“Ómis sinplis i ku poku skóla”

1, 2. Ki milagri Pedru ku Juan faze pértu di porton di ténplu?

SÓL di tardi sta límia riba di un monti di algen. Kes judeu fiel i disiplus di Kristu sta ba entra na ténplu. Sta kuazi ta txiga “óra di orason”.a (Atus 2:46; 3:1) Pedru ku Juan sta na meiu di un monti di algen i es sta ta bai pa porton di ténplu ki txoma Bunitu. Kel lugar sta ku txeu barudju pamodi pesoas sta ta anda i ta pâpia ku kunpanheru. Tanbê sta un ómi manku ta pidi zimóla. El ten más di 40 anu i el é manku désdi ki el nase. — Atus 3:2; 4:22.

² Kantu Pedru ku Juan staba pértu di kel ómi manku, el kumesa ta pidi-s dinheru. Kes apóstlu para, i kel ómi fika ta djobe pa es i ta spera pa es da-l dinheru. Má Pedru fla: “N ka ten prata nen oru, má é kel ki N ten ki N ta da-u. Na nómi di Jizus Kristu di Nazaré, anda!” Pedru pega kel ómi na mô i el djuda-l labanta. Imajina modi ki kes monti di algen ki staba la fika dimiradu kantu ki es odja kel ómi ki éra manku, di pé pa primeru bês na vida! (Atus 3:6, 7) Bu ta konsigi imajina kel ómi ta djobe pa se pé i ta tenta anda pa primeru bês? Nu ka ta fika dimiradu pamodi ki el kumesa ta salta i ta lova Deus ku vós altu!

3. Ki prezenti sen konparason kel ómi ki éra manku i kes monti di algen resebe?

³ Kes monti di algen sta uma dimiradu i es kóre pa ba odja Pedru ku Juan ki sta na Pórtiku di Salumon. Na kel mésmu lugar li undi ki Jizus ta inxinaba pesoas, Pedru splika kel monti di algen modi ki el faze kel milagri. (Juan 10:23) El da kel monti di algen i kel ómi ki éra manku un prezenti ki tinha mutu más valor di ki prata ô oru. Kel prezenti li é mutu más di ki oportunidadi di fika kuradu. É oportunidadi di es rapende, di Jeová púrdua ses pekadus i di es bira sigidoris di Jizus Kristu ki é kel “Líder Prinsipal di vida” ki Jeová skodje. — Atus 3:15.

4. (a) Dipôs ki Pedru ku Juan kura kel ómi, kuzê ki kes algen ki tinha autoridadi tenta faze? (b) Ki dôs pergunta nu sta ben responde?

⁴ Foi un dia ki ka ta da pa skese! Pedru kura un ómi ki ka ta konsigi andaba. El da milharis di algen oportunidadi di intende kal ki é vontadi di Deus, asi pa es pode sirbi-L di manera ki El ta seta. (Kol. 1:9, 10) Tanbê pamodi kuzê ki kontise na kel dia, kes algen ki tinha autoridadi tenta inpidi kes disiplu lial di Kristu di kunpri kel órdi ki Jizus da-s di prega notísias sábi di Reinu. (Atus 1:8) Kes algen ki tinha autoridadi, pensa ma Pedru ku Juan éra “ómis sinplis i ku poku skóla”. Má kuzê ki nu ta prende di manera ki kes dôs ómi li da tistimunhu pa kes monti di algen?b (Atus 4:13) I modi ki nu pode mostra koraji sima Pedru ku Juan i kes otu disiplu kantu es pirsigidu?

É ka “ku nos puder” (Atus 3:11-26)

5. Kuzê ki nu ta prende di manera ki Pedru pâpia ku kel monti di algen?

⁵ Pedru ku Juan fika di pé dianti di un monti di algen. Es sabia ma talvês alguns di kes algen flaba pa Jizus matadu. (Mar. 15:8-15; Atus 3:13-15) Pensa na koraji ki Pedru mostra kantu el fla ma kel ómi kuradu na nómi di Jizus. Pedru fla verdadi ku koraji. El mostra klaru ma kes monti di algen tinha kulpa pa mórti di Kristu. Má Pedru sabia ma kes algen “aji ku iginoránsia”, pur isu, el ka fika xatiadu ku es. (Atus 3:17) El txoma-s di irmons i el konsentra na notísias sábi di Reinu. Si es rapendeba i es poba fé na Kristu, Jeová ta trazeba “ténpu di alíviu”. (Atus 3:19) Di mésmu manera, nu meste ten koraji i ser sinseru óras ki nu ta pâpia ku otus algen sobri kel julgamentu di Deus ki sta pa ben. Má omésmu ténpu, nu ka debe pâpia sen ruspetu ô julga otus algen. Envês di kel-li, sima Pedru nu debe odja kes algen ki nu ta prega sima un algen ki pode ben bira nos irmon, i konsentra na kel mensajen puzitivu di notísias sábi.

