Juzias ta amaba Lei di Deus

Juzias bira rei di Judá kantu el tinha 8 anu. Na se ténpu, povu ta fazeba majia i ta adoraba imajis. Kantu Juzias tinha 16 anu, el tenta prende modi ki ta adoradu Jeová di midjór manera. Kantu el tinha 20 anu, el kumesa ta distrui kes imaji i altaris na país interu. I kantu ki el tinha 26 anu, el pripara pa konpo ténplu di Jeová.

Na ténplu, Ilkias ki éra saserdóti prinsipal, atxa rolu di Lei di Jeová — talvês éra própi kel rolu ki Muizes skrebeba ku se mô. Sekretáriu di rei, ki txomaba Safan, leba rolu pa Rei Juzias i el kumesa ta le-l ku vós altu. Kantu Juzias obi, el da kónta ma dja tinha txeu ténpu ki povu ka staba ta obi ku Jeová. Rei Juzias fla Ilkias: ‘Jeová sta rei di xatiadu ku nos. Bai bu pâpia ku Jeová pa el fla-nu kuzê ki nu debe faze.’ Jeová responde através di profetiza Ulda: ‘Povu di Judá bandona-m. Es ta ben resebe kastigu, má ka na ténpu ki Juzias sta ta governa, pamodi el mostra ser un algen umildi.’

Kantu Rei Juzias obi mensaji, el bai pa ténplu i el txoma tudu povu di Judá. Dipôs el lé Lei di Jeová ku vós altu pa tudu nason obi. Juzias i povu promete obi ku Jeová di tudu ses korason.

Dja tinha txeu ténpu ki povu di Judá ka komemoraba Páskua. Má kantu Juzias lé na Lei ma es devia komemoraba Páskua tudu anu, el fla povu: ‘Nu sta ben faze un Páskua pa Jeová.’ Nton Juzias pripara pa faze txeu sakrifisiu i pa ranja kantoris pa faze koru na ténplu. Povu komemora Páskua, dipôs es faze Fésta di Pon sen Fermentu ki dura 7 dia. Ka fazedu ninhun Páskua sima kel-li désdi ténpu di Samuel. Juzias ta amaba Lei di Deus di verdadi. I bo? Bu gosta di prende sobri Jeová?