Kuzê ki pesoas ta fla sobri orason
“Óras ki N ta faze orason, N ta xinti sima ki Deus sta na nha ladu, ta pega-m na mô i ta orienta-m óras ki N ka sabe kuzê ki N ta faze.” — MARÍA.
“Nha mudjer móre dipôs di 13 anu ta luta ku kánser. N ta lenbra ma tudu dia N ta fazeba orason pa Deus, i N xinti ma el sta ta obiba mi i ta xinti nha dór. Kel-li da-m pas.” — RAÚL.
“Orason é un prezenti bunitu ki Deus da-nu.” — ARNE.
Pa María, Raúl, Arne i pa txeu algen, orason é un prezenti spesial. Através di orason, es ta xinti ma es pode pâpia ku Deus, agradese-l i pidi se ajuda. Es ta kridita di tudu ses korason na kes palavra ki sta na Bíblia sobri faze orason pa Deus: “Kel-li é kunfiansa ki nu ten na el: ka ta inporta kuzê ki nu pidi di akordu ku se vontadi, el ta obi-nu.” — 1 Juan 5:14.
Má, txeu algen ta atxa difísil kridita na kuzê ki Bíblia ta fla sobri orason. Steve fla kuzê ki el ta pensaba sobri orason: “Kantu N tinha 17 anu N perde três amigu, un móre na asidenti di karu i nhas dôs amiga móre fogadu na mar.” Kuzê ki Steve faze? “N faze orason pa Deus ta pergunta pamodi ki tudu kel-la kontise, má el ka responde-m. Nton, N pergunta: ‘Pakê faze orason?’” Sima Steve txeu algen ta atxa ma ses orason ka ta respondedu. Pur isu es ta pergunta si bale péna faze orason.
Má ten otus motivu ki ta poi pesoas ta pensa si bale péna faze orason. Alguns ta atxa ma dja ki Deus sabe tudu kuza, nu ka meste fla-l kuzê ki nu meste ô fla-l nos prubléma.
Otus algen ta atxa ma Deus ka krê obi ses orason pamodi algun kuza mariadu ki dja es fazeba. Jenny fla: “Nha prubléma é pamodi N ta xinti ma N ka ten valor. N ta rapende di kes kuza ki N fazeba. Simé N ta xinti ma N ka ta merese pa Deus obi nhas orason.”
Kuzê ki bu ta atxa di faze orason? Si dja bu xinti sima kes algen li ô bu ten dúvida ma Deus sta ta obi bus orason, bu pode fika konsoladu ku kuzê ki Bíblia ta fla sobri orason. Nu pode kunfia na kuzê ki Bíblia ta fla.a El pode djuda-u atxa respósta pa perguntas sima kes-li:
Deus ta obi nos orason própi?
Pamodi ki alguns orason ka ta respondedu?
Modi ki bu pode ten serteza ma Deus ta obi bus orason?
Modi ki orason pode djuda-u?
a Na Bíblia nu ta atxa orasons di txeu sérvu di Deus, i tanbê kes orason di Jizus Kristu. Na kes livru di Bíblia ki skrebedu na ebraiku, ki é más konxedu pa Velho Testamento, nu ta atxa más di 150 orason.