Jizus faze kura na sábadu

Farizeus ta odiaba Jizus i es krê atxaba un motivu pa prende-l. Es fla ma el ka devia kuraba duentis na sábadu. Na un sábadu, Jizus odja un ómi ki nase ségu ta pidi zimóla na rua. El fla se disiplus: ‘Nhos odja puder di Deus ta djuda kel ómi li.’ Jizus mistura se kuspinhu ku téra, el faze papa lama i dipôs el poi na odju di kel ómi ségu. Jizus fla-l: ‘Bai laba na tanki di Silué.’ Kel ómi faze sima Jizus fla-l i pa primeru bês na se vida, el konsigi odja.

Gentis fika spantadu. Es fla: ‘Kel-li é ka kel ómi ki nase ségu, ki ta staba xintadu na rua ta pidi zimóla, ô é algen ki ta parse ku el?’ Kel ómi fla: ‘É mi própi ki é kel ómi ki nase ségu!’ Gentis pergunta-l: ‘Pamodi ki bu ka sta ségu más?’ Kantu el fla-s kuzê ki kontise, es leba-l pa farizeus.

Kel ómi fla farizeus: ‘Jizus faze un papa lama i el pô-m el na odju i el fla-m pa N bai laba. N faze si, i gósi N sta ta odja.’ Farizeus fla: ‘Si Jizus faze kura na sábadu, se puder ka pode ben di Deus.’ Má otus algen fla: ‘Si se puder ka éra di Deus, el ka ta konsigi kuraba tudu algen.’

Farizeus manda txoma pai ku mai di kel ómi. Es pergunta-s: ‘Kuzê ki kontise, ki nhos fidju sta ta odja gósi?’ Se pai ku se mai fika ku medu, pamodi farizeus dja flaba ma kenha ki mostra fé na Jizus ta botadu fóra di sinagóga. Nton es fla: ‘Nu ka sabe. Nhos pergunta-l.’ Farizeus faze kel ómi txeu pergunta, ti ki el fla-s: ‘Dja N fla nhos tudu ki N sabe. Pamodi ki nhos ta torna pergunta-m?’ Farizeus fika xatiadu i es bota-l fóra di sinagóga.

Jizus bai atxa kel ómi i el pergunta-l: ‘Bu ten fé na Misías?’ Kel ómi responde: ‘Si N konxeba el, N ta tinha fé na el.’ Jizus fla-l: ‘É mi ki é Misías.’ Kel-li ta mostra ma Jizus trata kel ómi ku amor, pamodi el kura-l i el djuda-l ten fé.