KUZAS STA BIRA KARU — KUZÊ KI NU PODE FAZE?

Fika kontenti ku kel ki bu ten

Kes algen ki ta fika kontenti ku kuzê ki es ten, ta xinti alegria na vida. I si ses situason muda, es ta muda ses stilu di vida i es ta vive di akordu ku kel ki es ten.

PAMODI KI KEL-LI É INPORTANTI?

Un pisikóloga ki txoma Jessica Koehler repara ma kes algen ki sta kontenti ku kuzê ki es ten, ten un atitudi más puzitivu. El repara tanbê ma es ten ménus inveja di otus algen. Nu ka ta fika dimiradu pamodi kes algen li normalmenti é kes algen más filís i es ta ten ménus stress. Na verdadi, alguns di kes algen más filís ka ten txeu dinheru. I kel-li é verdadi pamodi kes algen ta konsentra na kes kuza más inportanti di vida, sima alegria ki ta ben di pasa ténpu djuntu ku família i amigus.

“Si nu tene kumida i ropa, nu ta fika kontenti ku kes kuza li.” — 1 Timótiu 6:8.

KUZÊ KI BU PODE FAZE?

Ivita konpara ku otus algen. Si bu konpara bu stilu di vida ki é sinplis ku kes otu algen ki ten un vida di luxu, bu pode ka fika kontenti ku kes kuza ki bu ten i bu pode ti xinti inveja. Má nen sénpri kuzas é ka sima nu ta pensa. Bu pode pensa ma kes algen ki é riku ten txeu kuza, má na verdadi es sta xeiu di dívidas. Nicole, ki ta vive na Senegal, fla: “N ka meste txeu kuza pa N ser filís. Si N sta kontenti ku kuzê ki N ten, N pode ser filís, sikrê otus algen ten más kuza di ki mi.”

Tenta faze kel-li: Ivita odja kes kuza ki es ta poi na redi sosial ki ta mostra kantu dinheru i kuzas material ki otus algen ten.

“Mésmu óras ki un algen ten txeu kuza, se vida ka ta ben di kes kuza ki el ten.”— Lukas 12:15.

Ser gratu. Kes algen ki é gratu ten más xansi di sta kontenti i es ka ta atxa ma es meste ô ma es merese más kuza. Roberton, ki ta mora na Aiti, fla: “N ta tra ténpu pa N pensa na modi ki otus algen ta mostra bondadi pa mi i pa nha família. Dipôs, N ta agradese kes algen pa kuzê ki es faze pa mi. Tanbê, N ta inxina nha fidju di 8 anu fla obrigadu óras ki el ta dadu algun kuza.”

Tenta faze kel-li: Tudu dia, skrebe algun kuza ki bu ta xinti gratu pa el. Pode ser pamodi bu ten un bon saúdi, un família ki gosta di bo, amigus di verdadi ô ti mésmu óras ki bu ta odja sol ta kanba.

‘Ken ki ten un korason kontenti, sénpri ten un méza xeiu.’— Provérbios 15:15.

Alvês, nos tudu ta atxa difísil sta kontenti ku kuzê ki nu ten. Má nos sforsu é ka atoa! Óras ki nu ta skodje sta kontenti ku kuzê ki nu ten, tanbê nu sta skodje ser filís i kel-li é un kualidadi ki dinheru ka ta pode kunpra.