KES KI TA PREGA SOBRI REINU LEBADU PA TRIBUNAL

1, 2. (a) Kuzê ki kes xéfi di relijion konsigi faze ku trabadju di pregason, má modi ki kes apóstlu reaji? (b) Pamodi ki kes apóstlu nega obi ku kel órdi di para di prega?

POKU TÉNPU dipôs di Pentikósti di 33 D.J., kantu kongregason na Jiruzalen tinha sô uns simana ki el formadu, di sertéza kel-la éra un bon oportunidadi pa Satanás ataka kongregason. Antis di kongregason bira fórti el krê kababa ku el. Nton, el aji faxi pa el poi kes xéfi di relijion ta proíbi trabadju di pregason. Má simé, kes apóstlu kontinua ta prega ku koraji i txeu ómi ku mudjer ‘bira ta kridita na Sinhor’. — Atos 4:18, 33; 5:14.

² Kes xéfi di relijion fika uma xatiadu ki es poi tudu kes apóstlu na kadia. Má, un anju di Jeová abri pórta di kadia i di madrugada kes apóstlu staba ta prega otu bês! Es podu prézu otu bês i es lebadu pa autoridadis ki akuza-s di ka obi ku kel órdi di ka prega. Ku koraji kes apóstlu fla-s: ‘Nu ten ki obi ku Deus antis di nu obi ku ómis’. Kes autoridadi fika uma xatiadu ku es ‘ki es krê mataba es’. Má na kel momentu difísil Gamaliel, ki éra un instrutor di lei ki gentis ta ruspetaba, aviza kes autoridadi i el fla-s: ‘Ka nhos mete ku kes ómi li; nhos dexa-s kétu.’ Ka ta da pa kriditaba ma kes autoridadi seta se konsedju i es liberta kes apóstlu. Kuzê ki kes ómi fiel faze? Ku koraji ‘es kontinua sen para, ta inxina i ta pâpia di notísias sábi sobri Kristu, Jizus.’ — Atos 5:17-21, 27-42; Pro. 21:1, 30.

3, 4. (a) Kuzê ki Satanás sta ta uza désdi ténpu antigu pa ataka povu di Deus? (b) Kuzê ki nu ta ben odja na kel kapítlu li?

³ Kel julgamentu li ki kontise na anu 33 D.J., foi kel primeru bês ki kongregason lebadu pa tribunal, má di sertéza ka ta sérba kel últimu bês. (Atos 4:5-8; 16:20; 17:6, 7) Ti inda Satanás sta ta influensia kes ki é kóntra adorason verdaderu, asi pa es poi autoridadis ta proíbi nos trabadju di pregason. Kes ki é kóntra nos dja akuza-nu di txeu kuza diferenti. Pur izénplu, es ta fla ma nu ta tra pas di sosiadadi. Tanbê es ta fla ma nu ta rabela kóntra govérnu i inda es ta fla ma nos trabadju di pregason é pa ganha dinheru. Alguns bês nos irmons bai pa tribunal pa prova ma kes akuzason li é falsu. Kuzê ki kontise na kes julgamentu? Modi ki kes disizon ki alguns tribunal toma, dja ten txeu anu, ti inda sta ta djuda-u? Nu ta ben odja alguns julgamentu ki kontise i modi ki es djuda-nu ‘na difende kes notísia sábi i na pô-s ta fika legal.’ — Fil. 1:7.

⁴ Na kel kapítlu li, nu ta ben konsentra na modi ki nu ten stadu ta difende direitu ki nu ten di prega ku liberdadi. Tanbê nu ta ben pâpia di alguns bês ki nu bai pa tribunal pa nu difende nos direitu di ka faze párti di mundu i nos direitu di obi ku leis di Deus.

Tistimunhas di Jeová ta tra pas di sosiadadi ô es ta difende Reinu di Deus ku lialdadi?

