Dimónis ta ngana algen ma mortus sta bibu
Bíblia ta fla ma Satanás ‘sta ta ngana Téra interu.’ (Apocalipse 12:9) Satanás ku se dimónis ka krê pa nu kridita na Palavra di Deus, ki é Bíblia. El ta tenta poi algen ta kridita ma mortus sta bibu na algun lugar spritual. Odja modi ki es ta faze kel-li.
Relijion falsu
Algen, animal, pexi i pasus, es tudu é alma
Txeu relijion ta inxina ma tudu algen ten un alma ki ta bai pa un lugar spritual dipôs ki es móre. Es ta fla ma korpu ta móre, má alma ka ta móre.
Má Palavra di Deus ka ta inxina kel-li. Bíblia ta fla ma alma é un algen, el é ka un kuza ki sta déntu di un algen. Pur izénplu, kel testu di Bíblia ki ta splika modi ki Adon kriadu, ta fla: ‘I Jeová Deus faze ómi di pó di téra i el sopra-l folgu di vida na se narís, i ómi bira un alma bibu.’ (Génesis 2:7; nóta di rodapé) Nton, Deus ka da Adon un alma, el éra un alma.
Bíblia ta fla ma animal tanbê é alma. — Génesis 1:20, 21, 24, 30; nótas di rodapé.
Dja ki na Bíblia kel palavra ‘alma’ siginifika kel algen própi, nu ka debe fika dimiradu óras ki el ta fla ma alma ta móre, pamodi el ta móre mê. Bíblia ta fla:
‘Kel alma ki peka é el ki ta móre.’ — Ezequiel 18:4.
‘Sanson fla uma riju: “Dexa nha alma móre ku filisteus!”’ — Juízes 16:30; nóta di rodapé.
‘Na sábadu pode fazedu kuza dretu ô mariadu, salva un alma ô mata?’ — Marcos 3:4; nóta di rodapé.
Bíblia ta mostra ma alma ta móre
Otus testu di Bíblia ta mostra ma alma pode kabadu ku el (Génesis 17:14; nóta di rodapé), ma algen pode mata-l ku spada (Josué 10:37; nóta di rodapé), ma el pode móre sufokadu (Jó 7:15; nóta di rodapé) i móre fogadu (Jonas 2:5; nóta di rodapé). Nton, alma ta móre.
Si bu lé Bíblia di komésu pa fin, bu ka ta atxa nada ki ta fla ma “alma ka ta móre”. Alma di algen é ka un spritu. Kel ensinu ma alma ka ta móre ka sta na Bíblia. Kel ensinu li ta ben di Satanás ku se dimónis. Jeová ta ôdia tudu kes mintira ki relijion ta konta. — Provérbios 6:16-19; 1 Timóteo 4:1, 2.
Algen ki ta invoka spritu
Na verdadi, dimónis ta finji ma es é spritus di kes algen ki dja móre
Otu manera ki Satanás ta uza pa ngana algen é através di kes algen ki ta invoka spritu. Un algen ki ta invoka spritu é un algen ki ta pâpia dirétu ku spritus. Txeu algen ta atxa, i kel-li ta inklui kes algen ki ta invoka spritu, má kes spritu ki es ta pâpia ku es é di kes algen ki móre. Má sima dja nu odja, Bíblia ta inxina ma kel-li é ka verdadi. — Eclesiastes 9:5, 6, 10.
Nton, es ta sta ta pâpia ku kenha? É ku dimónis! Dimónis ta konsigi odja algen timenti el sta bibu, es sabe modi ki el ta papiaba, modi ki el éra, kuzê ki el faze i kuzê ki el sabia. Pur isu, es ta konsigi imita kes algen ki dja móre dretu. — 1 Samuel 28:3-19.
Stórias falsu
Otu manera ki Satanás ta uza pa poi algen ta kridita ma mortus sta bibu é através di stórias falsu. Kes stória li txeu bês ta disvia algen di verdadi ki sta na Bíblia. — 2 Timóteo 4:4.
