Modi ki Jeová proteje Jizus

JEOVÁ ta faze kuzas di manera maravilhozu pa proteje mininus i kes ki ka ta konsigi proteje es sô. Si bu sta ta anda na un kanpu, bu pode odja un di kes manera ki Jeová ta faze kel-li. Má na komésu, bu pode ka ntende kuzê ki sta kontise.

Bu ta odja un pasu na txon pértu di bo. I el sta ta parse ma el sta ku pankada. El ta rasta un di ses aza i el ta afasta di bo óras ki bu txiga pértu di el. Kantu más pértu bu ta txiga na el, más el ta afasta di bo. Nton dirapenti el ta kumesa ta bua. Na verdadi, el ka staba ku pankada. Bu sabe pamodi ki el faze kel-li? —

Pértu di undi ki bu staba, kel pasu tinha se fidjus sukundidu na meiu di un monti padja. Mai di kes pasu fika ku medu ma bu pode atxa-s i faze-s algun kuza mariadu. Pur isu, el finji ma el staba ku pankada, asi pa el pode pô-u lonji di se fidjus. Bu sabe kenha ki pode proteje-nu sima kel pasu proteje ses fidju? — Bíblia ta konpara Jeová ku un pasu ki txoma ágia, ki ta proteje ses fidju. — Deuteronómio 32:11, 12.

Fidju ki Jeová krê más txeu é Jizus. Kantu Jizus staba na Séu, el éra un algen spritual sima se Pai i el tinha txeu puder. El ta pode tomaba kónta di se kabésa. Má, kantu Jizus nase sima un mininu li na Téra, el ka ta konsigiba protejeba se kabésa. El ta mesteba di proteson.

Pa faze kuzê ki Deus krê pa el fazeba li na Téra, Jizus tinha ki bira un ómi perfeitu. Má Satanás tenta mata Jizus antis di kel-li kontise. Kel stória sobri modi ki Satanás tenta mata Jizus kantu el éra mininu i modi ki Jeová proteje-l ta dexa algen dimiradu. Bu krê obi-l? —

Poku ténpu dipôs ki Jizus nase, Satanás poi ta brilha na séu di orienti un kuza ki ta parseba sima un stréla. Alguns ómi ki ta studa stréla, ki ta txomadu di astrólugu, sigi kel stréla senténas di kilómetru ti Jiruzalen. Kantu es txiga na Jiruzalen, es pergunta alguns di kes ómi na undi ki ta ben naseba kel rei di Judeus. Es responde: ‘Na Belen’. — Mateus 2:1-6.

Kantu Eródis, kel rei mau di Jiruzalen obi ta fladu ma dja naseba na Belen kel ki ta binha ser rei, el fla kes astrólugu: ‘Nhos djobe kel mininu i óras ki nhos atxa-l nhos aviza-m.’ Bu sabe pamodi ki Eródis krê sabeba na undi ki Jizus staba? — É pamodi Eródis staba ku siumis i el kreba mataba el!

Modi ki Deus proteje se fidju? — Kantu kes astrólugu atxa Jizus, es da-l alguns prezenti. Dipôs na un sonhu, Deus aviza-s pa es ka volta pa Eródis. Nton es volta pa kaza pa otu kaminhu. Es ka bai pa Jiruzalen. Kantu Eródis diskubri ma kes astrólugu dja voltaba pa kaza el fika uma xatiadu. Pa tenta mata Jizus, el da órdi pa mata tudu kes mininu di Belen ki tinha ménus di dôs anu di idadi. Má Jizus dja ka staba la.

Bu sabe modi ki Jizus skapa? — Dipôs di kes astrólugu ba ses kaminhu, Jeová aviza Juzé, maridu di Maria, pa es fuji pa Ijitu. La, rei Eródis ka ta fazeba Jizus nada di mariadu. Uns anu dipôs, kantu Maria ku Juzé volta di Ijitu ku Jizus, Deus da Juzé un otu avizu. Na un sonhu el fla Juzé pa el bai pa Nazaré, na undi ki Jizus ta fikaba suguru. — Mateus 2:7-23.

