Sugunda di Juan
1 Di kel ómi di idadi* pa kel sinhora ki skodjedu i pa se fidjus, ki N ta ama di verdadi, i é ka sô mi, má tanbê tudu kes ki konxe verdadi, 2 pamodi kel verdadi ki ta kontinua na nos i ta ben sta ku nos pa tudu ténpu. 3 Kel grandi bondadi, mizerikórdia i pas di Deus, nos Pai, i di Jizus Kristu, se Fidju, ta ben sta ku nos ku verdadi i amor.
4 N fika txeu kontenti di sabe ma alguns di bus fidju sta ta anda na verdadi, sima kel mandamentu ki nu resebe di nos Pai. 5 Sinhora, gósi N ta pidi-u pa nu ama kunpanheru. (N ka sta ta skrebe-u un mandamentu novu, má un ki nu tevi désdi komésu.) 6 I amor siginifika kel-li: pa nu kontinua ta anda di akordu ku se mandamentu. Kel-li é kel mandamentu ki nhos obi désdi komésu: nhos debe kontinua ta anda na amor. 7 Pamodi dja parse na mundu txeu algen ki ta ingana, kes ki ka ta rekonhese ma Jizus Kristu ben sima un ómi.* Es ta ingana algen i es é antikristu.*
8 Nhos toma kuidadu pa nhos ka perde kes kuza ki nu trabadja pa es, má pa nhos resebe un rekonpénsa konplétu. 9 Tudu kel ki ta pasa limiti di kes kuza ki Kristu inxina i ki ka ta kontinua na es ka ten Deus. Ken ki ta kontinua na kes ensinu li é kel ki ten Pai i tanbê Fidju. 10 Si algen ben na nhos i el ka traze kes ensinu li, ka nhos resebe-l na nhos kaza i nen ka nhos fla-l mantenha. 11 Pamodi ken ki ta fla-l mantenha sta ta partisipa na se óbras mariadu.
12 Enbóra N tene txeu kuza pa N skrebe nhos, N ka krê faze-l ku papel i tinta, N ta spera bai na nhos i pâpia ku nhos róstu ku róstu, asi pa nhos alegria ser konplétu.
13 Kes fidju di bu irman, kel skodjedu, sta manda-u mantenha.