Salmu
Pa diretor di múzika. Un múzika di Davidi.
20 Pa Jeová responde-u na dia di frónta.
Pa nómi di Deus di Jakó proteje-u.
2 Pa Deus manda-u ajuda la di se lugar santu
I pa el apoia-u la di Sion.
3 Pa Deus lenbra di tudu bus oférta,
I pa el seta bu sakrifisiu kemadu ku alegria.* (Selá)
4 Pa Deus da-u kes kuza ki bu korason ta dizeja
I pa el poi tudu bus planu* ta kóre dretu.
5 Nu ta ben grita di alegria pamodi bu salva-nu;
Nu ta ben labanta nos bandera na nómi di nos Deus.
Pa Jeová faze tudu kes kuza ki bu pidi.
6 Gósi N sabe ma Jeová ta salva kel algen ki el skodje.
El ta responde-l la di se lugar santu na séu.
Deus ta uza se mô direita poderozu pa salva-l.
7 Alguns ta kunfia na ses karu di géra i otus na kabalu,
Má nos nu ta kunfia na* nómi di Jeová, nos Deus.
8 Es tropesa i es kai,
Má nos nu labanta i nu fika firmi.
9 Ó Jeová, salva rei!
El ta ben responde-nu na dia ki nu pidi ajuda.