5. Pamodi ki kes ki ta pregaba na fin di anus 30, podu prézu i kuzê ki kes irmon di responsabilidadi na organizason pensa faze?

⁵ Na fin di anus 30, sidadis i stadus na Mérka interu tenta obriga Tistimunhas di Jeová pa es ten un dukumentu ki ta daba es autorizason pa es prega. Má nos irmons ka faze kel-la pamodi un autorizason pode ser anuladu. É Jizus ki manda-nu prega, pur isu autoridadis ka ten ninhun direitu di fla-nu si nu debe prega ô nau. (Marcos 13:10) Pamodi kel-li, un monti di irmon podu na kadia. Kes irmon di responsabilidadi na organizason pensa na bai tribunal pa difende nos direitu di prega. Es krê provaba ma kuzê ki govérnu faze ka staba di akordu ku lei. Na anu 1938 kontise un julgamentu inportanti ki ta influensiaba otus julgamentu na futuru. Kuzê ki kontise?

6, 7. Kuzê ki kontise ku família Cantwell?

⁶ Na un térsa-fera di palmanhan, dia 26 di abril di anu 1938, Newton Cantwell, ki tinha 60 anu; se mudjer Esther; i ses fidjus Henry, Russell i Jesse bai prega na sidadi di New Haven, ki ta fika na Connecticut. Es tudu éra pioneru spesial. Na verdadi es sai di kaza ku ideia ma es ka ta voltaba na kel dia. Pamodi? Pamodi pulísia dja prendeba es txeu bês, nton es sabia ma es podia ser prézu otu bês. Má simé, kel-li ka pô-s ta para di prega mensaji di Reinu. Es bai pa New Haven na dôs karu. Newton staba ta konduzi kel karu ki éra di ses i ki staba xeiu di publikason i di fonógrafus i Henry, ki tinha 22 anu, staba ta konduzi kel karu di son. I sima dja es staba ta spéra, déntu di poku ténpu pulísia para-s.

⁷ Primeru Russell, ki tinha 18 anu, podu prézu, i dipôs Newton ku Esther podu prézu tanbê. Jesse, ki tinha 16 anu, staba más lonji i el odja pulísia ta leba se irmon i se mai ku se pai. Dja ki Henry staba ta prega na otu párti di kel sidadi, Jesse fika el sô, má simé el kontinua ta prega ku se fonógrafu. Dôs ómi di Igreja Katólika dexa Jesse poi gravason di un diskursu di irmon Rutherford, ki se téma éra “Inimigus”. Má kantu es obi kel diskursu, es fika uma xatiadu ki es krê sotaba Jesse. Nton, el afasta di es ku kalma, má poku ténpu dipôs pulísia para-l. Nton Jesse podu prézu tanbê. Pulísia ka akuza irman Esther di ninhun krimi, má es akuza Newton ku ses fidjus. Dipôs na kel mésmu dia pulísia dexa-s bai, má es tevi ki paga un taxa pa mostra ma es ta voltaba pa julgamentu.

8. Pamodi ki Jesse Cantwell kondenadu pa krimi di tra pas di sosiadadi?

⁸ Alguns mês dipôs, na setenbru di anu 1938, kazu di família Cantwell bai pa un tribunal más pikinoti na New Haven. Newton ku Russell i Jesse akuzadu di pidi dinheru sen autorizason. Kel Tribunal Más Altu di Connecticut, kondena Jesse pa krimi di tra pas di sosiadadi. Pamodi? Pamodi kes dôs ómi di Igreja Katólika ki obi kel gravason fla ma el pâpia mal di ses relijion i el insulta-s. Pamodi kel akuzason li nos irmons ki ta tomaba kónta di organizason bai pa kel Tribunal Más Altu di Mérka.

9, 10. (a) Ki disizon ki Tribunal Más Altu di Mérka toma na kazu di Família Cantwell? (b) Modi ki kel disizon li ta djuda-nu ti inda?

