Ser un algen ki gosta di da

PAMODI KI KEL-LI É INPORTANTI?

Óras ki nu ta da, mésmu ki é poku, nu ta xinti filís i é bon pa nos. Na verdadi, studus ta mostra ma óras ki nu ta da, nu ta ten un bon saúdi. Pur izénplu, nu ta ten ménus ansiadadi, stress, tenson altu i ti mésmu dór. Tanbê, faze kel-li pode djuda-nu durmi midjór.

Óras ki nu ta djuda otus ku dinheru ô ku algun kuza ki es meste, ta ser más fásil nu seta ajuda óras ki nu meste. Howard, ki ta mora na Inglatéra, fla: “Pamodi mi ku nha mudjer nu ta djobe maneras di djuda otus, nu ka ta xinti mal óras ki nu ta resebe ajuda.” É klaru ki ken ki ta da di korason ka ta spera nada di vólta. Má kuzê ki es ta ganha é amigus di verdadi ki ta krê djuda-s óras ki es meste.

KUZÊ KI BU PODE FAZE?

Dividi kuzê ki bu ten ku otus. Sikrê bu ka tene txeu kuza ki bu pode da, bu pode faze algun kuza pa un algen, sima un kumida sinplis. Duncan ku se família, ki ta mora na Uganda, é póbri, má simé es gosta di da. Duncan fla: “Na dumingu, mi ku nha mudjer nu ta konvida alguns algen pa nos kaza pa kume un kumida sinplis. Nu gosta di pasa ténpu ku otus algen.”

É klaru ki óras ki nu ta da, nu debe ser ikilibradu. Nu ka krê pa nos família pasa nisisidadi pamodi nu ta da más di ki kel ki nu ta pode. — Jó 17:5.

Tenta faze kel-li: Oferese un algen un kumida sinplis ô ti mésmu un bebida. Si bu ten kuzas ki bu ka meste más, bu pode oferese-s pa bus amigu ô vizinhus ki pode sta ta meste-s i es ta ba fika txeu kontenti.

Da di otus manera. Alguns di kes midjór prezenti ka ta kusta dinheru. Pur izénplu, nu pode da nos ténpu i nos atenson óras ki nu ta faze kuzas pa djuda otus algen. Ti mésmu palavras ki ta mostra bondadi pode ser un prezenti! Nton, fla otus algen modi ki bu ta da-s txeu valor ô modi ki bu ta ama-s.

Tenta faze kel-li: Djuda otus algen linpa, konpo ses kaza ô ba faze-s algun mandadu. Skrebe un karton ô manda un mensajen pa un amigu sikrê é sô pa fla-l ma bu sta ta pensa na el.

Óras ki bu ta djobe maneras di da, bu vida ta midjora txeu.