Bu odja modi ki Deus proteje se fidju? — Sima kel pasu proteje se fidjus i Jeová proteje Jizus, mininus oji meste di proteson tanbê. Ten kes algen ki ta krê faze-u algun kuza mariadu. Bu sabe é kenha? —

Bíblia ta fla ma Satanás é sima un lion ki sta ruji, ta djobe algen pa satadja. Sima un lion ta djobe un animal pikinoti pa ataka, Satanás ku se dimónis tanbê ta prujudika mininus. (1 Pedro 5:8) Má Jeová é más fórti ki Satanás. Jeová pode proteje se fidjus i libra-s di kalker kuza mariadu ki Satanás pode faze.

Bu ta lenbra na kapítlu 10 di kel livru li, kuzê ki Diabu i se dimónis ta tenta faze? — Sin, es ta tenta pô-nu ta faze relason seksual ki Deus ta fla ma é mariadu. Má é sô kenha ki debe faze relason seksual? — É kel-la própi. Sô un ómi ku un mudjer ki sta kazadu ku kunpanheru.

Má é tristi pamodi alguns adultu gosta di faze relason seksual ku mininus. Óras ki es ta faze kel-li, kes rapazinhu ku kes minina pode kumesa ta faze kuzas mariadu ki es prende ku kes adultu. Tanbê es ta kumesa ta uza ses órgon seksual di manera mariadu. I é kel-li ki kontise dja ten txeu ténpu, na sidadi di Sudoma. Bíblia ta fla ma kes algen di la, ‘désdi kes más novu ti kes más bédju’ tenta faze relason seksual ku kes ómi ki ba vizita Ló. — Génesis 19:4, 5.

Nton sima Jizus mesteba di proteson, bo tanbê bu meste di proteson di kes adultu i ti mésmu di kes mininu, ki pode krê faze relason seksual ku bo. Normalmenti, kes tipu di algen li, ta finji ma es é bu amigu. Es pode ti oferese-u algun kuza si bu promete ma bu ka ta konta otus algen kuzê ki es krê faze ku bo. Má, kes algen li es é mau, sima Satanás i se dimónis, es ta pensa sô na ses kabésa. I es ta tenta satisfaze se dizeju óras ki es ta faze relason seksual ku mininus. I kel-li é un kuza txeu mariadu!

Bu sabe kuzê ki es ta faze pa es pode satisfaze ses dizeju? — Es pode tenta mexe na bus órgon seksual. Ô ti es ta tenta poi ses órgon seksual na di bo. Má nunka ka bu dexa ningen tenta brinka ku bu pénis ô ku bu vajina. Nen mésmu bu irmon, bu irman, bu mai ô bu pai. Kes parti di korpu li é txeu íntimu.

Modi ki bu pode proteje bu korpu di kes algen ki ta faze kes tipu di kuza mariadu li? — Primeru, ka bu dexa ningen brinka ku bus órgon seksual. Si algen tenta faze kel-li ku bo, tenta fla ku vós altu di manera firmi: “Para ku kel-li! N sta ba fla kuzê ki bu sta faze!” I si kel algen fla ma kuzê ki kontise é bu kulpa, ka bu kridita na el pamodi é ka verdadi. Ka ta nporta el é kenha bu debe fla otu algen kuzê ki el faze-u. Bu debe pâpia sobri kel-li, sikrê kel algen fla ma kuza ki nhos faze djuntu é segredu, ma é sô nhos ki ten ki sabe. Sikrê kel algen promete ma el ta da-u prezentis bunitu ô si el amiasa-u, bu debe sai di la i ba konta kuzê ki kontise.

Bu ka meste fika ku medu, má bu ten ki toma kuidadu. Óras ki bu pai ku bu mai ta aviza-u sobri kes algen ô lugar ki pode ser prigozu pa bo, bu meste obi ku es. Si bu faze si ta ser más difísil pa un algen mau prujudika-u.