Reinu di Deus ta ben ‘traze txeu pas’

Ka ta dura, Reinu di Deus ki nu sta ta spéra, ki é un govérnu ki Deus kria, ta ben traze pas i union pa Téra interu. Salmo 72:7 ta fla ma ‘ta ben ten txeu pas’. Má ki ténpu di Reinu di Deus ta ben kumesa ta governa Téra? Modi ki kel-li ta ben kontise? Kuzê ki bu meste faze pa bu resebe bensons di kel Reinu?

KI TÉNPU KI REINU DI DEUS TA BEN?

Bíblia dja flaba di alguns kuza ki ta ben kontiseba ki ta mostraba klaru ma Reinu di Deus ta staba kuazi ta txiga. Tudu kes kuza ki ta ben kontiseba ta sérba un ‘sinal’ ki ta inklui géra entri txeu país, fómi, duénsas, txeu tremor di téra i omentu di kuzas ki é kóntra lei. — Mateus 24:3, 7, 12; Lucas 21:11; Apocalipse 6:2-8.

Otu profesia ta fla kel-li: ‘Na ténpu di fin, kuzas ta fika konplikadu, difísil di aguenta. Pamodi ómis ta ba ama sô ses kabésa, ta ama dinheru, ka ta obi ku pai ku mai, ta ser ingratu, disleal, sen amor pa família, ka ta krê djobe pas ku kunpanheru, ta ser kaluniador, diskontroladu, runhu, ka ta ama kuzas dretu, xeiu di orgulhu, envês di ama Deus es ta krê sô pasa sábi.’ (2 Timóteo 3:1-4) Sénpri izisti pesoas ku kes kualidadi mau li. Má oji maioria di pesoas é si.

Kes profesia li kumesa ta kunpri na 1914. Ti storiadoris, pulítikus i skritoris komenta modi ki mundu muda apartir di kel anu la. Pur izénplu, ten un storiadora di Dinamarka ki skrebe: “Kel géra ki kumesa na 1914 foi un momentu txeu inportanti na stória di mundu. Antis di kel anu pesoas ta pensaba ma situason di mundu staba kada bês más midjór. . . má nton nu entra na un ténpu di dizastri, di medu i di ódiu, i ninhun lugar ka éra suguru más.”

Má tanbê, kes kuza li ki sta ta kontise é sima un tenpistadi antis di kau bira kalmu. Es ta mostra ma ka ta dura Reinu di Deus ta ben governa Téra. Na verdadi, Jizus fla ma kel sinal ki ta mostra ma fin sta pértu ta inkluiba kel kuza bon li: ‘Kes notísia sábi di Reinu ta ben ser pregadu na mundu interu, pa sirbi di tistimunhu pa tudu nasons, i dipôs fin ta ben.’ — Mateus 24:14.

Kes notísias sábi di Reinu li é kel téma prinsipal di mensaji ki Tistimunhas di Jeová ta prega. Na verdadi, nos revista prinsipal txoma Sentinéla ta aviza ma Reinu di Jeová dja sta ta governa. El ta pâpia di kes kuza bunitu ki Reinu di Deus ta ben faze pa umanus i pa Téra.

MODI KI REINU DI DEUS TA BEN KUMESA TA GOVERNA?

Pa responde kel pergunta li nu odja kuatu pontu inportanti:

1. Reinu di Deus ka ta ben uza ninhun pulítiku di mundu i ninhun di es ka ta ben reprizenta kel Reinu.

2. Kes xéfi di pulítika di mundu ka ta krê abri mô di ses puder i es ta ben ser tolu óras ki es ben luta kóntra Reinu di Deus. — Salmo 2:2-9.

3. Reinu di Deus ta ben kaba ku tudu kes govérnu di ómi ki inda krê governa. (Daniel 2:44; Apocalipse 19:17-21) Kel últimu géra li ta txomadu di Armajedon. — Apocalipse 16:14, 16.

4. Tudu kes ki disidi di livri vontadi ser lial pa Reinu di Deus ta ben skapa na dia di Armajedon i es ta ben vive na un mundu novu di pas. Es ta ben faze párti di kel ki Bíblia ta txoma di ‘kel monti di algen’, ki ta parse ma ta ben ser un grupu di milhons di algen. — Apocalipse 7:9, 10, 13, 14.

KUZÊ KI NU MESTE FAZE PA NU RESEBE BENSON DI ES REINU?

Primeru kuza ki nu ten ki faze pa faze párti di kes ki ta ben governadu pa Reinu di Deus é resebe idukason ô konhisimentu. Jizus fla Deus kel-li na orason: ‘Vida pa tudu ténpu é kel-li: pa es konxe-u abo, úniku Deus verdaderu, i kel ki bu manda, Jizus Kristu.’ — João 17:3.

Óras ki pesoas da kónta ma Jeová Deus é un algen rial, es ta resebe txeu benson. Odja dôs di es: Primeru, es ta dizenvolve un fé fórti na Deus. Kel fé li ten bazi na próvas klaru i ta konvense-s ma Reinu di Deus é rial i ma sta pértu di txiga kel ténpu ki el ta ben kumesa ta governa Téra. (Hebreus 11:1) Sugundu, kel amor ki es ten pa Deus i pa ses prósimu ta bira más fórti. Amor ki es ten pa Deus ta motiva-s pa obi ku el di tudu korason. I amor pa prósimu ta motiva-s pa aplika na ses vida kes palavra di Jizus li: ‘Sima nhos krê pa ómis faze nhos, nhos faze-s di mésmu manera.’ — Lucas 6:31.

Nos Kriador é sima un pai ki ten txeu amor, ki krê kel ki é midjór pa nos. El krê pa nu ten kel ki Bíblia ta txoma di ‘vida di verdadi’. (1 Timóteo 6:19) Má oji pesoas ka ten kel ‘vida di verdadi’. Pa milhons di algen, vida é ka nada fásil, i es meste luta pa es pode vive. Pa ten un ideia di kuzê ki é ‘vida di verdadi’, odja alguns di kes bon kuza ki Reinu di Deus ta ben faze pa pesoas.