Sirbi Jeová envês di Satanás

Nos tudu nu ten ki skodje si nu ta sirbi Jeová ô Satanás ku se dimónis. Nu ka ta pode faze kes dôs kuza omésmu ténpu. Si nu skodje sirbi Jeová, nu ta mostra sabedoria!

Jeová é bon

Sima dja nu odja, dimónis gosta di prujudika i di ngana algen. Jeová é ka si. El ta ama-nu sima un pai ta ama se fidjus. É el ki ta da-nu ‘tudu bon prezenti i tudu prezenti perfetu’. (Tiago 1:17) El ka ta nega-nu nada ki é bon, sikrê el ten ki faze txeu sakrifisiu pa nu ten kel-la. — Efésios 2:4-7.

Pensa na kes kuza ki Jizus, ki é Fidju di Deus, faze kantu el staba na Téra. El poi mudu ta pâpia, el poi ségu ta odja, el kura algen ku lépra i mankus, el poi dimónis ta sai di algen i el kura tudu tipu di duénsa. Ku puder ki Deus da-l, Jizus ti resusita mortus.— Mateus 9:32-35; 15:30, 31; Lucas 7:11-15.

Envês di konfundi-nu kabésa ku un monti di mintira, Deus sénpri ta pâpia verdadi. Nunka el ka ta ngana-nu. — Números 23:19.

Ivita kustumus mariadu

Sima un móska pode fika prézu na un teia di aranha, milhons di algen sta prézu na kes mintira ku superstison. Es tene medu di algen mortu i di dimónis. Es ten medu di praga, agoru i malfetu. Es é skravu di krénsas i tradisons ki ten bazi na kes mintira di Satanás ô Diabu. Má sérvus di Deus ka sta prézu na ninhun di kes kuza li.

Jeová ten mutu más puder di ki Satanás. Si bu sirbi Jeová, el ta proteje-u di dimónis. (Tiago 4:7) Ninhun malfetu ka ta faze-u nada. Pur izénplu, na Nijéria, três kuranderu faze malfetu pa mata un Tistimunha di Jeová ki ka kria sai di kel zóna. Kantu kel malfetu fadja, un di kes kuranderu fika xeiu di medu i el bai djobe kel Tistimunha di Jeová ta inplora-l pa el diskulpa-l.

Si dimónis ataka-u, bu pode txoma Jeová pa se nómi ta pidi se ajuda i el ta proteje-u. (Provérbios 18:10) Má pa Deus proteje-u, bu meste libra di tudu kuza ki ten aver ku fitisaria ô bruxaria i ku adorason di dimónis. Kes algen ki ta adoraba Deus na ténpu antigu na Éfezu faze kel-li. Es djunta tudu ses livru di majia i es kema-s. (Atos 19:19, 20) Sérvus di Deus na nos ténpu ten ki faze mésmu kuza. Libra di tudu kuza ki ten aver ku fitisaria ô bruxaria, sima kuzas ki ta fladu ma ta da algen sórti, ma ta proteje algen di spritus i livrus di majia.

Adora Deus di manera ki ta agrada-l

Si bu krê agrada Deus, ka ta txiga sô larga adorason falsu i para di faze kuzas mariadu. Bu ten ki adora Deus di manera ki ta agrada-l. Bíblia ta mostra modi ki nu ta faze kel-li:

Sta djuntu ku Tistimunhas di Jeová

Satanás ku se dimónis ten algen na Téra ki ta inxina i ki ta faze kuzas mariadu. Má Jeová tanbê ten un povu, ki é Tistimunhas di Jeová. (Isaías 43:10) Ten más di 8 milhon di Tistimunha di Jeová na mundu interu. Tudu es ta sforsa txeu pa faze kuzas dretu i pa inxina verdadis pa otus algen. Na txeu país, bu ta atxa-s na Salon di Reinu. Si bu bai la es ta resebe-u dretu.

Ses trabadju é djuda otus algen adora Deus. Si bu krê, es ta studa Bíblia ku bo na bu kaza i es ta djuda-u prende adora Jeová di manera ki ta agrada-l. Bu ka meste paga nada pa kel-li. Tistimunhas di Jeová gosta di inxina verdadi pamodi es ta ama algen i es ta ama Jeová Deus.