Jizus skodje Saulu

Saulu éra romanu má el naseba na Tarsu. El éra un farizeu ki ta ntendeba lei di judeus dretu i el ta odiaba sigidoris di Jizus Kristu. El ta pegaba ómis ku mudjeris déntu ses kaza i el ta fitxaba es na kadiâ. El fika sakédu ta odja gentis ta da Estevão ku pédra ti móre.

Má Saulu ka staba kontenti sô ku prende kristons na Jiruzalen. El pidi saserdóti prinsipal pa manda-l pa un sidadi ki txomaba Damasku, pa el prende kes kriston ki ta moraba la. Kantu el staba kuazi ta txiga, lúmia un lus fórti dirapenti na se vólta i el kai na txon. El obi un vós ta fla-l: ‘Saulu, pamodi ki bu sta pirsigi-m?’ Saulu pergunta: ‘Abo é kenha?’ El responde: ‘Ami é Jizus. Bai Damasku i bu ta sabe kuzê ki bu debe faze.’ Kel óra, Saulu bira ségu i el tinha ki lebadu pa sidadi pegadu na mô.

Na Damasku, tinha un kriston fiel ki txomaba Ananias. Jizus fla-l na un vizon: ‘Bai pa kaza di Judas ki ta fika na un rua ki txoma Direita i djobe Saulu.’ Ananias fla: ‘Sinhor, N sabe tudu kuza sobri kel ómi li! El poi bus disiplu na kadiâ!’ Má Jizus fla-l: ‘Bai na el. N skodje-l pa prega notísias sábi pa txeu nason.’

Nton, Ananias atxa Saulu i el fla-l: ‘Saulu, nha irmon, Jizus manda-m pa N ben abri-u odju.’ Kel óra, Saulu bira ta odja otu bês. El prende sobri Jizus i el bira se sigidor. Dipôs ki el batiza el kumesa ta prega na sinagógas djuntu ku kes otu kriston. Bu ta konsigi imajina modi ki judeus fika kantu ki es odja Saulu ta inxina gentis sobri Jizus? Es fla: ‘Kel-li é ka kel ómi ki ta pirsigiba disiplus di Jizus?’

Saulu fika três anu na Damasku ta prega pa gentis ki ta moraba la. Judeus ta odiaba Saulu i es faze planu pa mata-l. Má, irmons fika ta sabe di ses planu i es djuda Saulu skapa. Es pô-l déntu di un balai i es dixi-l na un braku ki ta fikaba na paredi di sidadi.

Kantu Saulu bai Jiruzalen, el tenta fika djuntu ku irmons. Má es tinha medu di el. Nton, un disiplu amorozu ki txomaba Barnabé leba Saulu pa apóstlus i el djuda-s ntende ma Saulu dja mudaba. Saulu kumesa ta prega notísias sábi ku zelu djuntu ku kongregason na Jiruzalen. Dipôs, Saulu bira ta txomadu Polu.