Diskriminason — Bu sta kontaminadu?

Algen pode faze diskriminason pa kes algen ki é di otu nason, rasa, tribu, língua, relijion, puzison na sosiadadi ô pamodi es é ómi ô mudjer. Alguns algen ta julga otus algen mariadu pamodi es é difisienti, pamodi ses idadi, si es ten skóla ô nau ô pamodi ses aparénsia. Má simé, es ta atxa ma es ka ta faze diskriminason.

Bu sta kontaminadu ku diskriminason? Txeu di nos ta konsigi odja ma otus algen ta faze diskriminason. Má pode ser difísil seta ma nu ta faze diskriminason. Na verdadi, nos tudu nu ta faze diskriminason di algun manera. David Williams, ki é profesor di sosiolojia, fla ma óras ki un algen ten ideias mariadu sobri algun grupu di algen i dipôs el ta nkontra ku un algen di kel grupu, sen el da kónta el ta trata kel algen di un manera diferenti.

Pur izénplu, Jovica ta mora na un país na Europa ki txeu algen ten ideias mariadu sobri un grupu. El fla: “N ta atxaba ma ningen di kel grupu ka éra bon algen. Má N ka da kónta ma kel ideia li éra mariadu. N ta flaba nha kabésa: ‘Kel-li é verdadi.’”

Txeu govérnu ten leis pa luta kóntra rasismu i otus fórma di diskriminason. Nton pamodi ki diskriminason ti inda izisti? Kel-li ta kontise pamodi kes lei ta proíbi kuzas ki algen ta faze. Es ka ta konsigi kontrola kuzê di algen ta pensa i ta xinti. Diskriminason ta kumesa na menti i na korason di kada algen. Nton, ta da pa vense diskriminason? Diskriminason ten kura?