⁹ Na dia 29 di marsu di anu 1940, kel juís prinsipal, ki txomaba Charles Hughes, i más 8 juís kumesa ta obi irmon Hayden Covington, ki éra un di kes adivogadu di Tistimunhas di Jeová.a Kantu kel adivogadu ki staba ta difende stadu di Connecticut pâpia pa tenta prova ma Tistimunhas di Jeová ta tra pas di sosiadadi, un di kes juís pergunta-l: “Kel mensaji ki Jizus prega ka éra un mensaji diferenti na se ténpu?” Kel adivogadu responde: “Sin, i si N sta lenbra dretu Bíblia ta fla kuzê ki kontise ku el pamodi el prega kel mensaji la.” Kel adivogadu nen ka da kónta, má sen krê el mostra ma kel pirsigison ki govérnu staba ta faze éra sima kel di kes algen ki mata Jizus. Na dia 20 di maiu di anu 1940, tudu kes juís disidi ma é Tistimunhas di Jeová ki ta ganhaba kel kazu.

¹⁰ Pamodi ki kel disizon li foi inportanti? Pamodi kel-li nu fika ku más liberdadi di adora Deus, asi pa ninhun tipu di govérnu ô autoridadi ka uza lei pa inpidi-nu di adora Deus ku liberdadi. Alén di kel-li, kel Tribunal fla ma es ka atxa nada na konportamentu di Jesse ki ta amiasaba pas na sosiadadi. Nton, kel disizon li dexa klaru ma Tistimunhas di Jeová “ka ta tra pas di sosiadadi.” Kel-la foi un grandi vitória pa povu di Deus. Modi ki kel-li ta djuda-nu ti inda? Un adivogadu ki é Tistimunha di Jeová fla: “Kel direitu ki nu ten di adora Deus ku liberdadi i sen medu di régras injustu ta djuda nos tudu, ki é Tistimunhas di Jeová oji, prega un mensaji di speransa pa kes algen na undi ki nu ta mora.”

Tistimunhas di Jeová ta rabela kóntra govérnu ô es ta fla verdadi?

11. Ki kanpanha nos irmons faze na Kanadá i pamodi?

¹¹ Na anus 40 Tistimunhas di Jeová pasa pa txeu pirsigison na Kanadá. Pur isu na anu 1946, nos irmons di la organiza un kanpanha di 16 dia, pa dexa pesoas ku un folhetu spesial, b ki ta mostraba modi ki govérnu staba ta disruspeta nos direitu di adora Deus ku liberdadi. Kel folhetu tinha kuatu pájina i el mostra tintin pa tintin modi ki kes xéfi di relijion uza pulísia i otus algen pa pirsigi i ataka nos irmons ku violénsia na Kebéki. Kel folhetu ta flaba si: “Tistimunhas di Jeová sta ta podu prézu manenti i kel-li ta viola ses direitu.” El fla tanbê: “Ten uns 800 akuzason kóntra Tistimunhas di Jeová na Grandi Montrial.”

12. (a) Modi ki nos inimigus reaji ku kanpanha di kel folhetu? (b) Di ki krimi nos irmons akuzadu? (Odja nóta tanbê.)

¹² Maurice Duplessis, ki éra primeru ministru di Kebéki, staba ta apoia un xéfi di Igreja Katólika Romanu, ki txomaba Villeneuve, i el fla ma pamodi kanpanha di kel folhetu el staba ta ba kumesa “un géra sen péna” kóntra Tistimunhas di Jeová. Lógu dipôs kel nunbru di akuzason bira dôs bês má txeu, el pasa di 800 pa 1.600. Un pionera fla: “Nu perde kónta di kantu bês ki pulísia pô-nu prézu.” Kes irmon ki pulísia pega pamodi es staba ta dexa pesoas ku folhetu, akuzadu di krimi di “pâpia mal di govérnu.”c

