Jó

 2 “Ti ki ténpu nhos ta ben kontinua ta irita-m,*

I ta uza palavras pa kaba ku mi?

 3 Dja nhos koriji-m* 10 bês,

I nhos ka ta xinti vergónha di maltrata-m.

 4 I si N fadja mê,

Nhos ka ten nada aver ku nha éru.

 5 Si nhos kontinua ta aji sima si nhos é midjór ki mi,

I ta fla ma N merese umilhadu,

 6 Nhos fika ta sabe ma é Deus ki ingana-m

I ki panha-m na se redi di kasa.

 7 N sta kontinua ta grita: ‘N sta sufri violénsia!’, má ningen ka sta responde.

N sta ta grita ta pidi ajuda, má ka ten justisa.

 8 Dja el blokia nha kaminhu ku un paredi di pédra i N ka sta konsigi pasa.

Dja el kubri nha kaminhu ku sukuru.

 9 Dja el tra-m nha glória

I el tra-m koroa di kabésa.

10 El sta kebra-m di tudu ladu, ti ki el kaba ku mi.

El ta rinka nha speransa sima ta rinkadu un arvi.

11 El sta ku txeu raiba di mi,

I el sta odja-m sima si mi é se inimigu.

12 Ses trópa ta ben djuntu i es ta serka-m,

I es ta arma ses kanpamentu na vólta di nha ténda.

13 El poi nhas própi irmon ta fika lonji di mi,

I kes algen ki konxe-m afasta di mi.

14 Nhas amigu* dja bandona-m,

I kes ki N konxeba dretu dja skese di mi.

15 Nhas konvidadu i nhas skrava ta odja-m sima un stranhu,

Pa es ami é un stranjeru.

16 N ta txoma nha sérvu, má el ka ta responde.

Ku nha bóka, N ta inplora-l pa el ten konpaxon di mi.

17 Nha bafu dja bira nojéntu pa nha mudjer

I pa nhas irmon,* dja N bira ta txera mal.

18 Ti mininus pikinoti ta dispreza-m.

Óras ki N ta labanta, es ta kumesa ta faze-m trósa.

19 Tudu nhas grandi amigu ta odia-m,

I kes ki N ta amaba sta kóntra mi.

20 Dja N bira osu ku péli,

É sô vida ki N tene.*

21 Nhos ten péna di mi, nhas amigu, nhos ten péna di mi,

Pamodi mô di Deus dja da na mi.

22 Pamodi ki nhos ta kontinua ta pirsigi-m, sima Deus sta ta faze,

Ta ataka-m sen para?

23 N ta gostaba pa nhas palavra skrebedu,

N ta gostaba pa es skrebedu na un livru!

24 N ta gostaba pa es fikaba skrebedu na rótxa pa tudu ténpu,

Ku un kanéta* di féru i ku txunbu!

25 Pamodi N sabe dretu ma kel ki ta resgata-m sta bibu.

El ta ben dipôs i el ta ben labanta riba di téra.

26 Duénsa dja kaba ku nha péli,

Má simé, inda N ta ben odja Deus timenti N sta bibu.

27 N ta ben odja Deus,

N ta ben odja-l ku nhas própi odju, ka ku odju di otu algen.

29 É nhos ki debe xinti medu di spada,

Pamodi spada ta kastiga kes ki ta faze éru.

Nhos debe sabe ma ten un juís.”