Alguns algen ta pensa ma es odja algen ki dja moreba
Na Áfrika ten txeu stória ki algen ta konta ma es odja un algen dipôs ki el móre. Normalmenti, na kes stória kes algen mortu ta parse lonji di lugar undi ki es ta moraba. Má pergunta bu kabésa: ‘Ta faze sentidu atxa ma un algen ki ta pode vive dipôs ki el móre, ta parse lonji di undi ki se família i se amigus ta mora?’
Otu kuza ki pode kontise é kel algen ki odjadu ser un algen ki ta parse ku kel algen ki dja móre. Pur izénplu, dôs algen ki staba ta prega na un zóna fóra di sidadi repara ma un sinhor di idadi staba ta sigi-s duránti alguns óra. Kantu es pergunta kel ómi pamodi ki el staba ta faze kel-la, es fika ta sabe ma kel sinhor staba ta konfundi un di es ku un irmon di sel, ki moreba dja tinha alguns anu. É klaru ki el staba nganadu, má el ka seta kel-la. Ta da pa imajina stória ki kel sinhor dipôs konta pa se amigus ku se vizinhus!
Vizons, sonhus i vós
Dimónis ta ngana algen através di sonhus, vizons i vós
Di sertéza, dja bu kustuma obi sobri kuzas stranhu ki algen odja, obi ô sunha ku el. Kes stória di spritu li normalmenti é pa poi algen medu. Marein ta moraba na un país di Áfrika i txeu bês el ta obiba vós di se avó, ki dja moreba, ta txoma-l di noti. Medu ta tomaba kónta di el, ki el ta gritaba i el ta kordaba tudu kes algen na se kaza. Dipôs el kaba pa bira dodu.
Má si mortus sta bibu mê, ta faze sentidu es poi kes algen ki es ta ama ku medu? É klaru ki nau. Kes kuza kasábi li ta ben di dimónis.
Má i kes kuza ki spritus ta fla ki ta parse ma é bon i ma ta konsola algen? Pur izénplu, Gbassay, ki é di Séra Lioa, staba duenti. El sunha ma se pai, ki dja moreba, pâpia ku el. El fla-l pa el bai na un arvi, pa el panha un fódja, pa el mistura-l ku agu i pa el bebe. El ka devia fla ningen antis di faze kel-li. El faze si i el fika kuradu.
Otu sinhora fla ma se maridu parse pa el di noti. El fla ma el staba bunitu i ben bistidu.
Kes vizon li ta parse dretu i ma ta djuda algen. Kes kuza li ta ben di Deus? Nau. Jeová é ‘Deus di verdadi.’ (Salmo 31:5) Nunka el ka ta fazeba algun kuza pa ngana-nu. É sô dimónis ki ta faze kel-li.
Má ten dimónis ki é dretu? Nau. Sikrê alvês pode parse ma es krê djuda-nu, es tudu é mau. Kantu Diabu pâpia ku Eva, el staba ta parse ma el éra se amigu. (Génesis 3:1) Má kuzê ki kontise dipôs ki Eva obi ku Satanás i el faze kuzê ki el manda-l? El móre.
Satanás fla Eva ma el ka ta moreba. Eva kridita na el i el kaba pa móre
Nu sabe ma txeu bês un algen mau ta finji ser amigu di otu algen pa el pode ngana-l i pruveta di el. É sima un provérbiu di Áfrika ta fla: “Denti branku, korason prétu.” Palavra di Deus ta fla: ‘Pamodi própi Satanás ta finji ser un anju di lus.’ — 2 Coríntios 11:14.
Deus ka ta pâpia más ku algen na Téra através di sonhus, vizons, ô vós di kriaturas spritual. El ta da algen orientason i el ta inxina-s através di Bíblia, ki é un livru ki pode poi algen ‘totalmenti kapás, ben priparadu pa tudu bon óbra.’ — 2 Timóteo 3:17.
Pur isu, óras ki Jeová ta aviza-nu di kes armadilha di Satanás, el ta faze kel-li pamodi el ta ama-nu. El sabe ma dimónis é inimigus prigozu.