Jó
32 Nton, kes três ómi dizisti di responde Jó, pamodi el staba konvensidu ma el éra inosenti.* 2 Má Eliú, fidju di Barakel, kel buzita, di família di Ran, fika txeu xatiadu. El staba xatiadu ku Jó pamodi Jó tenta prova ma éra el* ki tinha razon, envês di Deus. 3 Tanbê, el staba txeu xatiadu ku kes três amigu di Jó pamodi es ka konsigi atxa un respósta, má es flaba ma Deus éra kulpadu. 4 Eliú spera pa responde Jó pamodi es éra más bédju di ki el. 5 Kantu Eliú odja ma kes três ómi ka tinha más nada pa fla, el fika txeu xatiadu. 6 Nton, Eliú, fidju di Barakel, kel buzita, kumesa ta pâpia. El fla:
“Ami é jóven
I anhos é algen grandi.
Pur isu, N ruspeta nhos i N fika kaladu
I nen N ka tenta fla nhos kel ki N sabe.
7 N pensa: ‘Dexa idadi pâpia.
Dexa kes algen ki ten txeu anu inxina sabedoria.’
8 Má é spritu santu ki Deus ta da pesoas,
É folgu di Tudu-Poderozu ki ta da-s intendimentu.
9 Sô idadi ka ta poi ningen ta ten sabedoria,
Nen é ka sô algen di idadi ki sabe kuzê ki é dretu.
10 Pur isu, N ta fla: ‘Obi-m,
Ami tanbê N ta ben fla-u kuzê ki N sabe.’
11 Nhos obi! N spera pa nhos pâpia,
N fika ta obi nhos rasusinu
Timenti nhos staba ta djobe kuza di fla.
12 N staba ta obi nhos ku txeu atenson,
Má ninhun di nhos ka konsigi prova ma Jó staba mariadu*
Nen nhos ka responde ses argumentu.
13 Pur isu, ka nhos fla: ‘Nu ten sabedoria.
É ka algen ki ta koriji-l, é Deus ki ta koriji-l.’
14 É ka pa mi ki Jó fla kes palavra,
Pur isu, N ka ta ben uza kes mésmu argumentu ki nhos uza.
15 Es sta dizanimadu, es ka tene respósta.
Es ka tene más nada pa fla.
16 N sta spera, má es ka sta pâpia más.
Es sta paradu la, es ka tene más nada pa fla.
17 Nton, ami tanbê N ta ben da un respósta.
Ami tanbê N ta ben fla kuzê ki N sabe.
18 N tene txeu kuza pa fla,
Spritu santu ta obriga-m pâpia.
19 Déntu di mi N sta sima vinhu ki ka sta respira,
Sima un bólsa* di vinhu novu ki sta kuazi ta rabenta.
20 Dexa-m pâpia pa N pode fika aliviadu!
N ta ben abri nha bóka i N ta ben responde.
21 N ka ta ben faze diferénsa di ningen
Nen N ka ta ben da ningen ilojiu falsu,*
22 Pamodi N ka sabe da ilojiu falsu.
Si N fazeba kel-li, nha Kriador ta kababa ku mi kel óra.