13. Kenha ki akuzadu primeru di krimi di rabela kóntra govérnu i ki disizon tribunal toma?

¹³ Na anu 1947, irmon Aimé Boucher i se dôs fidju-fémia ki txomaba Gisèle, ki tinha 18 anu i Lucille, ki tinha 11 anu, foi kes primeru algen ki julgadu pamodi es akuzadu di rabela kóntra govérnu. Es staba ta dexa kel folhetu spesial pértu di ses propriadadi, ki ta fikaba na kes montanha di sul di sidadi di Kebéki. Má ka ta daba pa fla ma kel família li éra un família prigozu. Irmon Aimé éra un ómi sinplis i mansu, ki ta kuidaba di se propriadadi i kuazi el ka ta saíba di undi ki el ta moraba. Má simé, kel família pasa pa kel mésmu pirsigison ki kel folhetu ta papiaba di el. Kel juís ta odiaba Tistimunhas di Jeová i el nega seta kes próva ki ta mostraba ma kel família éra inosenti. Envês di kel-li, el seta kel ki govérnu fla ma folhetu ta poba pesoas ta fika xatiadu i pur isu el fla ma kel família tinha ki ser kondenadu. Nton, di akordu ku kel disizon di juís: Fala verdadi éra krimi! Aimé ku Gisèle kondenadu pa krimi di rabela kóntra govérnu. I ti Lucille, ki tinha sô 11 anu, pasa dôs dia na kadia. Irmons bai pa kel Tribunal Más Altu di Kanadá, i es seta obi kel kazu.

14. Kuzê ki nos irmons na Kebéki faze duránti kes anu di pirsigison?

¹⁴ Duránti kel ténpu, nos irmons na Kebéki kontinua ta prega mensaji di Reinu ku koraji, sikrê es staba ta atakadu ku txeu violénsia. I txeu bês es tevi bons rezultadu. Na kes kuatu anu dipôs ki kanpanha kumesa na anu 1946, nunbru di Tistimunhas di Jeová na Kebéki omenta di 300 pa 1.000 algen!d

15, 16. (a) Ki disizon kel Tribunal Más Altu di Kanadá toma na kazu di família Boucher? (b) Modi ki kel disizon li djuda irmons i otus algen?

¹⁵ Na mês di junhu di anu 1950, tudu kes 9 juís di kel Tribunal Más Altu di Kanadá analiza kel kazu di Aimé Boucher. Dipôs di 6 mês, na dia 18 di dizénbru di 1950 Tribunal disidi pa nos ladu. Pamodi? Un adivogadu di Tistimunhas di Jeová, ki txomaba Glen How, splika ma Tribunal seta kel ki irmons fla ma pa un algen akuzadu di “rabela kóntra govérnu”, el meste poi otus ta aji ku violénsia ô tenta kaba ku govérnu, má kel folhetu “ka ta poba algen ta faze kel-la. Pur isu, el éra un manera ki staba déntu di nos direitu di pâpia.” Irmon Glen inda fla: “N odja ku nhas odju ma Jeová djuda-nu ganha.”e

¹⁶ Disizon ki Tribunal toma foi un vitória grandi pa Reinu di Deus. Tudu kes 122 kazu di Tistimunhas di Jeová na Kebéki anuladu pamodi kel vitória li. Alén di kel-li, kel disizon ki Tribunal toma djuda otus algen di Kanadá i di otus país ten liberdadi pa fla ses opinion sobri govérnu. I kel-li tanbê tra kes xéfi di relijion i govérnu di Kebéki kel forsa ki es tinha kóntra Tistimunhas di Jeová.

Tistimunhas di Jeová ta prega pa ganha dinheru ô pa es apoia Reinu di Deus?