6. Modi ki Pedru ku Juan mostra umildadi i es seta ses limitason?

⁶ Kes apóstlu éra ómis umildi. Es ka fla ma es faze kel milagri ku ses própi puder. Pedru fla kes monti di algen: “Pamodi ki nhos sta ta djobe-nu sima ki é ku nos puder ô é pamodi nu ta adora Deus ki nu pô-l ta anda?” (Atus 3:12) Pedru i kes otu apóstlu sabia ma kalker kuza dretu ki es fazeba na ses trabadju di pregason éra ku puder di Deus, ka ku ses puder. Pur isu, ku umildadi, es kreba pa pesoas daba glória pa Jeová i pa Jizus.

7, 8. (a) Ki prezenti nu pode oferese pesoas? (b) Modi ki oji sta ta kunpri kel promésa di “faze tudu kuza novu otu bês”?

⁷ Nos tanbê nu meste ser umildi óras ki nu ta prega sobri Reinu. É verdadi ma oji, spritu di Deus ka ta da kristons puder pa kura otus algen. Má simé, nu pode djuda pesoas dizenvolve fé na Deus i na Kristu. Asi, es pode resebe kel mésmu prezenti ki Pedru oferese, ki é oportunidadi di ten ses pekadu purduadu i di resebe konsolu di Jeová. Tudu anu, milharis di pesoas ta seta kel oportunidadi li, es ta batiza i es ta bira disiplu di Kristu.

⁸ Sima Pedru fla, nu sta vive na ténpu di “faze tudu kuza novu otu bês”. Pa kunpri kes palavra ki “Deus dja flaba pa bóka di se profétas santu di ténpu antigu”, Reinu di Deus kumesa ta governa na séu, na anu 1914. (Atus 3:21; Sal. 110:1-3; Dan. 4:16, 17) Lógu dipôs, Kristu djuda se disiplus rekupera adorason verdaderu li na téra. Pamodi kel-li, milhons di algen sta ta apoia Reinu di Deus i sta ta adora Jeová unidu ku kunpanheru. Es bandona kel manera di ser antigu i es “bisti di kel manera di ser novu ki kriadu di akordu ku vontadi di Deus”. (Efé. 4:22-24) É spritu di Deus ki djuda kel ómi ki staba manku. Tanbê, é ka puder di ómi, má é spritu di Deus ki ta djuda pesoas muda ses vida i adora Deus. Sima Pedru, nu debe uza Palavra di Deus ku koraji i uza-l dretu óras ki nu ta inxina otus algen. Kalker bon rezultadu ki nu ta ten na djuda un algen bira disiplu di Kristu, é ka pamodi nos puder, má pamodi puder di Deus.

“Nu ka pode para di pâpia” (Atus 4:1-22)

9-11. (a) Modi ki kes xéfi di judeus reaji kantu es obi mensajen di Pedru ku Juan? (b) Kuzê ki kes apóstlu staba disididu na faze?

⁹ Kel monti di algen kumesa ta faze barudju pamodi kel diskursu ki Pedru faze i pamodi kel ómi ki kuradu staba ta salta i ta grita. Pur isu, kel xéfi di guarda di ténplu, ki tinha responsabilidadi di mante pesoas na ténplu suguru, i kes xéfi di saserdótis bai faxi pa odja kuzê ki staba ta kontise. Talvês kel xéfi di guarda i kes xéfi di saserdótis éra saduseus. Saduseus éra un seita riku i ki tinha txeu puder na pulítika. Es ta sforsaba pa sta na pas ku romanus. Tanbê, diferenti di farizeus ki ta sigiba lei ku kuidadu, saduseus ta negaba lei i es ka ta kriditaba na resureison.c Imajina modi ki es fika txeu xatiadu kantu es atxa Pedru ku Juan na ténplu ta inxina ku koraji ma Jizus resusitadu!

¹⁰ Kes algen ki staba xatiadu i kóntra Pedru ku Juan pô-s na kadia i kel otu dia es leba-s pa kel Tribunal más altu di judeus. Kes governanti ta atxaba ma es éra más inportanti di ki otus algen i ma Pedru ku Juan éra “ómis sinplis i ku poku skóla” ki ka tinha direitu di inxinaba na ténplu. Es ka studaba na ninhun skóla di relijion txeu konxedu. Má simé, Pedru ku Juan konsigi pâpia di manera klaru i ku kunfiansa, i pamodi kel-li kes algen na tribunal fika dimiradu. Pamodi ki es konsigi pâpia ku kunfiansa? Un di kes motivu é pamodi “es ta staba ku Jizus.” (Atus 4:13) Ses Instrutor ka ta inxinaba es sima kes instrutor di lei, má sima un algen ki tinha autoridadi di verdadi. — Mat. 7:28, 29.

