Kuzê ki pode djuda-u para di fuma

“Sta disididu na para di fuma, é un di kes kualidadi más inportanti pa un algen ki konsigi larga kel vísiu li.” — Livru “Pare de Fumar Agora!”

PA BU para di fuma, bu meste ten un dizeju fórti pa faze kel-la. Kuzê ki pode djuda-u faze kel-la? Pa kumesa, nu ben odja modi ki bu vida ta fika más midjór sen sigaru.

Bu ta gasta ménus dinheru. Kel ábitu di fuma un masu di sigaru tudu dia, pode kusta txeu dinheru. “Nunka N ka daba kónta kantu dinheru N ta gastaba ku sigaru tudu anu.” — Gyanu, Nepal.

Bu ta xinti más alegria na vida. Regina, di Áfrika di Sul, fla: “Nha vida kumesa kantu N para di fuma i sta ta fika kada bês más midjór.” Óras ki un algen ta para di fuma, el ta xinti gostu i txeru mutu más midjór. El ta ten más inerjia i el ta fika más bunitu.

Bu saúdi pode midjora. “Para di fuma ta traze bons rezultadu lógu pa saúdi di un ómi ô un mudjer di kalker idadi.” — Centros de Controlo e Prevenção de Doenças, Mérka.

Bu ta kunfia más na bu kabésa. “N para di fuma pamodi N ka kreba pa sigaru kontrola nha vida. N krê kontrolaba nha própi kabésa.” — Henning, Dinamarka.

Bu ta djuda bu família i amigus. “Fuma ta. . . prujudika saúdi di kes algen ki ta sta djuntu ku bo. . . Piskizas ki fazedu ta mostra ma tudu anu milharis di algen ta móre di kánser di pulmon i duénsa na korason pamodi fumu di sigaru di un otu algen ki staba ta fuma.” — Sociedade Americana do Cancro.

Deus ta fika kontenti ku bo. ‘Nhas irmon, nu linpa di tudu sujidadi di karni’. (2 Coríntios 7:1) ‘Nhos aprizenta nhos korpu santu. . . i ki Deus ta seta’. — Romanos 12:1.

“Kantu N ntende ma Deus ka ta seta kuzas ki ta suja nos korpu, N disidi para di fuma.” — Sylvia, Spanha.

Txeu bês, sô kel dizeju fórti ka ta txiga. Tanbê nu pode meste di ajuda di otus algen ki pode ser nos família i amigus. Kuzê ki es pode faze?