El sta ta aguenta firmi sikrê ku un duénsa ki ka ten kura

Virjínia, ki é un Tistimunha di Jeová, ten un duénsa ki tene-l paralizadu. El ka ta konsigi pâpia, nen kume. Úniku kuza ki el ta konsigi faze é odja, obi, abri i fitxa odju i mexe kabésa un bokadinhu. Virjínia ka éra asi, el tinha bon saúdi i txeu inerjia. Má na un palmanhan di anu 1997, el xinti un dór fórti tras di kabésa ki ka krê paraba. Se maridu leba-l pa ospital i na kel mésmu dia di noti, el fika na kóma. El ben korda dôs simana dipôs paralizadu i ligadu na un mákina ki ta djudaba el respira. Duránti alguns dia, el ka konsigi lenbra di nada, nen di kenha ki el éra.

Virjínia konta kuzê ki kontise dipôs. El fla: “N ba ta lenbra di kuzas poku-poku i N faze orason di fundu di nha korason. N ka krê moreba i dexaba nha fidju pikinoti sen se mai. Nton, pa da-m koraji, N tenta lenbra di tudu kes testu di Bíblia ki N ta konsigiba.

“Ku ténpu, N tradu di kel lugar ki dotoris staba ta kuida di mi. Dipôs di 6 mês ta faze tratamentu na ospital diferenti i na un otu lugar di tratamentu, N mandadu pa kaza. N fika tudu paralizadu i N ta mesteba ajuda pa N faze tudu kuza. N staba dizanimadu dimás i N ta xintiba ma N ka tinha valor pa otus algen i pa Jeová. Tanbê N fika ta pensa na modi ki N ta kuidaba di nha fidju.

“N kumesa ta lé spiriénsas di otus Tistimunhas di Jeová ki lida ku duénsas gravi sima di meu. N fika dimiradu ku kuzê ki es konsigi faze pa Jeová. Kel-li djuda-m mante un atitudi puzitivu i konsentra na kuzê ki N podia fazeba. Antis di N fika duenti, N tinha poku ténpu pa kuzas sima faze nha studu pesoal, prega i faze orason. Má gósi N tene tudu ténpu pa N faze kes kuza li. Pur isu, envês di N fika dizusperadu, N ta konsentra na nha adorason pa Jeová.

“N prende uza konputador. N ta uza un prugrama ki ta skrebe pa mi óras ki N ta mexe kabésa. N ta fika kansadu, má di kel manera li N ta konsigi studa Bíblia. Tanbê N ta skrebe karta i e-mail pa N pâpia ku otus sobri kel speransa ki N ten. Pa N konsigi pâpia ku kes algen ki sta djuntu ku mi, N ten un kuadru ku tudu létra na el. Kel algen ki sta ku mi ta ponta pa un létra di kada bês. Óras ki el skodje un létra mariadu, N ta ragala odju i óras ki el skodje kel létra sértu, N ta fitxa odju. Nu ta ripiti mésmu kuza ti ki nu forma palavras i frazis. Alguns irman ki ta pasa txeu ténpu ku mi bira bon na diskubri kuzê ki N krê fla. Má alvês, óras ki es ka ta serta, kel-li ta pô-nu ta ri.

“N gosta txeu di faze kuzas ku irmons na kongregason. Sénpri N ta uza xamada ku vídiu pa N sisti runions. N ta skrebe nhas komentáriu i un algen ta lé-s duránti kes párti di perguntas ku respósta. Tanbê, N ta djunta ku un grupu pikinoti di irmons pa nu sisti prugrama di JW Broadcasting ki ta sai tudu mês.a

“Dja ten uns 23 anu ki N tene kel duénsa li. Alvês N ta xinti tristi. Má N ta konsigi xinti midjór óras ki N ta faze orason, ki N ta pasa ténpu ku irmons di kongregason i óras ki N ta mante okupadu ta sirbi Jeová. Na verdadi, ku ajuda di irmons, dja ten 6 anu ki mi é pioneru fíksu. Sénpri N tenta ser un bon izénplu pa nha fidju, Alessandro, ki gósi sta kazadu i el é ansion. El ku se mudjer tanbê é pioneru.

“N gosta txeu di pensa na kes kuza ki N ta ba faze na paraízu. Primeru kuza ki N krê faze é uza nha própi vós pa N pâpia ku Jeová. N krê anda djuntu di un riu i odja kes kuza bunitu ki ten na naturéza. Dja ten más di 20 anu ki N ta dadu kumida pa un tubu. Pur isu, N tene gana pa txiga kel dia ki N ta konsigi panha un masan di un arvi i kume-l. Tanbê, dja ki mi é italiana, N tene gana di faze i kume kes kumida italianu ki N gosta más txeu, sima pizza!

“‘Speransa di salvason’ sta ta djuda-m proteje nha menti. (1 Tessalonicenses 5:8) Imajina nha vida na kel mundu novu ta da-m txeu alegria, pamodi N ten sertéza ma já já nha duénsa ta kaba. N tene gana di ten kel ‘vida di verdadi’ ki Jeová promete-nu óras ki se Reinu ben governa Téra.” — 1 Timóteo 6:19; Mateus 6:9, 10.