Brasu di polvu ta dexa algen dimiradu

Enjinherus di robô sta ta dizenvolve mákinas pa djuda dotoris faze operason na pártis pikinoti di korpu sen korta txeu. Un di kes kuza novu na es kanpu, fazedu ku bazi na brasu di polvu ki é txeu móli.

Pensa na kel-li: Polvu ten 8 brasu kunpridu i ki ta mexe faxi ki pode pega un kuza, susti-l i perta-l riju, sikrê na un lugar txeu pikinoti. Polvu pode ka sô dobra se brasus na kalker direson, má tanbê el pode poi pártis diferenti di se brasus bira riju konfórmi el meste.

Kes algen ki ta faze piskiza ta kridita ma brasu di robô ki é móli i ki ta dobra faxi sima brasu di polvu, ta djuda na faze operason sen korta korpu txeu. Kel mákina li, pode djuda faze operason na kes algen ki di otu manera ta mesteba un operason mutu más konplikadu.

Odja brasus di polvu ki ta mexe faxi

Kel brasu di robô li dja fazedu i dja el sta ta uzadu pa nsaia na faze operasons. Un párti di brasu ki ten 135 milímitru pode labanta i susti orgons di déntu di korpu, ki é móli, sen straga-s, timenti kel otu párti ta faze operason. Dr. Tommanso Ranzani, ki é ménbru di kel ekipa ki kria kel brasu di robô li, fla: “Nu ta kridita ma kel sistéma li ta ser komésu pa maneras novu i midjór i ku kuzas más avansadu na kel brasu di robô.”

Kuzê ki bu ta atxa? Brasu di polvu ben di ivoluson? Ô tevi un algen ki faze-l?