¹¹ Kel tribunal manda apóstlus pa para di prega. Kel tribunal tinha txeu puder. Sô alguns simana antis, kantu kel tribunal li julga Jizus, es fla ma “el merese móre.” (Mat. 26:59-66) Má Pedru ku Juan ka xinti medu. Pedru ku Juan fika dianti di kes ómi li ki éra riku, ki tinha txeu skóla i txeu puder. Ku koraji i ku ruspetu es fla: “Nhos julga anhos, si pa Deus é dretu obi ku nhos envês di obi ku Deus. Má nos, nu ka pode para di pâpia di kes kuza ki nu odja i ki nu obi.” — Atus 4:19, 20.

12. Kuzê ki pode djuda-nu ten koraji i pâpia ku kunfiansa?

¹² Bu ta konsigi mostra kel mésmu tipu di koraji li? Modi ki bu ta xinti óras ki bu ten oportunidadi di da tistimunhu pa kes algen riku, ki ten txeu skóla ô ki ten txeu puder na lugar undi ki bu ta mora? Modi ki bu ta reaji óras ki bu família, un koléga di skóla ô di trabadju faze-u trósa pamodi bus krénsa? Bu ta xinti medu? Si bu ta xinti si, bu pode vense kel medu. Kantu Jizus staba li na téra, el inxina se apóstlus modi ki es pode difendeba ses krénsas ku kunfiansa i ruspetu. (Mat. 10:11-18) Dipôs ki Jizus resusitadu, el promete se disiplus ma el ta kontinuaba ku es “tudu dia, ti fin di es mundu.” (Mat. 28:20) Ku orientason di Jizus, “skravu fiel i prudenti” ta inxina-nu modi ki nu ta difende nos krénsas. (Mat. 24:45-47; 1 Ped. 3:15) Nu ta resebe orientasons através di runions na kongregason, sima Nos vida i nos trabadju di pregason i através di kes publikason ki ten bazi na Bíblia, sima kes artigu na párti “Respóstas pa perguntas di Bíblia”, ki sta na jw.org. Bu sta sisti kes runion i bu sta uza kes publikason li? Si bu sta faze si, bu ta xinti más kunfiansa na kes verdadi di Bíblia i bu ta ten más koraji. I sima kes apóstlu, bu ka ta dexa nada inpidi-u di pâpia sobri kes verdadi inportanti ki bu prende.

“Es ora pa Deus” (Atus 4:23-31)

13, 14. Kuzê ki nu debe faze óras ki nu sta pasa pa opozison i pamodi?

¹³ Lógu dipôs ki Pedru ku Juan tradu di kadia, es ba inkontra ku irmons di kongregason. Tudu djuntu, “es ora pa Deus” i es pidi-l koraji pa es kontinua ta prega. (Atus 4:24) Pedru sabia dretu, ma óras ki nu ta sforsa pa faze vontadi di Deus nu ka debe kunfia na nos própi forsa. Alguns simana antis, ku txeu kunfiansa el fla Jizus: “Mésmu ki tudu kes otu tropesa pamodi bo, ami nunka N ka ta tropesa!” Má sima Jizus dja flaba, Pedru lógu dexa medu di ómi toma kónta di el i el nega se amigu i Instrutor. Má, Pedru prende ku se éru. — Mat. 26:33, 34, 69-75.

¹⁴ Si bu krê kontinua ta obi ku kel órdi di da tistimunhu sobri Kristu, bu meste más di ki sô sta disididu na prega. Óras ki kes algen ki é kóntra nos tenta kaba ku bu fé ô pô-u ta para di prega, sigi izénplu di Pedru ku Juan. Ora ta pidi Jeová forsa. Pidi irmons ku irmans na kongregason pa djuda-u. Fla kes ansion i irmons ku irmans ki ten más spiriénsia sobri kes difikuldadi ki bu sta pasa pa el. Orasons ki nos irmons ta faze pa nos, pode da-nu forsa pa nu aguenta firmi. — Efé. 6:18; Tia. 5:16.

15. Ki izénplu pode djuda-u si na pasadu bu paraba di prega pa un ténpu?

¹⁵ Si na pasadu, preson di otus algen pô-u ta para di prega pa un ténpu, ka bu dizanima. Lenbra ma dipôs ki Jizus móre, apóstlus para di prega pa un ténpu, má lógu dipôs es torna kumesa. (Mat. 26:56; 28:10, 16-20) Ka bu dexa kes éru di pasadu dizanima-u, envês di kel-li, uza kel ki bu prende pa inkoraja otus algen.

