33 Bu foi justu na tudu kuza ki kontise ku nos, pamodi bu aji di manera fiel, é nos ki ka aji dretu. 34 Nos rei, nos prínsipi, nos saserdóti i nos gentis grandi ka obi ku bu Lei, nen es ka presta atenson na bus mandamentu, nen na kes avizu ki bu da-s. 35 Mésmu kantu ses rei ta governaba es i bu da-s txeu benson, un téra grandi i ki ta da txeu kumida* pa es mora na el, es ka sirbi-u i es kontinua ta faze kes kuza mariadu. 36 Pur isu, oji nos é skravu, sin, skravu na téra ki bu da nos gentis grandi pa es kume i pa es goza di kes bons kuza ki txon ta da. 37 Txeu di kes kuza ki txon ta da ta bai pa kes rei stranjeru ki bu poi riba nos pamodi nos pekadu. Es ta governa-nu i es ta governa nos animal sima es krê, i nu sta pasa pa un grandi sufrimentu.

38 “Pur isu, pamodi tudu kes kuza li, nu sta faze un kontratu spesial i nos prínsipi, nos levita i nos saserdóti ta konfirma-l ku ses sélu.”