17. Modi ki alguns govérnu ta tenta kontrola nos trabadju di pregason?

¹⁷ Sima kes primeru disiplu di Jizus, kes ki ta sirbi Jeová oji tanbê, ‘é ka kes ki ta anda ta bende palavra di Deus’. (Lé 2 Coríntios 2:17.) Má simé, alguns autoridadi ta tenta uza leis di ária di nogósius pa tenta kontrola nos trabadju di pregason. Nu ben odja dôs julgamentu ki analiza si Tistimunhas di Jeová ta prega pa ganha dinheru ô pa inxina Palavra di Deus.

18, 19. Ki limiti autoridadis na Dinamarka tenta poi na nos trabadju di pregason?

¹⁸ Dinamarka. Na dia 1 di otubru di 1932 aprovadu un lei ki ta proibiba algen di bende kuzas inprimidu sen un dukumentu ki ta daba es autorizason pa faze kel-la. Má nos irmons ka pidi kel dukumentu. Na kel otu dia sinku publikador pasa kel dia ta prega na Roskilde, ki é un sidadi ki ta fika uns 30 kilómetru lonji di kapital di Dinamarka, ki é Kopenhaga. Na fin di kel dia, un di kes publikador, ki txomaba, August Lehmann, dizaparse. Es pô-l prézu pamodi es fla ma el staba ta bende kuzas sen autorizason.

¹⁹ Na dia 19 di dizenbru di 1932, August Lehmann lebadu pa tribunal. La na tribunal, el fla ma el bai na kaza di alguns algen i el da-s publikason ki ten bazi na Bíblia. Má, el fla ma kel akuzason ki es faze-l ta fla ma el staba ta bende, éra falsu. Kel tribunal fla ma el tinha razon i es fla: “August. . . ta pode sustenta se kabésa i el ka dadu ninhun dinheru nen el ka tinha intenson di toma dinheru, envês di kel-li, el gasta se própi dinheru pa prega.” Kel tribunal fika di ladu di Tistimunhas di Jeová i el disidi ma trabadju ki kes irmon staba ta faze “ka éra nogósiu.” Má kes inimigu di povu di Deus staba disididu na para trabadju di pregason na Dinamarka interu. (Sal. 94:20) Kel algen ki ta reprizentaba públiku na justisa bai na tudu kes tribunal ti ki el txiga na kel Tribunal Más Altu di Dinamarka. Modi ki kes irmon reaji?

20. Ki disizon ki Tribunal Más Altu di Dinamarka toma i modi ki nos irmons reaji?

²⁰ Na kel simana antis di kel Tribunal Más Altu obi kel kazu, Tistimunhas di Jeová na Dinamarka bira ta prega inda más txeu. Na térsa-fera, dia 3 di otubru di 1933, kel Tribunal fla kal ki éra se disizon. Sima kel tribunal más pikinoti, el fla ma August Lehmann ka faze nada kóntra lei. Kel disizon li djuda irmons kontinua ta prega ku liberdadi. Kes irmon bira ta prega inda más txeu, asi pa es mostra gratidon pa kel vitória ki Jeová da-s. Désdi kel ténpu nos irmons na Dinamarka ta faze ses trabadju di pregason sen govérnu inpidi-s.

21, 22. Ki disizon ki Tribunal Más Altu di Mérka toma na kazu di irmon Robert Murdock?

²¹ Mérka. Na dumingu, dia 25 di febreru di 1940, un pioneru ki txomaba Robert Murdock, i más 7 irmon podu prézu timenti es staba ta prega na Jeannette, ki é un sidadi ki ta fika pértu Pittsburgh, na stadu di Pensilvánia. Es akuzadu di da algen publikason sen pidi un dukumentu ki ta daba es autorizason pa faze kel-la. Irmons bai pa kel Tribunal Más Altu di Mérka i kel Tribunal seta analiza kel kazu.

