Ken Ki É Deus?
Txeu algen ta fla ma es ta kridita na Deus. Má si bu pergunta-s ken ki é Deus bu ta obi respóstas diferenti. Pa alguns algen, Deus é un juís duru, ki sô krê kastiga algen pa ses éru. I pa otus algen el sta prontu pa purdua-nu i ama-nu, ka ta inporta kuzê ki nu faze. Inda otus ta kridita ma Deus sta lonji i ma el ka ta inporta ku nos. Pamodi kes opinion diferenti li, txeu algen pode atxa ma é inposível sabe ken ki é Deus.
Ta inporta sabe ken ki é Deus? É klaru ki sin. Konxe Deus dretu pode djuda-u ten obijetivu na vida. (Atus 17:26-28) Kantu más bu bira amigu di Deus, más el ta ama-u i el ta djuda-u. (Tiagu 4:8) Tanbê, konxe Deus dretu pode da-u oportunidadi di ten vida pa tudu ténpu. — Juan 17:3.
Modi ki bu pode konxe Deus dretu? Pensa na un algen ki bu konxe dretu. Pur izénplu, un grandi amigu. Modi ki nhos amizadi kumesa? Talvês bu prende se nómi, se kualidadis, kuzê ki el gosta, kuzê ki el ka gosta, kuzê ki el ta faze na vida, se planus pa futuru i otus kuza. Sabe di kes kuza li djuda-u bira más amigu di kel algen.
Di mésmu manera, nu pode konxe Deus si nu prende kes kuza li:
KAL KI É NÓMI DI DEUS?
MODI KI DEUS É?
KUZÊ KI DEUS DJA FAZE?
KUZÊ KI DEUS STA BEN FAZE?
MODI KI KONXE DEUS TA DJUDA-NU?
Kel revista li ta ben mostra-u kal ki é respósta di Bíblia pa kes pergunta li. Kes artigu ki sta na kel revista li ta ben djuda-u ka sô sabe ken ki é Deus, má tanbê modi ki bira se amigu pode djuda-u.