16, 17. Kuzê ki nu ta prende di kel orason ki sigidoris di Kristu faze na Jiruzalen?

¹⁶ Sobri kuzê ki nu pode ora óras ki autoridadis ta pirsigi-nu? Repara ma kes disiplu ka pidi Jeová pa proteje-s pa es ka sérba pirsigidu. Es lenbra dretu di kuzê ki Jizus flaba: “Si es pirsigi-m, es ta pirsigi nhos tanbê.” (Juan 15:20) Envês di pidi pa es ka sérba pirsigidu, kes disiplu lial pidi Jeová pa “odja” amiasa di kes algen ki sta pirsigiba es. (Atus 4:29) Kes disiplu odja ma vontadi di Jeová éra kel kuza más inportanti. Es intende ma óras ki es pirsigidu kel-la staba ta kunpri profesias. Es sabia ma sima Jizus dja inxinaba es ora, vontadi di Deus ta “fazedu na téra”, ka ta inporta kuzê ki govérnus di ómi fla. — Mat. 6:9, 10.

¹⁷ Pa es pode fazeba vontadi di Deus, kes disiplu ora pa Jeová: “Djuda bus sérvu kontinua ta pâpia bu palavra ku tudu koraji”. Modi ki Jeová responde ses orason? “Kel lugar na undi ki es staba djuntadu treme. I tudu es fika xeiu di spritu santu i es kumesa ta pâpia di palavra di Deus ku koraji.” (Atus 4:29-31) Nada ka ta inpidi pa vontadi di Deus kunpri. (Isa. 55:11) Ka ta inporta kal ki é dizafiu i ka ta inporta puder ki kes autoridadi ten, si nu ora pa Deus, nu pode ten serteza ma el ta da-nu kel forsa ki nu meste pa nu kontinua ta prega se palavra ku koraji.

Nhos ta presta kónta, ‘ka pa ómis, má pa Deus’ (Atus 4:32–5:11)

18. Kuzê ki kes irmon na kongregason na Jiruzalen ta fazeba pa kunpanheru?

¹⁸ Na poku ténpu, kel novu kongregason na Jiruzalen dja tinha más di 5 mil algen.d Sikrê kes disiplu binha di lugaris diferenti, es tinha “sô un korason i sô un alma”. Es staba unidu na mésmu menti i na mésmu manera di pensa. (Atus 4:32; 1 Kor. 1:10) Kes disiplu faze más di ki sô ora ta pidi Jeová pa abênsua ses sforsu. Es fortalese fé di kunpanheru i óras ki mesteba, es ta djudaba kunpanheru ku kuzas material. (1 Juan 3:16-18) Un izénplu di algen ki faze kel-li é disiplu Juzé, ki apóstlus ta txomaba di Barnabé. El bende un padás di txon ki el tinha i el da apóstlus tudu kel dinheru pa djuda kes ki binha di lugaris lonji. Asi, es ta pode fikaba más ténpu na Jiruzalen pa es prendeba más sobri ses fé.

19. Pamodi ki Jeová distrui Ananias ku Safira?

¹⁹ Un kazal ki txomaba Ananias ku Safira tanbê bende un txon i es da kel dinheru pa apóstlus. Es fla ma es daba tudu kel dinheru, má “sukundidu, [es] tra párti di kel dinheru”. (Atus 5:2) Jeová distrui kel kazal, ka pamodi es da poku dinheru, má pamodi ses motivason éra mariadu i es konta mintira. Es “ka konta mintira pa ómis, má pa Deus.” (Atus 5:4) Sima kes finjidu ki Jizus kondena, Ananias ku Safira staba ta buska glória di ómis, envês di buska aprovason di Deus. — Mat. 6:1-3.

20. Kuzê ki nu ta prende sobri da Jeová algun kuza?

²⁰ Duránti ténpu di apóstlus, kes disiplu fiel na Jiruzalen gostaba di da. Oji tanbê, milhons di Tistimunha di Jeová gosta di da. I es ta faze kontribuisons di livri vontadi pa apoia trabadju di pregason na mundu interu. Ningen ka ta obrigadu uza se ténpu ô se dinheru pa apoia es trabadju. Jeová ka krê pa nu sirbi-l kóntra nos vontadi ô pa obrigason. (2 Kor. 9:7) Óras ki nu ta da Jeová algun kuza, el ka ta djobe pa kuantidadi má pa nos motivason. (Mar. 12:41-44) Nunka nu ka krê ser sima Ananias ku Safira. Nu ka krê sirbi Deus pa nu resebe glória ô pa nu tra algun pruvetu. Envês di kel-li, sima Pedru, Juan i Barnabé, nu krê sénpri sirbi Jeová pamodi nos amor pa el i pa otus algen. — Mat. 22:37-40.