‘Ka nhos fika ku kes deus stranjeru’

Jakó sabia ma é sô Jeová ki debe ser adoradu, nbóra Jeová inda ka daba un lei ki ta proibiba idolatria. (Êx 20:3-5) Pur isu, dipôs ki Jeová fla Jakó pa volta pa Betel, Jakó fla tudu kes algen ki staba ku el pa ka fika ku kes imaji ki es tinha. Dipôs, Jakó bota fóra kes imaji i ti kes brinku ki talvês ta uzada pa proteje di spritu mau. (Gén 35:1-4) Di sertéza, Jeová fika kontenti ku kuzê ki Jakó faze.

Na nos ténpu modi ki nu pode adora sô Jeová? Primeru, nu ta fika lonji di kalker kuza ki ten aver ku idolatria ô fitisaria. Kel-li krê fla ka fika ku nada ki ten aver ku fitisaria ô bruxaria. Tanbê é inportanti pensa dretu antis di skodje un diverson. Pur izénplu, pergunta bu kabésa: ‘N ta divirti ku livrus ô filmis ki ten vanpiru, zunbi i kuzas ki algen ta faze ku puder ki algen normal ka ten? Alguns di kes kuza ki N ta divirti ku el ta mostra ma un poku di majia, fitisaria ô maldison é ka prigozu?’ Nu meste fika lonji di kalker kuza ki Jeová ta ôdia. — Sal 97:10.

ODJA VÍDIU ‘NHOS FIKA KÓNTRA DIABU’. DIPÔS FAZE KES PERGUNTA LI:

• 

  Kuzê ki kontise ku un studanti ki txoma Paula?

• 

  Pamodi ki é inportanti pidi ajuda di ansions si un algen sta ta ten prubléma ku fitisaria ô bruxaria?

• 

  Si nu krê ajuda di Jeová, di kuzê ki nu meste libra?

• Kuzê ki Paula disidi faze?

• Modi ki bu pode ivita influénsia di dimónis?