2. Anos é kulpadu pa nos sufrimentu?

Pamodi ki é inportanti sabe respósta

Si respósta é sin, nton talvês nu pode faze algun kuza pa nos sufrimentu bira más poku.

Pensa na kel-li

Anos é kulpadu pa nos sufrimentu? Pensa na kes izénplu li:

• 

  Abuzu.

  Organizason Mundial di Saúdi ta fla ma más ô ménus un na kada kuatu adultu dja sufri abuzu na se korpu kantu el staba pikinoti, i un na kada três mudjer dja sufri abuzu na korpu ô abuzu seksual (ô tudu dôs) na algun momentu di se vida.

• 

  Mórti di algen ki nu ta ama.

  Un rilatóriu di 2018 di Organizason Mundial di Saúdi ta fla ma “uns 477 mil algen matadu na mundu interu na 2016”. I tanbê tevi uns 180 mil algen ki matadu na géra ô na otus konfuzon na kel mésmu anu.

• 

  Prublémas di saúdi.

  Na un artigu ki publikadu na un revista,a skritora Fran Smith fla ma más di un bilhon di algen ta fuma, i ma sigaru ta traze kes duénsa ki más ta mata algen, sima duénsa di korason, tronbózi i kánser na pulmon.

• 

  Divizon na sosiadadi.

  Jay Watts, ki é un dotora di pisikolojia, fla: “Pobréza, divizon na sosiadadi, rasismu, diskriminason kóntra mudjer ô ómi, situason di kes algen ki sta rafujiadu i un kultura ki ten txeu konpitison pode poi un algen ta xinti depreson i más preokupason.”

  SABE MÁS

  Odja vídiu Pamodi ki Deus kria Téra? na site jw.org.

Kuzê ki Bíblia ta fla

É ómi ki é kulpadu pa txeu sufrimentu na mundu oji.

Txeu bês algen ta sufri pamodi govérnus injustu ta poi vida di pesoas más difísil, envês di proteje-s.

‘Ómi ta manda na ómi pa se disgrasa.’ — ECLESIASTES 8:9.

Nu pode bira nos sufrimentu más poku.

Prinsípius di Bíblia ta djuda-nu ten un saúdi midjór i da dretu ku otus algen.

‘Korason kalmu é vida pa korpu, má siumis ta podrise osu.’ — PROVÉRBIOS 14:30.

‘Nhos larga tudu tipu di rankor, fúria, raiba, gritaria i palavras ki ta ofende, i tanbê tudu maldadi.’ — EFÉSIOS 4:31.