Primeru livru di Krónikas

23 Kantu Davidi dja staba bédju i kuazi ta móre, el poi Salumon, se fidju, ta ser rei di Israel. 2 Dipôs, el djunta tudu kes prínsipi di Israel, kes saserdóti i kes levita. 3 Nton kontadu kes levita ki tinha 30 anu pa riba. Es kontadu un pur un, i es éra 38 mil ómi. 4 Entri es, 24 mil éra responsável pa trabadju na kaza di Jeová i 6 mil éra funsionáriu i juís. 5 Tinha 4 mil porteru i 4 mil ki ta lovaba Jeová ku kes instrumentu ki Davidi fazeba, i ki el flaba: “N faze-s pa lova Deus.”

6 Nton, Davidi organiza-s* pa grupu, di akordu ku kes fidju di Levi: Jérson, Koate i Merari. 7 Kes fidju di Jérson éra Ladan i Simei. 8 Ladan tevi três fidju: xéfi Jeiel, Zeton i Juel. 9 Simei* tevi três fidju: Selomote, Aziel i Aran. Tudu es éra xéfi di kes grupu di família di Ladan. 10 Simei* tevi kuatu fidju: Jate, Zina,* Jeús i Berias. Tudu es éra fidju di Simei. 11 Jate éra xéfi i Zizá éra sugundu. Má dja ki Jeús i Berias ka tevi txeu fidju, es kontadu sima un grupu di família i es tinha mésmu responsabilidadi.

12 Koate tevi kuatu fidju: Anron, Izar, Ebron i Uziel. 13 Kes fidju di Anron éra Aron i Muizés. Aron i ses fidju skodjedu pa sirbi sénpri na Lugar Más Santu. Es debe sirbiba Jeová, ofereseba sakrifisiu se dianti i abensuaba povu na se nómi pa tudu ténpu. 14 Má kes fidju di Muizés, kel ómi di Deus verdaderu, podu djuntu ku tribu di Levi. 15 Kes fidju di Muizés éra Jérson i Eliézer. 16 Di kes disendenti* di Jérson, Sebuel éra xéfi. 17 Di kes disendenti di Eliézer, Reabias éra xéfi. Eliézer ka tevi más fidju, má Reabias tevi txeu fidju. 18 Di kes disendenti di Izar, Selomite éra xéfi. 19 Di kes fidju di Ebron, Jerias éra xéfi; sugundu éra Amarias; tirseru éra Jaziel i kuartu éra Jekamion. 20 Di kes fidju di Uziel, Mika éra xéfi i sugundu éra Isias.

21 Kes fidju di Merari, éra Mali i Muzi. Kes fidju di Mali éra Eliazar i Kis. 22 Eliazar móre sen ten fidju matxu, el tinha sô fidjus-fémia. Pur isu, kes fidju di Kis, ki éra ses família,* kaza ku es. 23 Muzi tevi três fidju: Mali, Éder i Jeremote.

24 Kes-li é kes disendenti di Levi, ki kontadu di akordu ku ses grupu di família i di akordu ku kes xéfi di ses grupu di família. Kes levita di 20 anu ô más kontadu i ses nómi podu na lista. Éra es ki skodjedu pa faze trabadju na kaza di Jeová. 25 Pamodi Davidi dja flaba: “Jeová, kel Deus di Israel, dja da se povu pas i el ta ben mora na Jiruzalen pa tudu ténpu. 26 Tanbê, kes levita ka ta ben karega tabernáklu nen kes kuza ki es ta uza na adorason.” 27 Di akordu ku kes últimu orientason di Davidi, kontadu kes levita ki tinha 20 anu ô más. 28 Es skodjedu pa djuda kes fidju di Aron na trabadju ki es ta fazeba na kaza di Jeová. Es ta kuidaba di kes pátiu, di kes lugar di kume, es ta fazeba purifikason di tudu kes kuza sagradu, i es ta fazeba kalker otu trabadju ki ta mesteba na kaza di Deus verdaderu. 29 Es ta djudaba pripara kes pon sagradu,* kes farinha finu pa oférta di serial, kes pon finu sen fermentu, kes pon ki es ta asaba na frijidera, kes masa misturadu ku azeti, i tudu kes pézu i medida. 30 Es tinha ki fazeba kel-li tudu dia di palmanhan i tanbê di tardinha pa agradeseba i pa lovaba Jeová. 31 Sénpri es ta djudaba kes saserdóti ofereseba kes sakrifisiu kemadu pa Jeová na sábadu, na lua nova, i duránti kes ténpu di fésta. Es ta fazeba kel-la sénpri dianti di Jeová i di akordu ku kel ki staba skrebedu na kes lei. 32 Tanbê, es ta kunpriba ses responsabilidadi na ténda di runion i na lugar santu, i es ta djudaba kes fidju di Aron, ki éra ses família, na kes trabadju na kaza di Jeová.