Anjus aviza ma Jizus dja nase

Séza Agustu ki éra Governanti di Roma, manda pa tudu judeus volta pa ses sidadi pa bai rasênsia. Nton Juzé ku Maria viaja ti Belen, pamodi família di Juzé éra di la. Maria staba kuazi ta ten fidju.

Kantu es txiga na Belen, úniku lugar ki es atxa pa es fika, éra un lugar di poi animal. É la ki Maria ten se fidju. El inbrudja-l na panu finu i el deta-l kétu na un kuza ki ta podu animal kumida.

Pértu di Belen, staba alguns pastor ta toma kónta di ses animal di noti. Dirapenti, un anju parse ses frenti i lus di glória di Jeová fika ta brilha na ses vólta. Pastoris fika ku medu, má anju fla-s: ‘Ka nhos xinti medu. N ben da nhos un grandi notísia. Misías nase oji na Belen.’ Kel óra, parse un monti anju na séu ta fla: ‘Glória pa Deus na Séu i pas na Téra.’ Dipôs anjus dizaparse. Kuzê ki kes pastor faze?

Pastoris fla kunpanheru: ‘Nu bai Belen gósi li.’ Es bai faxi i es atxa Juzé ku Maria ku ses mininu ki nase kel óra, na un lugar ki ta podu animal.

Tudu algen ki obi kuzê ki anju fla kes pastor fika spantadu. Maria pensa txeu na kuzas ki anjus fla i el ka skese nunka más. Pastoris bai kuida di ses animal otu bês. Es fika ta agradise Jeová pa tudu kuza ki es odja i ki es obi.