²² Na dia 3 di maiu di 1943, kel Tribunal fla ma es disidi pa ladu di Tistimunhas di Jeová. Kel Tribunal fla ma iziji pa un algen kunpra un autorizason pa da publikasons relijiozu é kóntra lei. Tanbê el fla ma kes autoridadi ka pode kriaba un régra ki ta “inpidiba pesoas di inprimi publikasons ki ta mostra kuzê ki es ta pensa, ô ki ta pâpia sobri ses relijion.” Kantu kel juís, ki txomaba William Douglas, fla kal ki éra disizon di kel Tribunal, el fla ma Tistimunhas di Jeová “ka ta sô dexa publikasons ku pesoas, má es ta prega.” Tanbê el fla ma “kel ki Tistimunhas di Jeová ta faze é txeu inportanti sima kel ki otus relijion ta faze na ses igreja.”

23. Pamodi ki kes julgamentu ki nu ganha na anu 1943 é inportanti pa nos oji?

²³ Kel disizon li foi un vitória rei di inportanti pa povu di Deus. El konfirma kel ki nu ta faze di verdadi: nu ta prega Palavra di Deus, nu ka ta bende-l. Na kel dia di anu 1943, ki fika na stória, Tistimunhas di Jeová ganha 12 di kes 13 kazu ki staba na kel Tribunal Más altu, ki ta inkluiba kel kazu di irmon Robert Murdock. Kes disizon li foi rei di inportanti pamodi ti oji es ta djuda-nu óras ki otus algen ta fla ma nu ka pode prega mensaji di Reinu na rua ô di kaza en kaza.

‘Nu ten ki obi ku Deus antis di nu obi ku ómis’

24. Kuzê ki nu ta faze óras ki govérnu ta proíbi nos trabadju di pregason?

²⁴ Povu di Jeová ta fika txeu kontenti óras ki govérnus ta da-nu liberdadi pa nu prega mensaji di Reinu. Má sikrê un govérnu proíbi nos trabadju di pregason, nu ta kontinua ta prega di kalker otu manera ki nu pode. Sima kes apóstlu ‘nu ten ki obi ku Deus antis di nu obi ku ómis’. (Atos 5:29; Mat. 28:19, 20) I timenti nu ta faze kel-li, nu ta bai pa tribunal pa es tra kel proibison kóntra nos trabadju di pregason. Nu ben odja dôs izénplu.

25, 26. Kuzê ki kontise na Nikarágua ki poi kel Tribunal Más Altu di la ta julga un kazu i ki disizon ki es toma?

²⁵ Nikarágua. Na dia 19 di novenbru di 1952, Donovan Munsterman, ki éra un misionáriu i un enkaregadu na filial, entra na dipartamentu di imigrason na Managua, ki é kapital di Nikarágua. El mandadu ba responde Arnoldo García, ki éra enkaregadu di kel dipartamentu. El fla irmon Donovan ma tudu Tistimunha di Jeová na Nikarágua staba “proibidu di kontinua ta prega ses krénsa i ta faze ses trabadju relijiozu.” Kantu kel enkaregadu di kel dipartamentu perguntadu pamodi, el fla ma Tistimunhas di Jeová ka tinha autorizason di ministru di govérnu pa faze ses trabadju di pregason i ma es akuzadu di ser kumunista. Ken ki akuza-nu? Kes xéfi di Igreja Katólika Romanu.

²⁶ Irmon Donovan pidi ajuda di Ministériu di Govérnu i di Relijion lógu i tanbê pa Prizidenti Anastasio Somoza García, má kel-li ka da ninhun rezultadu. Nton irmons fitxa Salon di Reinu, es bira ta faze runion na grupus más pikinoti i es para di prega na rua, má es kontinua ta prega mensaji di Reinu simé. Omésmu ténpu, es pidi kel Tribunal Más Altu di Nikarágua pa es anula kel proibison. Kes jornal di la pâpia txeu di kel proibison i di kel dukumentu ki irmons skrebeba pa Tribunal. Nton, Tribunal seta analiza kel kazu. Kuzê ki Tribunal disidi? Na dia 19 di junhu di 1953, tudu kes juís di kel Tribunal disidi pa ladu di Tistimunhas di Jeová. Tribunal fla ma kel proibison éra kóntra kel lei ki ta da algen liberdadi di pâpia i di prega sobri ses krénsa. Kel Tribunal fla tanbê ma govérnu di Nikarágua devia dexa Tistimunhas di Jeová faze runion i prega sima es ta fazeba antis di kel proibison.

