Primera Timótiu
1 Di Paulu, apóstlu di Kristu Jizus ki nos Salvador Deus skodje, i di Kristu Jizus, ki é nos speransa, 2 pa Timótiu,* nha fidju di verdadi na fé:
Pa Deus, nos Pai, i pa Kristu Jizus, nos Sinhor, mostra-u grandi bondadi, mizerikórdia i da-u pas.
3 Sima N insentiva-u pa bu fika na Éfezu kantu N staba kuazi ta bai pa Masedónia, gósi N ta faze mésmu kuza, pa bu manda sértus algen pa es ka inxina otus dotrina, 4 nen pa es ka presta atenson na stórias falsu i na lista di famílias. Kes kuza li ka ta leba pa ninhun lugar, má es ta traze sô diskuson i es ka ta faze párti di kuzê ki Deus ta da pa bira nos fé más fórti. 5 Na verdadi, obijetivu di es instruson* é amor ki ta ben di un korason puru i di un fé sen finjimentu. 6 Alguns algen disvia di kes kuza li, i es mete na kes diskuson ki ka ten sentidu. 7 Es krê ser instrutor di lei, má es ka ta intende nen kes kuza ki es ta fla, nen kes kuza ki es ta insisti na inxina.
8 Má, nu sabe ma Lei é bon si el aplikadu dretu.* 9 Nu sabe ma lei ka fazedu pa kes algen ki é justu, má pa kes ki ta viola lei, kes ki é rebéldi, kes ki ka ta inporta ku Deus i ki é pekador, kes ki é disleal* i ki ta nega kes kuza ki é santu, kes ki ta mata ses pai ku ses mai, kes ki é asasinu, 10 kes algen ki ta faze konportamentu seksual mariadu,* kes ómi ki é omoseksual,* kes ki ta rapta algen, kes mintirozu, kes ki ka ta kunpri ses palavra* i tudu kes otu kuza ki é kóntra kel ensinu ki é bon, 11 ki sta di akordu ku kes notísia sábi ki N dadu, ki sta xeiu di glória di kel Deus filís.
12 N ta agradese Kristu Jizus nos Sinhor, ki da-m puder, pamodi el atxa ma mi é fiel i el skodje-m pa un trabadju sagradu, 13 enbóra antis N ta papiaba kóntra Deus, N ta pirsigiba se povu i mi éra orgulhozu. Má, N mostradu mizerikórdia pamodi N ta fazeba kuzas na iginoránsia i N ka tinha fé. 14 Má, nos Sinhor mostra-m kel grandi bondadi txeu dimás i N resebe fé i amor di Kristu Jizus. 15 Kes palavra li é di kunfiansa i es merese pa nu seta-s di tudu korason: Kristu Jizus ben mundu pa salva kes ki é pekador. Di tudu es, ami é kel más pekador. 16 Má, N mostradu mizerikórdia, asi pa através di mi, ki é kel más pekador, Kristu Jizus pode mostraba tudu se paxénxa, i pô-m ta ser un izénplu pa kes ki ta poi fé na el pa ten vida pa tudu ténpu.
17 Pa kel Rei di tudu ténpu, ki ka ta móre i ki é invizível, kel úniku Deus, pa dadu ónra i glória pa tudu ténpu. Amén.
18 Timótiu nha fidju, N sta da-u kes instruson* li di akordu ku kes profesia ki fazedu sobri bo, asi pa através di es bu kontinua ta luta pa un bon obijetivu, 19 pa bu mante bu fé i un bon konsénsia, konsénsia ki alguns nega, i kel-la poi ses fé ta kaba, sima un barku ki bai fundu. 20 Alguns di es é Imineu i Alexandri, i N intrega-s pa Satanás, asi pa disiplina inxina-s ka pâpia kóntra Deus.