Un paraízu na Téra

Jeová ta ben kaba ku tudu maldadi ki Satanás sta ta faze. Jeová skodje Jizus pa ser kel Rei ki ta ben governa Téra. Kel govérnu li ta ben bira Téra un paraízu. — Daniel 7:13, 14; Lucas 23:43.

Jeová ta promete kes kuza li:

• KUMIDA AVONTÁDI: ‘Téra ta ben da kumida; Deus, nos Deus, ta ben abensua-nu.’ ‘Ta ben ten kumida avontádi na Téra, i riba monti ta ben ten un monti kumida.’ — Salmo 67:6; 72:16.

• KA TA BEN TEN MÁS GÉRA: ‘Nhos ben i nhos odja kes kuza ki Jeová ta faze, nhos odja modi ki el sta faze kuzas grandi na Téra. El ta kaba ku géra na téra interu.’ — Salmo 46:8, 9.

• KA TA BEN TEN ALGEN MAU MÁS: ‘Pamodi kes algen mau ta ben ser distruídu. . . I ka ta dura kes algen mau ta ben dexa di izisti; bu ta djobe pa lugar ki es staba, i es ka ta sta la.’ — Salmo 37:9, 10.

• 

  KA TA BEN TEN DUÉNSA, NEN TRISTÉZA I NEN MÓRTI: ‘Na kel ténpu, odjus di kes algen ségu ta ben abri i obidus di kes algen surdu ta ben distapa. Na kel ténpu, kes algen manku ta ben salta sima viadus, i língua di kes algen mudu ta ben grita di alegria.’ — Isaías 35:5, 6.

  ‘I própi Deus ta sta ku es. El ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór. Kuzas di pasadu ka ta ben más.’ — Apocalipse 21:3, 4.

Jeová é diferenti di Satanás ku se dimónis pamodi nunka el ka ta konta mintira. Tudu kuza ki el promete ta ben kunpri ku sertéza. (Lucas 1:36, 37) Jeová ta ama-u i el krê pa bu vive na kel Paraízu ki el ta ben traze. Pur isu, pâpia ku Tistimunhas di Jeová pa bu prende más sobri kes verdadi rei di sábi ki sta na Palavra di Deus. Si bu vive di akordu ku kes kuza ki Bíblia ta fla, bu ta dexa di ser skravu di mintira, superstison i iginoránsia. I ka ta dura, bu ta ben fika livri di pekadu i di mórti. Sima Jizus fla: ‘Nhos ta konxe verdadi i verdadi ta liberta nhos.’ — João 8:32.