Primeru livru di Krónikas
17 Kantu Davidi dja staba ta mora na se própi palásiu,* el fla proféta Natan: “N sta ta vive na un kaza di sédru, má Arka di Kontratu di Jeová sta na un ténda.” 2 Natan fla Davidi: “Faze tudu kel ki bu korason krê, pamodi Deus verdaderu sta ku bo.”
3 Na kel mésmu noti, Deus fla Natan kes palavra li: 4 “Bai i bu fla nha sérvu Davidi: ‘É kel-li ki Jeová fla: “É ka bo ki ta ben faze un kaza pa N mora na el. 5 Nunka N ka mora na un kaza, désdi kel dia ki N tra Israel di téra di Ijitu, ti dia di oji. Má, N kontinua ta bai di un ténda pa kel otu i di un tabernáklu pa kel otu.* 6 Duránti tudu ténpu ki N anda djuntu ku tudu Israel, algun bês N pergunta un di kes juís di Israel ki N skodje pa pastora nha povu: ‘Pamodi ki nhos ka ta faze-m un kaza di sédru?’”’
7 “Nton, bai i bu fla nha sérvu Davidi: ‘É kel-li ki Jeová di izérsitu fla: “N tra-u di kanpu, di undi ki bu staba ta pastora ribanhu, pa bu ser líder di nha povu Israel. 8 I N ta sta ku bo pa undi ki bu bai, i N ta kaba ku tudu bus inimigu bu dianti. I N ta poi bu nómi ta ser sima nómi di kes grandi ómi na téra. 9 I N ta skodje un lugar pa nha povu Israel mora na el. Es ta vive la i ningen ka ta inkomoda-s más. I kes ómi mau ka ta maltrata-s* sima es fazeba na pasadu, 10 désdi kel dia ki N skodje kes juís pa governa nha povu Israel. I N ta poi tudu bus inimigu na bu mô. Tanbê, N ta fla-u: ‘Jeová ta ben faze un kaza pa bo.’*
11 “‘“Óras ki bu móre i óras ki bu ba diskansa djuntu ku bus gentis grandi, N ta ben poi bu disendenti,* un di bus fidju, ta ser rei dipôs di bo, i N ta poi se govérnu ta fika firmi. 12 É el ki ta ben faze un kaza pa mi, i N ta poi se tronu ta fika firmi pa tudu ténpu. 13 N ta ben bira se pai i el ta ben bira nha fidju. Sénpri N ta mostra-l nha amor lial, i N ka ta bandona-l sima N bandona kel algen ki governa antis di bo. 14 N ta pô-l ta fika na nha kaza i na nha govérnu pa tudu ténpu. I se tronu ta dura pa tudu ténpu.”’”
15 Natan fla Davidi tudu kes palavra li i tudu kel vizon ki el tevi.
16 Nton, rei Davidi bai i el xinta dianti di Jeová i el fla: “Ó Jeová Deus, ken ki é mi? I ken ki é nha família pa N merese tudu kel ki dja bu faze pa mi ti gósi? 17 I sima si kel-li ka txiga, ó Deus, tanbê bu fla ma família di bu sérvu ta ben dura pa txeu ténpu na futuru. I bu sta trata-m sima si mi é un ómi ki merese resebe más ónra,* ó Jeová Deus. 18 Kuzê más ki bu sérvu Davidi pode fla-u sobri kel ónra ki bu da-m, dja ki bu konxe bu sérvu dretu? 19 Ó Jeová, pamodi bu sérvu i kuzê ki bu tinha na korason,* bu faze tudu kes kuza grandi li i bu mostra bu grandéza. 20 Ó Jeová, ka ten ningen sima bo i ka ten Deus alén di bo. Tudu kel ki nu obi ku nos obidu ta konfirma kel-li. 21 I ki otu nason na téra ki é sima bu povu Israel? Deus verdaderu bai i el resgata-s pa es ser se povu. Bu faze un nómi pa bo, kantu bu faze kuzas grandi pa es i ki pô-s ta fika dimiradu. Bu kóre ku nasons di dianti di bu povu, ki bu salva di Ijitu. 22 Bu poi Israel ta ser bu povu pa tudu ténpu i abo, ó Jeová, bu bira ses Deus. 23 Gósi, ó Jeová, kunpri pa tudu ténpu, kel promésa ki bu faze sobri bu sérvu i kes algen di se família, i faze sima bu promete. 24 Pa bu nómi dura pa tudu ténpu* i pa el podu la di riba, asi pa pesoas pode fla: ‘Jeová di izérsitu, kel Deus di Israel, é Deus pa Israel,’ i pa família di bu sérvu Davidi fika firmi bu dianti. 25 Pamodi abo, nha Deus, bu dexa bu sérvu sabe ma bu krê faze un kaza pa el. É pur isu ki bu sérvu tevi kunfiansa di oferese es orason pa bo. 26 Ó Jeová, abo é kel Deus verdaderu, i bu promete ma bu ta faze kes bons kuza li pa bu sérvu. 27 Nton favor, abênsua família di bu sérvu, i pa el kontinua ta izisti bu dianti pa tudu ténpu, pamodi kel ki bu abênsua, ó Jeová, ta ser abensuadu pa tudu ténpu.”