Un promésa pa Jeová

Uns dôs mês dipôs ki israelitas sai di Ijitu, es txiga na Monti Sinai i es arma kanpamentu. Jeová fla Muizes pa subi na monti i el fla-l: ‘Mi ki salva israelitas. Si es obi ku mi i ku nhas lei es ta ser nha povu spesial.’ Muizes dixi di monti i el fla israelitas kuzê ki Jeová fla-l. Modi ki es responde? Es fla: ‘Nu ta faze tudu kuza ki Jeová fla-nu pa nu faze.’

Muizes subi monti otu bês. La Jeová fla-l: ‘Di li três dia N ta pâpia ku bo. Aviza povu pa ka tenta subi Monti Sinai.’ Muizes dixi i el fla israelitas pa es pripara pa es obi kuzê ki Jeová tinha pa flaba es.

Na tirseru dia, israelitas odja raiu na séu ku núven prétu na monti. Tanbê es obi uma strubada i un son altu di buzina. Dipôs, Jeová dixi na monti na lumi. Israelitas fika ku txeu medu ti ki es bira ta treme. Kontise un grandi tremor di téra i monti interu fika kubértu di fumu. Son di buzina fika kada bês más altu. I dipôs Deus fla: ‘Ami é Jeová. Nhos ka debe adora ninhun otu deus.’

Muizes torna subi monti i Jeová da-l leis pa povu sigi. Kes lei éra sobri modi ki es debe adoraba el i modi ki es debe konportaba. Muizes skrebe kes lei i dipôs el le-l pa israelitas. Es promete: ‘Nu ta faze tudu kel ki Jeová fla-nu pa nu faze’. Kel dia es faze un promésa pa Deus. Agô, nu meste sabe si es kunpri ses promésa ô nau.