27. Pamodi ki txeu algen na Nikarágua fika spantadu ku disizon ki Tribunal toma i kuzê ki irmons pensa di kel disizon li?

²⁷ Txeu algen na Nikarágua fika spantadu pamodi kel Tribunal Más Altu fika di ladu di Tistimunhas di Jeová. Pamodi antis di kel-li, xéfis di relijion tinha txeu forsa. Normalmenti, Tribunal ka ta tomaba disizons kóntra es. Alén di kel-li, kes algen di govérnu tanbê tinha txeu puder ki Tribunal ka ta baba kóntra ses disizon. Nos irmons fika ku sertéza ma es ganha kel kazu la pamodi nos Rei proteje-s dja ki es ka para di prega. — Atos 1:8.

28, 29. Kuzê ki muda na Zairi la pa metadi di anus 80?

²⁸ Zairi. La pa metadi di anus 80 tinha uns 35 mil Tistimunha di Jeová na Zairi, ki gósi é Repúblika Dimokrátika di Kongu. Dja ki trabadju di Reinu staba ta omenta kada bês más, filial staba ta faze prédius novu. Na mês di dizenbru di 1985 fazedu un kongrésu internasional na Kinxasa, ki é kapital di la, i 32 mil irmon di paízis diferenti sisti kel kongrésu na un stádiu. Má apartir di la, situason di sérvus di Jeová kumesa ta muda. Kuzê ki kontise?

²⁹ Irmon Marcel Filteau, ki éra un misionáriu ki binha di Kebéki, na Kanadá, pasaba pa kel pirsigison di govérnu di Maurice Duplessis i na kel ténpu el staba ta sirbi na Zairi. El fla kuzê ki kontise: “Na dia 12 di marsu di 1986, kes irmon ki staba ta kuida di trabadju di Tistimunhas di Jeová na kel país, resebe un karta ta fla ma organizason di Tistimunhas di Jeová na Zairi éra ilegal.” Prizidenti di Zairi, ki txomaba Mobutu Sese Seko ki sina kel proibison.

30. Ki disizon inportanti ki Kumison di Filial tinha ki toma i kuzê ki es disidi faze?

³⁰ Na kel otu dia, kel rádiu di la fla: “Nunka más nu ka ta obi ta pâpia di Tistimunhas di Jeová li na [Zairi].” Pirsigison kumesa lógu. Salons di Reinu distruídu, gentis furta kuzas di nos irmons, tanbê irmons podu prézu i es sotadu. Ti fidjus di nos irmons podu prézu. Na dia 12 di otubru di 1988, govérnu toma kes kuza di organizason i alguns trópa di la fika la na kel propriadadi di filial. Kes irmon di más responsabilidadi pidi ajuda na Prizidenti Mobutu, má ka da ninhun rezultadu. Nton, filial tevi ki toma un disizon inportanti: “Nu ta bai pa kel Tribunal Más Altu ô nu ta spéra?” Timothy Holmes, ki éra misionáriu i enkaregadu di Kumison di Filial na kel ténpu fla: “Nu pidi Jeová pa da-nu sabedoria i orientason.” Dipôs ki es ora sobri kel situason, Kumison di Filial txiga konkluzon ma ka éra un bon momentu pa bai pa Tribunal. Envês di kel-li, es konsentra na kuida di nos irmons i na atxa maneras di kontinua ku trabadju di pregason.

31, 32. Ki disizon ki Tribunal Más Altu di Zairi toma i modi ki kel-la djuda nos irmons?

