Sugunda Tesalonisensis

1 Di Paulu, Silvanu* i Timótiu, pa kel kongregason ki sta na Tesalónika unidu ku Deus, nos Pai, i Sinhor Jizus Kristu:

2 Pa Deus, nos Pai, i pa Sinhor Jizus Kristu mostra nhos grandi bondadi i da nhos pas.

3 Irmons, nu ten obrigason di agradese Deus sénpri pamodi nhos. Nu debe faze kel-li, pamodi nhos fé sta ta bira kada bês más fórti, i amor ki nhos tudu ten pa kunpanheru sta ta omenta. 4 É pur isu ki nu ta xinti orgulhu di nhos na meiu di kes kongregason di Deus, pamodi ku tudu pirsigison i prublémas* ki nhos sta ta sufri,* nhos sta ta aguenta firmi i nhos sta ta mostra fé. 5 Kel-li é próva ma Deus ta julga ku justisa, i pamodi kel-li el ta atxa ma nhos merese Reinu di Deus, dja ki é pamodi el ki nhos sta ta sufri.

6 Pamodi é justu pa Deus paga ku tribulason kes ki sta ta poi nhos ta pasa pa tribulason. 7 Má nhos ki sta ta pasa pa tribulason, nhos ta ben resebe alíviu djuntu ku nos na ténpu ki Sinhor Jizus ta ben parse désdi séu, djuntu ku se anjus poderozu, 8 ku lumi ta arde, óras ki el traze vingansa riba di kes ki ka konxe Deus i kes ki ka obi ku kes notísia sábi sobri nos Sinhor Jizus. 9 É es mê ki ta ben sufri kastigu di distruison pa tudu ténpu, i asi es ta ben tradu di dianti di Sinhor i di glória di se forsa, 10 óras ki el ben pa el dadu glória djuntu ku se santus i pa el dimiradu na kel dia na meiu di tudu kes ki mostra fé, pamodi nhos resebe ku fé kel tistimunhu ki nu da nhos.

11 Ku kel obijetivu li nu ta ora sénpri pa nhos, pa nos Deus atxa ma nhos merese kel vida ki el txoma nhos pa el, i ku se puder el ta faze tudu kuza ki é dretu ki el krê pa nhos faze i tudu kes óbra di fé. 12 Di kel manera li, nómi di nos Sinhor Jizus ta dadu glória através di kuzê ki nhos ta faze i nhos ta ben dadu glória pamodi nhos sta unidu ku el, di akordu ku kel grandi bondadi di nos Deus i di Sinhor Jizus Kristu.