³¹ Pasa txeu anu i Tistimunhas di Jeová kumesa ta pasa pa ménus pirsigison. Tanbê direitus di algen na kel país kumesa ta ruspetadu más txeu. Nton, Kumison di Filial txiga konkluzon ma éra óra di bai pa kel Tribunal di Justisa Más Altu di Zairi pa pâpia sobri kel proibison. Irmons fika dimiradu kantu Tribunal seta obi kel kazu. Nton, na dia 8 di janeru di 1993, kuazi 7 anu dipôs ki fazedu kel proibison, Tribunal disidi ma kel ki govérnu faze kóntra Tistimunhas di Jeová éra ilegal. I kel proibison anuladu. Pensa na kuzê ki kel-li siginifika. Kes juís poi ses vida na prigu kantu es anula un disizon di Prizidenti! Irmon Timothy Holmes fla: “Duránti kel ténpu ki Tribunal staba ta disidi kel kazu, nu odja modi ki Jeová pode muda kuzas.” (Dan. 2:21) Kel disizon li bira fé di nos irmons más fórti. Es xinti ma nos Rei Jizus orienta se povu pa es sabe na ki ténpu i modi ki es ta ajiba.

³² Dja ki kel proibison anuladu, filial tinha autorizason pa traze misionárius, pa faze otus prédiu di filial i pa traze publikasons di otus país.f Sérvus di Deus na mundu interu fika txeu kontenti kantu es odja modi ki Jeová ta proteje i ta kuida di ses amizadi ku el! — Isa. 52:10.

‘Jeová é kel ki ta djuda-nu’

33. Kuzê ki nu ta prende ku kes julgamentu ki nu analiza?

³³ Kes julgamentu ki nu analiza ta prova ma Jizus sta ta kunpri se promésa: ‘N ta da nhos palavras i sabedoria, ki sikrê tudu kes algen kóntra nhos sta djuntadu, es ka ta pode nfrenta nhos i nen responde kuzê ki nhos fla.’ (Lé Lucas 21:12-15.) Ta fika klaru ma alguns bês na nos ténpu, Jeová uza ómis sima Gamaliel pa proteje se povu i el poi juízis ku adivogadus ta difende justisa ku koraji. Jeová ka sta ta dexa nos inimigus inpidi-nu di faze se trabadju. (Lé Isaías 54:17.) Ka ten nada ki nos inimigus pode faze ki ta para trabadju di Deus.

34. Pamodi ki kes julgamentu ki nu ganha ta da ki pensa i kuzê ki es ta prova? (Odja tanbê kuadru “Julgamentus inportanti ki nu ganha na kes tribunal más altu ki ta djuda-nu prega mensaji di Reinu”.)

³⁴ Pamodi ki kes julgamentu ki nu ganha ta da ki pensa? Pensa na kel-li: Tistimunhas di Jeová é ka algen inportanti na sosiadadi. Nu ka ta vota, nu ka ta partisipa na kanpanhas di pulítika i nen nu ka ta tenta influensia kes algen ki é pulítiku. Pamodi kel-li, kes irmon ki ta julgadu na tribunal txeu bês ta odjadu sima algen ‘normal i ku poku skóla’. (Atos 4:13) Nton ta parse ma kes tribunal ka ta ganha nada i ma es ka ten ninhun motivu pa djuda-nu óras ki kes xéfi di relijion i autoridadis ki ten txeu puder na sosiadadi ta tenta para nos trabadju. Nton, nu ta fika spantadu di odja ma txeu bês es disidi pa nos ladu. Kes vitória li ta prova ma nu sta ta anda ‘dianti di Deus i na konpanhia di Kristu.’ (2 Cor. 2:17) Pur isu, nu ta fla sima apóstlu Polu: ‘Jeová é kel ki ta djuda-m; N ka ta ten medu.’ — Heb. 13:6.